□□□□□
Ang Abo sang Baka nga Pula
1 Ang Ginoo nagsugo kay Moises kag kay Aaron
2 sa paghatag sa mga Israelinhon sang masunod nga mga pagsulondan. Magdala kamo sing baka nga pula nga wala sing depekto kag wala pa matakdi sing gota,
3 kag ihatag ini sa kay Eleazar nga pari. Pagadalhon ini sa gwa sang kampamento kag pagaihawon sa iya atubangan.n
4 Dayon si Eleazar magkuha sing dugo sini paagi sa iya tudlo kag iwisik ini sing makapito padulong sa Tolda nga Tilipunan.
5 Ang bilog nga sapat lakip ang panit, ang karne, ang dugo, kag ang mga kasudlan, pagasunogon sa atubangan sang pari.
6 Dayon magakuha sia sing kahoy nga sedro, isa ka bilog nga hisopo, kag pula nga panapton kag ihaboy ini sa kalayo.
7 Sa tapos sini, kinahanglan labhan niya ang iya mga bayo kag buboan niya sing tubig ang iya kaugalingon, kag dayon sarang na sia makasulod sa kampamento; pero magapabilin sia nga dimatinlo tubtob sa gab-i.
8 Ang tawo nga nagsunog sang baka kinahanglan maglaba man sang iya mga bayo kag buboan niya sing tubig ang iya kaugalingon, pero magapabilin sia nga dimatinlo man tubtob sa gab-i.
9 Dayon ang isa ka tawo nga matinlo magtipon sang mga abo sang baka kag ibutang niya ini sa isa ka matinlo nga duog sa gwa sang kampamento, sa diin pagataguon ini para sa katilingban sang mga Israelinhon, agod gamiton sa pagtimpla sang tubig nga ginagamit sa pagkuha sang pagkadimatinlo. Ini nga tulumanon ginahimo sa pagkuha sang sala.
10 Ang tawo nga nagtipon sang mga abo kinahanglan maglaba sang iya mga bayo, pero magapabilin sia nga dimatinlo tubtob sa gab-i. Ini nga pagsulondan pagatumanon sa tanan nga panahon nga palaabuton sang mga lsraelinhon kag sang mga dumoluong nga nagapuyo upod sa ila.
Ang Pagtandog sang isa ka Bangkay
11 Ang bisan sin-o nga makatandog sang isa ka bangkay, mangindimatinlo sa sulod sang pito ka adlaw.
12 Kinahanglan magpaninlo sia sang iya kaugalingon sa tubig nga ginagamit sa pagpaninlo sa ikatlo nga adlaw kag ikapito nga adlaw, kag dayon manginmatinlo sia. Pero kon indi sia magpaninlo sang iya kaugalingon sa ikatlo kag ikapito nga adlaw, indi sia manginmatinlo.
13 Ang bisan sin-o nga makatandog sang isa ka bangkay kag wala nagapaninlo sang iya kaugalingon magapabilin nga dimatinlo, kay wala sia mawisiki sang tubig nga ginagamit sa pagpaninlo. Gindagtaan niya ang Tolda sang Kasugtanan sang Ginoo kag indi na sia pagkabigon nga isa sang mga tawo sang Dios.
14 Nahanungod sang tawo nga napatay sa isa ka tolda, ang bisan sin-o nga yara sa sulod sang tolda sa tion sang pagkapatay ukon ang bisan sin-o nga makasulod sa tolda mangindimatinlo sa sulod sang pito ka adlaw.
15 Ang tagsa ka banga ukon kolon sa sulod sang tolda nga wala sing takop mangindimatinlo man.
16 Nahanungod sang isa ka tawo nga nakatandog sang tawo nga ginpatay ukon sang tawo nga napatay sa wayang ukon sang tawo nga nakatandog sang tul-an sang tawo ukon sang isa ka lulobngan, ina nga tawo mangindimatinlo sa sulod sang pito ka adlaw.
17 Sa pagkuha sang pagkadimatinlo, butangan ang kolon sang abo sang baka nga pula nga ginsunog sa pagkuha sang sala, kag butangan sang tab-ang nga tubig.
18 Nahauna, ang tawo nga matinlo magkuha sing hisopo, itum-oy ini sa tubig, kag wisikan ang tolda, ang tanan nga butang nga yara sa sulod sini, kag ang mga tawo nga yadto didto. Ikaduha, ang tawo nga matinlo magwisik sa tawo nga nakatandog sang tul-an sang tawo ukon sang isa ka bangkay ukon sang isa ka lulobngan.
19 Sa ikatlo kag sa ikapito nga adlaw, ang tawo nga matinlo magwisik sing tubig sa tawo nga dimatinlo. Sa ikapito nga adlaw, pagatinloan niya ang amo nga tawo. Sa tapos sia makalaba sang iya mga bayu kag makapamubo sing tubig sa iya kaugalingon, manginmatinlo sia sa pagtunod sang adlaw.
20 Ang bisan sin-o nga mangindimatinlo kag wala nagapaninlo sang iya kaugalingon magapabilin nga dimatinlo, kay wala sia mawisiki sang tubig nga ginagamit sa pagpaninlo. Ginadagtaan niya ang Tolda nga Tilipunan sang Ginoo kag indi na sia pagkabigon nga isa sang mga tawo sang Dios.
21 Ini nga pagsulondan pagatumanon ninyo sa tanan nga panahon nga palaabuton. Ang tawo nga nagawisik sang tubig nga gingamit sa pagpaninlo kinahanglan maglaba man sang iya mga bayo; ang bisan sin-o nga makatandog sang tubig magapabilin nga dimatinlo tubtob sa gab-i.
22 Ang bisan ano nga matandog sang tawo nga dimatinlo mangindimatinlo, kag ang bisan sin-o nga makatandog sini magapabilin nga dimatinlo tubtob sa gab-i.
nPagadalhon . . . atubangan: ukon Dalhon niya ini sa gwa sa sidlangan sang kampamento kag ihawon ini.
No comments:
Post a Comment