◇◇◇◇◇
Ang Ginbilin nga mga Pungsod sa Pagtilaw sa Israel
1 Ang GINOO nagbilin sang iban nga mga pungsod sa duta sa pagtilaw sa mga Israelinhon nga wala makaagi sing mga inaway sa Canaan.2 Ginhimo ini sang Ginoo agod lamang matudloan ang tagsa ka kaliwatan sang mga Israelinhon nahanungod sa inaway, labi na gid yadtong mga wala pa gid makaagi sa pagpakig-away halin sang una.
3 Yadtong mga nabilin sa duta amo ang lima ka mga siyudad sang mga Filistinhon, ang tanan nga mga Canaanhon, ang mga Sidonhon, kag ang mga Hebhanon nga nagpuyo sa Bukid sang Libano, halin sa Bukid sang Baal Hermon tubtob sa Alagyan sang Hamat.
4 Nabilin sila sa pagtilaw sa Israel, kon bala tumanon sang mga Israelinhon ukon indi ang mga sugo nga ginhatag sang Ginoo sa ila mga katigulangan paagi kay Moises.
5 Gani ang mga tawo sang Israel nagpuyo upod sa mga Canaanhon, mga Hethanon, mga Amornon, mga Peresnon, mga Hebhanon, kag mga Jebusnon.
6 Nag-alasawahay sila, kag nagsimba sila sa ila mga dios.
Si Otniel
7 Ang mga tawo sang Israel nagkaIimot sa Ginoo nga ila Dios. Nagpakasala sila batok sa iya, kag nagsimba sa mga Baal kag sa mga Astarot.8 Gani ang Ginoo naakig gid sa Israel, kag ginpalutos niya sila sa kay Kusanrisataim nga hari sang Mesopotamia. Gingamhan niya sila sa sulod sang walo ka tuig.
9 Dayon ang mga Israelinhon nagpanawag sa GINOO, kag nagpadala ang Ginoo sing tawo nga nagluwas sa ila. Amo ini si Otniel, nga anak ni Kenas nga manghod ni Caleb.
10 Gingamhan sia sang espiritu sang Ginoo, kag nanginpangulo sia sang Israel. Nagpangulo si Otniel sa inaway, kag ginpadaog sia sang Ginoo batok sa hari sang Mesopotamia.
11 Nagluntad ang kalinong sa duta sa sulod sang 40 ka tuig. Sang ulihi, si Otniel nga anak ni Kenas, napatay.
Si Ehud
12 Ang mga tawo sang Israel nagpakasala liwat batok sa Ginoo. Tungod sini, ginpabakod sang Ginoo si Eglon nga hari sang Moab batok sa Israel.13 Nagbuylog si Eglon sa mga Amonhon kag sa mga Amaleknon. Ila ginlutos ang Israel, kag ila ginbihag ang Siyudad sang mga Palma.
14 Ang mga Israelinhon gingamhan ni Eglon sa sulod sang napulo kag walo ka tuig.
15 Dayon ang mga Israelinhon nagpanawag sa Ginoo, kag nagpadala sia sing isa ka tawo sa pagluwas sa ila. Amo ini si Ehud, ang tawo nga walis nga anak ni Gera, gikan sa tribo ni Benjamin. Ang mga tawo sang Israel nagpadala kay Eglon nga hari sang Moab sing mga regalo paagi kay Ehud.
16 Naghimo si Ehud sing espada nga doble sing solab, nga mga isa ka tapak kag tunga ang kalabaon. Gintago niya ini sa sulod sang iya bayu sa iya tuo nga kilid.
17 Dayon gindala niya ang mga regalo sa kay Eglon. Si Eglon isa ka tawo nga tama katambok.
18 Sang mahatag na ni Ehud sa iya ang mga regalo, ginpalakat niya ang mga tawo nga nagdala sang mga regalo.
19 Pero si Ehud nagbalik sa may sininsil nga mga bato malapit sa Gilgal kag nagsiling, “Mahal nga hari, may sekrito ako nga balita para sa imo.” Ginsingganan sang hari ang iya mga ulipon, “Bayai ninyo kami diri!" Gani naglakat sila tanan.
20 Sang isa na lang ang hari nga nagapungko sa iya mabugnaw nga kuwarto sa atop, ginpalapitan sia ni Ehud kag nagsiling, "May mensahi ako sa imo halin sa Dios." Nagtindog dayon ang hari.
21 Gingabot ni Ehud sang iya wala nga kamot ang espada gikan sa iya tuo nga kilid kag ginbuno ang tiyan sang hari.
22 Ang bug-os nga espada nagsalop tubtob sa iya pulo, kag gintabunan ini sang tambok, kay wala ini paggabuta ni Ehud gikan sa tiyan sang hari. Ang espada naglapos sa iya likod.
23 Naggwa dayon si Ehud, iya ginsirahan ang mga puwertahan,
24 ginkandaduhan ini kag naghalin. Nag-abot ang mga suloguon kag nakita nila ang mga puwertahan nga nakandaduhan. Naghunahona lamang sila nga ang hari yara sa sulod nga nagapahuwayhoway.
25 Naghulatholat sila tubtob nga tinak-an sila, pero wala niya pag-abrihi ang puwertahan. Gani ginkuha nila ang yabi kag ginbuksan ang puwertahan, kag nakita nila ang ila agalon nga nagahamyang sa salog nga patay na.
26 Nagpalagyo si Ehud samtang nagahinulat sila. Didto sia nag-agi sa mga bato nga sininsil, kag nagpalagyo pa Seira.
27 Sang makaabot sia didto, nagpatunog sia sang budyong nga sungay sang karnero sa kabakuloran sang Efraim sa pagpanawag sa mga tawo sang Israel sa pag-away. Kag nag-una sia sa ila sa pagdulhog sa mga kabakuloran.
28 Ginsingganan niya sila, "Sunod kamo sa akon! Ang GINOO naghatag sa inyo sing pagdaog batok sa inyo mga kaaway nga Moabnon." Gani nagsunod sila sa iya sa pagdulhog kag gin-agaw nila ang lugar nga pagatabukan sang mga Moabnon sa Jordan. Wala nila pagpatabuka bisan isa lang ka tawo.
29 Sa sadto gid nga tion ginpamatay nila ang mga 10,000 ka makusog kag isganan nga mga soldado nga Moabnon, kag wala sing isa nga nakapalagyo.
30 Ginlutos sang mga Israelinhon ang Moab sadto nga adlaw. Nagluntad ang kalinong sa duta sa sulod sang 80 ka tuig.
Si Samgar
31 Ang madason nga pangulo amo si Samgar, ang anak ni Anat. Ginpamatay niya ang 600 ka mga Filistinhon paagi sa suntok nga ginagamit sa baka. Sia man nagluwas sang Israel.
No comments:
Post a Comment