MGA HUKOM - Kapitulo 5

1 2 3 4 5 6 7 8 9 10 11 12 13 14 15 16 17 18 19 20 21 

◇◇◇◇◇

Ang Kanta ni Debora kag ni Barak

1 Sadto nga adlaw si Debora kag si Barak nga anak ni Abinoam nagkanta sini nga ambahanon:
2 Dayawon ang Ginoo! Sang pagpamat-od sang mga Israelinhon nga sila magapakig-away, ang mga tawo nagbulontad sing malipayon!
3 Pamati kamo, O mga hari! Talupangda ninyo, O mga pangulo! Magaamba ako kag magalanton sa Ginoo nga Dios sang Israel!
4 O Ginoo, sang bayaan mo ang kabukiran sang Seir, sang maglakat ikaw halin sa kadutaan sang Edom, nagtay-og ang duta, kag nag-ulan gikan sa langit. Huo, ang mga gal-om nag-ula sang mga tubig.
5 Ang mga kabukiran nagkurog sa atubangan sang Ginoo sang Sinai, sa atubangan sang Ginoo, ang Dios sang Israel.
6 Sa mga inadlaw ni Samgar nga anak ni Anat, sa mga inadlaw ni Jael, ang madamo nga mga manlulogayaw wala na mag-agi sa duta ang mga nagapanglakaton nag-agi sa hilithilit nga mga dalan.
7 O Debora, ang mga banwa sang Israel ginpatumbayaan, nagpabilin sila nga wala sing pumoluyo tubtob sa imo pag-abot,ⁱ nag-abot ikaw subong nga iloy sang Israel.
8 May inaway bala sa duta sang pagpili sang Israelinhon sang bag-o nga mga diosdios? Sa mga kap-atan ka libo ka mga lalaki sa Israel, may yara bala nga nagdala sing taming ukon bangkaw?
9 Ang akon tagipusoon yara sa mga pangulo sang Israel, sa mga tawo nga nagbulontad sing malipayon. Dayawon ang Ginoo!
10 Isugid ninyo ini,^j kamo nga nagasakay sa bukay nga asno, nga nagalingkod sa mga montora, kag kamo nga kinahanglan maglakat sa inyo kadtuan.
11 Pamatii ninyo ang magahod nga mga tawo sa palibot sang bubon nagasugid sila sang mga pagdaog sang Ginoo, ang pagdaog sang mga Israelinhon! Dayon ang mga tawo sang Ginoo nagdulhog halin sa ila mga siyudad.^k
12 Pangulohi, O Debora, pangulohi! Pangulohi! Pangulohi! Amba ka sing ambahanon! Lakat ka, O Barak, anak ni Abinoam, dalha ang imo mga bihag!
13 Dayon ang mga matutom nga mga tawo nagkadto sa ila mga pangulo, ang mga tawo sang GINOO nagpalapit sa iya^l nga handa sa pagpakig-away.
14 Nagdulhog sila^m halin sa Efraim pa kapatagan,ⁿ nga nagasunod sa tribo ni Benjamin kag sa iya mga kaliwat. Ang mga pangulo nagdulhog halin sa Makir, ang mga opisyales gikan sa Sabulon.
15 Ang mga pangulo sang Isacar nag-abot upod kay Debora, huo, si Isacar nag-abot, kag si Barak man. Nagsunod sila sa iya pakadto sa kapatagan. Pero ang tribo ni Ruben nagbinahinbahin, indi sila makapamat-od sa pagkari.
16 Ngaa nagpabilin sila upod sa mga karnero? Sa pagpamati bala sa mga manugbantay nga nagapanawag sa mga panong? Huo, ang tribo ni Ruben nagbinahinbahin, indi sila makapamat-od sa pagkari.
17 Ang tribo ni Gad nag-estar sa sidlangan sang Jordan, ang tribo ni Dan nagpabilin sa mga halalban. Ang mga tribo ni Aser nagpuyo malapit sa dagat, nagpabilin sila sa baybayon.
18 Pero ang mga kaliwat ni Sabulon kag ni Neftali nagtaya sang ila mga kabuhi sa patag sang pag-awayan.
19 Ang mga hari nag-abot kag nagpakig-away sa Taanak, sa higad sa sapa sang Megido. Ang mga hari sang Canaan nagpakig-away, pero wala sila sing may nakuha nga pilak.
20 Ang mga bituon halin sa langit nagpakig-away, samtang nagaagi sa ila alagyan sa langit nagpakig-away sila batok kay Sisera.
21 Ang baha sa Kison nag-anod sa ila, ang masulog nga Suba Cison. Magaabanse kag magaabanse ako nga may kusog!
22 Dayon nagtuwak nga nagtuwak ang mga kabayo, nga nagadagubdob ang ila mga tiil sa duta.
23 “Pakamalauta ang Meros," siling sang anghel sang Ginoo, "Pakamalauta, pakamalauta ang mga nagapuyo didto. Wala sila magkari sa pagbulig sa Ginoo, subong mga soldado nga nagapakig-away para sa iya."
24 Ang labing mapalaron sa mga babayi amo ni Jael, ang asawa ni Heber nga Kenhanon, ang labing mapalaron sa mga babayi nga nagapuyo sa mga tolda.
25 Nagpangayo si Sisera sing tubig, pero ginhatagan niya sing gatas, gindalhan niya sia sing latab sang gatas sa matahom nga yahong.
26 Sa isa niya ka kamot, nagdala sia sang palpal sang tolda, ang isa ka kamot nag-uyat sang martilyo sang panday, ginpulpog niya si Sisera sa ulo kag nabuka ini, ginpalpalan niya ini kag gindugmok.
27 Naglup-og si Sisera. Natumba kag naghamyang sa tiilan ni Jael. Sa iya tiilan naglup-og si Sisera kag natumba, natumba sia sa duta kag napatay.
28 Ang iloy ni Sisera naglantaw sa bintana, sa likod sang mga birha naglantaw sia kag nagpanalambiton: "Ngaa atrasado ang pag-abot sang iya karuwahi? Ngaa bala kadugay magbalik ang iya mga kabayo?"
29 Ang iya labing maalam nga mga dama nagsabat sa iya, kag ginsingganan niya sing liwatliwat ang iya kaugalingon,
30 "Nagapangita lamang sila sing mga maagaw, kag mabahinbahin, isa ukon duha ka dalaga para sa tagsa ka soldado, malahalon nga bayu para kay Sisera, binordahan nga mga panapton para sa liog sang rayna.”
31 Gani, O Ginoo, kabay nga magkalamatay ang tanan mo nga mga kaaway, pero kabay ang imo mga abyan manginsubong sang adlaw sa iya pagbutlak! Kag nagluntad ang paghidait sa duta sa sulod sang 40 ka tuig.

ⁱO Debora . . . sa imo pag-abot; ukon Ang mga banwa sang Israel ginpatumbayaan, nagpabilin sila nga wala sing pumoluyo tubtob ako, si Debora, nag-abot.
^jIsugid ninyo ini; ukon Panghunahonai ninyo ini.
^khalin sa ila mga siyudad; ukon sa ila mga gawang.
^lAng isa ka dumaan nga pagbadbad iya; sa Hebreo akon.
^mNagdulhog sila; sa Hebreo Ang ila gamot.

ⁿAng isa ka dumaan nga pagbadbad pa kapatagan; sa Hebreo sa Amalek.

MGA HUKOM - Kapitulo 4 <<<   >>> MGA HUKOM - Kapitulo 6