MGA HUKOM - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 

◇◇◇◇◇

Ang mga Tribo ni Juda kag ni Simeon Nagbihag kay Adoni-besek

1 Sa tapos mapatay si Josue, ang mga tawo sang Israel nagpamangkot sa GINOO, “sin-o bala sa amon mga tribo ang magalakat sing una sa pagpakig-away sa mga Canaanhon?”

2 Nagsabat ang GINOO, “Ang mga kaanakan ni Juda amo ang magalakat sing una. Ginatugyan ko sa ila ang amo nga duta.”

3 Ang mga kaliwat ni Juda nagsiling sa mga kaanakan ni Simeon, “Updi ninyo kami sa pagsulod sa kadutaan nga ginhatag sa amon, kag magbuligay kita sa pagpakig-away sa mga Canaanhon. Dayon maga-upod man kami sa inyo sa pagsulod sa kadutaan nga ginhatag sa inyo.” Gani ang mga tribo ni Simeon

4 kag ni Juda nagbuligay sa pagpakipag-away. Ginpadaog sila sang GINOO batok sa mga Canaanhon kag sa mga Peresnon, kag ginlutos nila ang 10,000 ka mga tawo sa Besek.

5 Nakita nila didto si Adoni-besek, kag nagpakig-away sila batok sa iya. Ginlutos nila ang mga Canaanhon kag ang mga Peresnon.

6 Nagpalagyo si Adoni-besek, pero ginlagas nila sia, gindakop kag ginpang-utod ang mga kumalagko sa iya mga kamot kag mga tiil.

7 Nagsiling si Adoni-besek, “70 ka mga hari nga napang-utdan sing mga kumalagko sa ila mga kamot kag mga tiil ang nagpamulot sing mga salin nga kalan-on sa idalom sang akon lamisa. Ginhimo sang Dios sa akon ang akon ginhimo sa ila.” Gindala nila si Adoni-besek sa Jerusalem kag didto sia napatay.

Gindaog sang Tribo ni Juda ang Jerusalem kag Hebron

8 Gingubat sang mga kaanakan ni Juda ang Jerusalem kag gin-agaw ini. Ginpamatay nila ang mga pumoluyo kag ginsunog ang siyudad.

9 Sa tapos sini gingubat nila ang mga Canaanhon nga nagapuyo sa kabakuloran, sa Negeb, kag sa mga kapatagan.

10 Ang mga kaanakan ni Juda naggubat sa mga Canaanhon nga nagapuyo sa siyudad sang Hebron, nga ginatawag anay nga Siyudad sang Arba. Ginlutos nila sanday Sesai, Ahiman kag Talmai.

Gindaog ni Otniel ang Siyudad sang Debir
(Jos. 15:13-19)

11 Halin didto gingubat sang mga tawo sang Juda ang mga pumoluyo sang siyudad sang Debir, nga ginatawag anay nga Siyudad sang Seper.

12 Nagsiling si Caleb, “Ipaasawa ko si Acsa nga akon anak nga babayi sa tawo nga makadaog kag makaagaw sang Siyudad sang Seper.”

13 Si Otniel, ang anak ni Kenas nga manghod nga lalaki ni Caleb, nag-agaw sang siyudad. Gani ginpaasawa sa iya ni Caleb si Acsa nga iya anak nga babayi.

14 Sa adlaw sang kasal, ginbuyok sia ni Otniel^a sa pagpangayo sa iya amay sing isa ka puna nga duta. Gani nagkadto si Acsa kay Caleb, kag sang makapanaog sia sa iya asno, ginpamangkot sia ni Caleb kon ano ang iya kinahanglan.

15 Nagsabat sia, “Hatagi man ako sing pabor. Tungod kay ginbutang mo ako sa Negeb, hatagi ako sing mga tuboran sang tubig.” Gani ginhatag sa iya ni Caleb ang naibabaw kag naubos nga mga tuboran.

Ang mga Pagdaog sang mga Tribo ni Juda kag ni Benjamin

16 Ang mga kaliwat sang ugangan nga lalaki ni Moises, ang mga Kenhanon, nagtaklad upod sa mga kaanakan ni Juda halin sa Siyudad sang mga Palma pakadto sa desierto sang Judas a nabagatnan sang Arad. Nagpuyo sila didto upod sa mga Amalekanhon.^b

17 Ang mga kaanakan ni Juda nag-upod sa mga kaanakan ni Simeon, kag ginlutos nila ang mga Canaanhon sa siyudad sang Sepat. Ginpakamalaut nila ang siyudad kag ila ini ginlaglag. Ginhingalanan nila ang siyudad nga Horma.^c

18 Wala nila gin-agaw^d ang Gasa, Askalon, ukon ang Ekron, lakip ang ila palibot nga mga kadutaan.

19 Ginbuligan sang GINOO ang mga kaanakan ni Juda, kag ginpanag-iyahan nila ang mga kabakuloran. Pero indi sila makasarang sa pagtabog sang mga tawo nga nagapuyo sa baybayon, kay ini nga mga tawo may mga karuwahi nga salsalon.

20 Suno sa ginsugo ni Moises, ang Hebron ginhatag kay Caleb. Gintabog ni Caleb halin sa Hebron ang tatlo ka mga anak nga lalaki ni Anak.

21 Pero ang tribo ni Benjamin wala magtabog sang mga Jebusnon nga nagpuyo sa Jerusalem. Sugod sadto ang mga Jebusnon nagpuyo sa Jerusalem upod sa mga kaanakan ni Benjamin.

Ang mga Tribo ni Jose Nagdaog sang Betel

22-23 Ang mga tribo ni Jose naglakat sa paggubat sang siyudad sang Betel, nga gintawag anay Lus. Ang GINOO nagbulig sa ila. Nagpadala sila sing mga espiya pakadto sa siyudad,

24 kag ini sila nakakita sang isa ka tawo nga nagapagwa halin sa siyudad, kag nagsiling sila sa iya, “Tudloi kami kon ano ang pagsulod sa siyudad, kag indi ka namon pag-anhon.”

25 Gani gintudloan niya sila. Ginpamatay nila ang tagsatagsa sa siyudad, luas lamang sini nga tawo kag sang bug-os niya nga panimalay.

26 Ini nga tawo nagkadto sa duta sang mga Hethanon, kag nagpatindog didto sing isa ka siyudad, kag ginhingalanan ini Lus. Amo man gihapon ang ngalan sini.

Ang mga Tawo nga Wala Gintabog sang mga Israelinhon

27 Ang tribo ni Manases wala magtabog sang mga tawo nga nagapuyo sa mga siyudad sang Betsean, Taanak, Dor, Ibleam, Megido, kag sang kaingod nila nga mga banwa. Ang mga Canaanhon nagpadayon sa pagpuyo didto.

28 Sang magbakod na ang mga Israelinhon, ginpilit nila ang mga Canaanhon sa pagtrabaho para sa ila, pero wala nag id nila pagtabuga sila tanan.

29 Ang tribo ni Epraim wala magtabog sang mga Canaanhon nga nagapuyo sa siyudad sang Geser, gani nagpadayon sa pagpuyo didto ang mga Canaanhon upod sa ila.

30 Ang tribo ni Sabulon wala magtabog sang mga tawo nga nagapuyo sa mga siyudad sang Kitron kag Nahalol. Nagpuyo ang mga Canaanhon upod sa ila, kag ginpatrabaho sing pilit para sa ila.

31 Ang tribo ni Aser wala magtabog sang mga tawo nga nagapuyo sa mga siyudad sang Ako, Sidon, Alab, Asib, Helba, Apek, kag Rehob.

32 Ang mga kaanakan ni Aser nagpuyo upod sa mga Canaanhon sa sadto nga duog, tungod kay wala sila matabog.

33 Ang tribo ni Neftali wala magtabog sang mga tawo nga nagapuyo sa mga siyudad sang Betsemes kag Bet-anat. Nagpuyo sila upod sa mga Canaanhon sa sadto nga duog, pero ginpatrabaho nila sila sing pilit para sa ila.

34 Ginsubol sang mga Amornon ang tribo ni Dan pakadto sa kabakuloran, kag wala nila sila pagtugoti sa pagdulhog sa kapatagan.

35 Ang mga Amornon nagpadayon sa pagpuyo sa mga Kabukiran sang Heres, Ayalon, Saalbim, pero ang tribo ni Jose naggahom sa ila, kag ginpatrabaho sila para sa ila.

36 Ang dulonan sang mga Amornon^e nagasugod sa Taklaran sang Akrabim halin sa Sela pa ibabaw.

^aSa iban nga dumaan nga pagbadbad ginbuyok sia ni Otniel; sa Hebreo ginbuyok niya si Otniel.
^bSa iban nga dumaan nga pagbadbad Amalekanhon; sa Hebreo katawuhan.
^cHORMA: Ini nga ngalan sa Hebreo nagakahulogan "kalaglagan."
^dAng isa ka dumaan nga pagbadbad Wala nila gin-agaw; sa Hebreo Kag gin-agaw nila.

^eAmornon; ang isa ka dumaan nga pagbadbad Edomnon. 

JOSUE - Kapitulo 24 <<<   >>> MGA HUKOM - Kapitulo 2