1 SAMUEL - Kapitulo 1

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 

○○○○○

Si Elcana kag ang Iya Panimalay sa Silo

1 May isa ka tawo gikan sa tribo ni Efraim nga ginahingalanan kay Elcana, nga nagapuyo sa banwa sang Rama, sa kabakuloran sang Efraim. Anak sia ni Jeroham, kag apo ni Elihu, sa panimalay ni Tohu, sa kabaranggayan ni Sop.

2 Si Elcana may duha ka asawa, si Ana kag si Penina. Si Penina may mga kabataan, pero si Ana iya wala.

3 Tagsa ka tuig si Elcana nagakadto sa Silo halin sa iya banwa sa pagsimba kag sa pagdulot sing mga halad sa GINOO nga Makakagahom, sa diin si Opni kag si Pines nga mga anak ni Eli amo ang mga pari sang GINOO.

4 Sa tagsa ka pagdulot ni Elcana sang iya halad, ginapartihan niya si Penina kag ang tagsa niya ka anak.

5 Pero si Ana iya ginahatagan sang pinasahi nga parti kay iya gid sia ginahigugma, bisan ang GINOO naghimo sa iya nga baw-as.

6 Ginapaugtas kag ginapakahuy-an sia ni Penina nga iya ribal kay ang GINOO naghimo sa iya nga baw-as.

7 Amo ini ang nagakahanabo tuigtuig: kon sila magkadto sa balay sang GINOO, si Penina nagapalisod kay Ana sa bagay nga nagahibi sia kag indi na magkaon.

8 Ang iya bana nga si Elcana nagapamangkot sa iya, “Ana, ngaa nagahibi ka? Ngaa indi ka magkaon? Ngaa pirme ka lang nagapangasubo? Indi bala nga ako labi pa sa imo sang sa napulo ka mga anak nga lalaki?”

Si Ana kag si Eli

9 Isa sadto ka tion sa Silo, sang makatapos sila kaon, si Ana nagtindog. Si Eli nga pari nagalingkod sa iya lugar sa puwertahan sang templo sang GINOO.

10 Si Ana natublag gid kag naghilibion nga nagpangamuyo sa GINOO.

11 Nagpanumpa sia sa GINOO nga nagasiling, “O GINOO nga Makagagahom, tamda ang imo alagad! Tan-awa ang akon pag-antos kag dumdoma ako! Indi ako pagkalimti! Kon hatagan mo ako sing anak nga lalaki, nagasaad ako nga ihalad ko sia sa imo sa bug-os niya nga kabuhi, kag indi gid sia pagpaguntingan sang iya buhok.”^a

12 Nagpadayon si Ana sa pagpangamuyo sa GINOO sing malawig nga tion, kag si Eli nagabantay sang iya mga bibig.

13 Nagapangamuyo sia sing mahipos, kag bisan ang iya mga bibig nagahulag, pero indi mabatian ang iya tingog. Gani si Eli naghunahona nga sia hubog

14 kag nagsiling sa iya, “Indi ka maghinubog! Untati ang pag-inom agod maumpawan ka!”

15 Nagsabat sia, “Indi ako hubog, sir. Wala ako nakainom! Daku gid ang akon kalisod, kag nagapangamuyo ako kag nagasugid sang akon balatyagon sa GINOO.

16 Indi ka maghunahona nga ako isa ka talamayon nga babayi. Nagapangamuyo ako subong sini kay puno ako sing kalisod.”

17 Nagsiling si Eli, “Lakat ka kag indi na magpalibog. Kabay nga ang Dios sang Israel maghatag sang imo ginapangayo.”

18 Nagsabat sia, “Kabay nga magmaluloy-on ka pirme sa akon.” Gani naglakat sia kag nagkaon nga wala na nagapangasubo.

Ang Pagkatawo kag ang Paghalad kay Samuel

19 Sang madason nga adlaw si Elcana kag ang iya panimalay nagbangon sing aga pa gid kag nagsimba sa GINOO. Dayon nagpauli sila sa Rama. Si Elcana naghiusa sa iya asawa nga si Ana, kag ang GINOO nagsabat sang pangamuyo ni Ana.

20 Gani nagbusong sia kag nag-anak sang isa ka bata nga lalaki. Ginhingalanan niya ang iya bata kay Samuel^b kay siling niya, “Ginpangayo ko sia sa GINOO.”

21 Si Elcana kag ang iya panimalay nagkadto sa Silo kag nagdulot sang tuigan kag pinasahi nga halad nga iya ginsaad,

22 pero si Ana wala mag-upod. Nagsiling sia sa iya bana, “Sa tapos malutas ang bata, dalhon ko sia sa balay sang GINOO, sa diin magapabilin sia sa bug-os niya nga kabuhi.”

23 Nagsabat si Elcana, “Himoa ang ginahunahona mo nga labing maayo, kag magapabilin ka diri sa balay tubtob malutas ang bata. Kabay nga itugot sang GINOO nga matuman ang imo saad.” Gani si Ana nagpabilin sa balay kag nag-atipan sang iya bata.

24 Sang malutas na niya ang bata, gindala niya sia sa Silo, kag may dala man sia sang tinday nga baka nga tatlo ka tuig ang edad, isa ka sako nga arina, kag isa ka sulodlan nga panit nga puno sang bino. Samtang diutay pa ang bata, gindala niya sia sa balay sang GINOO sa Silo.

25 Gin-ihaw nila ang tinday nga baka kag gindala ang bata kay Eli.

26 Si Ana nagsiling sa iya, “Sir, nadumdoman mo pa bala ako? Ako ang babayi nga imo anay nakita nga nagatindog diri, nga nagapangamuyo sa GINOO.

27 Nagpangayo ako sa iya sini nga bata, kag ginhatag niya ang akon ginpangayo.

28 Gani ginahalad ko sia sa GINOO. Tubtob nga sia nagakabuhi mangin-iya sia sang GINOO.” Dayon nagsimba sila didto sa GINOO.


^aINDI GID SIA PAGPAGUNTINGAN SANG IYA BUHOK: Isa ini ka tanda sang paghalad sa GINOO (tan-awa ang Num. 6:5).
^bSAMUEL: Ini nga ngalan sa Hebreo nagakahulogan "ngalan sang Dios." Ginagamit ini diri nga may kaangtanan sa Hebreo nga pulong nga "pangayo."

RUT - Kapitulo 4 <<<   >>> 1 SAMUEL - Kapitulo 2