○○○○○
Si Goliat Naghangkat sa mga Israelinhon
1 Ang mga Filistinhon nagtipon para sa inaway sa Soko, isa ka banwa sang Juda. Naghimo sila sang ila kampamento sa duog nga ginatawag Dugoon nga Dulonan, sa gin-utlan sang Soko kag Aseka.2 Si Saul kag ang mga Israelinhon nagtipon sing tingob kag naghimo sang ila kampamento sa kapatagan sang Ela, sa diin naghanda sila sa pagpakig-away sa mga Filistinhon.
3 Ang mga Filistinhon nagkubay sa pihak nga bakulod kag ang mga Israelinhon sa pihak man nga bakulod, kag may patag sa ulot nila.
4 Ang isa ka tawo nga ginahingalanan kay Goliat, taga-siyudad sang Gat, naggwa sa kampamento sang mga Filistinhon nga naghangkat sa mga Israelinhon. Ang iya kataason siyam ka tapak,
5 kag nagakalo sang helmet nga saway kag nagagamit sang panagang sa dughan nga saway nga nagabug-at sing sobra sa 55 ka kilo.
6 Ang iya mga paa kag batiis may hapin nga saway kag nagaumbilay sing saway nga sumbiling.
7 Ang iya bangkaw subong kadaku sang balayan sang tiral, kag ang iya sini punta nga salsalon nagabug-at sing mga pito ka kilo. May nagauna sa iya nga soldado nga nagadala sang iya taming.
8 Si Goliat nagtindog kag nagsinggit sa mga Israelinhon, "Mga ulipon ni Saul, ano ang inyo ginahimo dira? Nagakubay bala kamo sa pagpakig-away? Isa ako ka Filistinhon! Pili kamo sang isa ka tawo nga amo ang magapakig-away sa akon.
9 Kon magdaog sia kag mapatay niya ako, kami mangin-inyo mga ulipon, pero kon ako ang magadaog kag mapatay ko sia, kamo mangin-ulipon namon.”
10 Nagsiling pa gid sia, “Karon ginahangkat ko ang mga hangaway sang Israel nga magpili kamo sang isa nga magaaway sa akon!"
11 Sang pagkabati sini ni Saul kag sang iya mga soldado, hinadlukan gid sila.
Si David sa Kampamento ni Saul
12 Si David anak nga lalaki ni Jese, nga Epratanhon sang Betlehem sa Juda. Si Jese may walo ka mga anak nga lalaki, kag sang si Saul amo ang hari, tigulang na gid sia kaayo.13 Ang iya tatlo ka mga anak nga lalaki nga magulang nag-upod kay Saul sa inaway. Ang kamagulangan ginhingalanan kay Eliab, ang ikaduha amo si Abinadab, kag ang ikatlo si Sama.
14 Si David amo ang kamanghuran, kag samtang ang tatlo ka mga magulang nagaupod kay Saul,
15 si David nagapulopauli sa Betlehem halin sa kampamento ni Saul sa pagtatap sang karnero sang iya amay.
16 Si Goliat naghangkat sang mga Israelinhon kada aga kag kada hapon sa sulod sang 40 ka adlaw.
17 Isa ka adlaw si Jese nagsiling kay David, "Dala ka sining tunga sa sako nga sinanlag nga uyas kag sining napulo ka bilog nga tinapay, kag dalidali sa pagdala sini sa imo mga utod didto sa kampamento.
18 Dalha man ining napulo ka mga keso sa pangulo sang mga hangaway. Tan-awa ang imo mga utod kon maanuano sila, kag magdala ka sang imo pamatuod nga nakita mo sila kag maayo man ang ila kahimtangan.
19 Si Haring Saul, ang imo mga utod, kag ang iban nga mga Israelinhon yadto didto sa kapatagan sang Ela nga nagapakig-away sa mga Filistinhon."
20 Sang madason nga adlaw aga pa gid nagbangon si David, ginbilin niya ang mga karnero sa isa ka manugbantay, gindala niya ang pagkaon kag naglakat suno sa ginsiling sa iya ni Jese. Sang pag-abot niya sa kampamento nagapagwa gid ang mga Israelinhon sa pagpakig-away nga nagasinggit.
21 Ang mga hangaway sang mga Filistinhon kag sang mga Israelinhon yara sa ila mga duog nga nagaatubangay nga handa sa pag-away.
22 Ginbilin ni David ang pagkaon sa isa ka opisyal nga gintugyanan sini, nagdalagan didto sa ginaawayan, nagpalapit sa iya mga utod kag nagpamangkot kon maanuano man sila.
23 Sang nagahambal pa sia sa ila, nag-abanse si Goliat kag naghangkat sa mga Israelinhon, subong sang iya ginhimo sang una, kag nabatian ini ni David.
24 Sang makita sang mga Israelinhon si Goliat nagdalagan sila tungod sa kahadlok.
25 Nagsinilingay sila, "Tan-awa ninyo ining tawo nga nagahangkat sa Israel! Ang bisan sin-o nga makapatay sa iya, pagahatagan sang hari sing daku nga manggad, ipaasawa sa iya ang anak sang hari, kag indi pagpabayaron ang panimalay sang iya amay sa tanan nga mga buhis."
26 Ginpamangkot ni David ang mga lalaki sa luyo niya, "Ano ang mabaton sang makapatay sa sining Filistinhon kag makahilway sang Israel sa sining kahuloy-an? Kon sa bagay sin-o gid bala ining indi diosnon nga Filistinhon nga naghangkat sang mga hangaway sang Dios nga buhi?"
27 Ginsugid nila sa iya ang pagahimuon sa tawo nga makapatay kay Goliat.
28 Si Eliab, ang kamagulangan nga utod ni David nakabati sa iya nga nagapakighambal sa mga tawo. Naakig gid sia kay David kag nagsiling, "Ano ang imo ginahimo diri? Sin-o ang nagabantay sang imo mga karnero didto sa kawayangan? Kahambog sa imo kag daw makasarang gid! Nahibal-an ko nga nagkari ka lang sa pagtan-aw sang inaway!"
29 Nagsabat si David, "Ano bala ang akon nahimo? Nagapamangkot man lang ako!"
30 Nagliso sia kag nagpamangkot sa iban pa gid nga mga tawo sing amo man gihapon nga pamangkot, kag ang tagsatagsa nagsabat sa iya sang amo man gihapon nga sabat.
31 Ang iban nga mga tawo nakabati sang ginsiling ni David kag ginsugiran nila si Saul, gani ginpatawag sia ni Saul.
32 Si David nagsiling kay Saul, "Mahal nga hari, wala sing isa nga dapat magkahadlok sini nga Filistinhon! Ako ang magapakig-away sa iya.”
33 Nagsabat si Saul, "Indi ka makasarang sa pag-away sa iya! Bata pa ikaw, kag sia dugay na nanginsoldado!”
34 Nagsabat si David, "Mahal nga hari, nagabantay ako sang mga karnero sang akon amay. Sa tagsa ka tion nga ang leon kag ang oso magtaban sang kordero,
35 ginalagas ko ini, ginalampusan ko, kag ginaluwas ang kordero. Kag kon ang leon ukon oso magliso sa pagbato sa akon, ginadakop ko ini sa bungot kag ginalampusan tubtob mapatay.
36 Nakapatay ako sang mga leon kag mga oso, kag himuon ko man ini sa sining indi diosnon nga Filistinhon, nga naghangkat sa mga hangaway sang Dios nga buhi.
37 Ang Ginoo nagluwas sa akon sa mga leon kag mga oso kag magaluwas man sia sa akon sa sini nga Filistinhon.” Nagsabat si Saul, "Sigi, lakat kag ang Ginoo magaupod sa imo.”
38 Ginpasuksok niya kay David ang iya bayu, ginpakaluan niya sing helmet nga saway, kag ginhatagan sing panagang sa dughan.
39 Gintaklos ni David ang espada ni Saul kag nagtilaw sa paglakat, pero indi sia makalakat kay wala sia maanad sa paggamit sini. Nagsiling sia kay Saul, "Indi ako makaaway paagi sa paggamit sini. Wala ako maanad sini." Gani ginpanghukas niya ini tanan.
40 Ginkuha niya ang iya sungkod, kag dayon nagpulot sia sing lima ka matipulon nga bato sa sapa kag ginsulod ini sa iya puyo. Naglakat sia nga handa na sa iya kamot ang iya labyog sa pagpakig-away kay Goliat.
Ginlutos ni David si Goliat
41 Ang Filistinhon nag-abanse pakadto kay David, nga nagauna sa iya ang iya manugdala sing taming. Nagpadayon sia sa pag-abanse,42 kag sang mamulalongan niya si David, ginhikayan niya sia, kay bata pa sia kag guwapo lang tulokon.
43 Nagsiling sia kay David, "Para sa ano bala inang imo sungkod? Ano bala ang dumdom mo sa akon, ido?" Kag ginpakamalaut niya si David paagi sa iya dios.
44 Ginsingganan niya si David, ''Sigi palapit, kay ihatag ko ang imo lawas nga kalan-on sang mga pispis kag sang mga sapat."
45 Nagsabat si David, "Nagapalapit ka sa pagpakig-away sa akon nga may espada, bangkaw kag sumbiling, pero ako nagapalapit sa pagpakig-away sa imo sa ngalan sang Ginoo nga Makagagahom, ang dios sang mga hangaway nga Israelinhon, nga imo ginahangkat.
46 Sa sini gid nga adlaw ang Ginoo magatugyan sa imo sa akon kamot. Lutoson ko ikaw, utdon ko ang imo ulo, kag ihatag ko ang mga lawas sang mga soldado nga mga Filistinhon nga manginkalan-on sa mga pispis kag mga sapat. Ang bug-os nga pungsod magakilala nga ang Israel may Dios,
47 kag ang tanan diri makahibalo nga wala sia nagakinahanglan sang mga espada ukon mga bangkaw sa pagluwas sang iya mga tawo. Madinalag-on sia sa inaway kag itugyan niya kamo tanan sa idalom sang amon gahom."
48 Sa liwat nagsugod si Goliat sa pagpalapit kay David, kag si David maabtik nga dumalagan padulong sa Filistinhon sa pag-away sa iya.
49 Nagkuot si David sa iya puyo kag nagkuha sing isa ka bilog nga bato, kag iya ginlabyog ini kay Goliat. Nag-igo ini sa iya agtang kag nagdulot. Si Goliat natumba nga hapaon sa duta.
50 Gani, si David nga wala sing espada kundi labyog lamang kag isa ka bilog nga bato, naglutos kag nagpatay kay Goliat!
51 Nagdalagan si David pakadto sa iya, nagtungtong sa iya, gingabot niya ang espada ni Goliat, ginpunggol ang iya ulo sa pagpatay sa iya. Sang makita sang mga Filistinhon nga ang ila ginasaligan patay na, nagpalagyo sila.
52 Ang mga hangaway sang Israel kag Juda nagsinggit kag naglagas sa ila tubtob sa Gatj kag sa puwerta sang Ecron. Ang mga Filistinhon nagkalapukan nga napilasan sa dalanon halin sa Saarim tubtob sa Gat kag Ecron.
53 Ang mga Israelinhon nagbalik halin sa paglagas sa mga Filistinhon kag gin-ati nila ang kampamento sang mga Filistinhon,
54 Ginkuha ni David ang ulo ni Goliat kag gindala sa Jerusalem, pero gintago niya sa iya tolda ang mga hinganiban ni Goliat.
Si David Ginpakilala kay Saul
55 Sang makita ni Saul si David nga naggwa sa pag-away kay Goliat, nagpamangkot sia kay Abner, ang heneral sang iya mga hangaway, “Abner, sin-o inang bata nga lalaki?" Nagsabat si Abner, “Mahal nga hari, wala ako makakilala.”56 Nagsiling si Saul, "Lakat ka, kag pamangkuton kon kay sin-o sia anak."
57 Gani sang magbalik si David sa kampamento sa tapos mapatay niya si Goliat, gindala sia ni Abner sa kay Saul. Nagadala pa si David sang ulo ni Goliat.
58 Nagpamangkot si Saul sa iya, “Toto, sin-o ka bala?" Nagsabat si David, "Anak ako sang imo suloguon nga si Jese sang Betlehem.”
jAng isa ka dumaan nga pagbadbad Gat; sa Hebreo isa ka patag.
No comments:
Post a Comment