●●●●●
Si David Ginhimo nga Hari sang Israel kag sang Juda
(1 Cron. 11:1-9; 14:1-7)
1 Karon ang bug-os nga tribo sang Israel nagkadto kay David sa Hebron kag nagsiling sa iya, “Mga kasimanwa mo kami.2 Sang una sang si Saul ang amon hari, ikaw ang nagpangulo sang mga tawo sang Israel sa inaway. Kag ang Ginoo nagsiling sa imo nga ikaw ang magapangulo sang iya mga tawo kag mangin-ila manugdumala.”
3 Gani ang tanan nga mga pangulo sang Israel nagkadto kay Haring David sa Hebron. Naghimo sia sing kasugtanan sa ila, kag ginhaplas nila sia nga hari sang Israel.
4 Si David nagaedad sing 30 ka tuig sang iya paghari kag naggahom sia sa sulod sing 40 ka tuig.
5 Didto sa Hebron naghari sia sa bug-os nga Juda sa sulod sang pito ka tuig kag tunga, kag sa Jerusalem sa bug-os nga Israel kag Juda sa sulod sang 33 ka tuig.
6 Si Haring David kag ang iya mga tinawo nagsalakay sa Jerusalem. Ang mga Jebusnon nga nagapuyo didto naghunahona nga si David indi sarang makaagaw sang siyudad. Gani nagsiling sila sa iya, “Indi gid ikaw makasulod diri; bisan ang mga bulag kag ang mga piang sarang makatabog sa imo.”
7 (Pero gin-agaw ni David ang pamakod sang Sion, kag nangin-siyudad ini ni David.)
8 Sa sadto nga adlaw si David nagsiling sa iya mga tinawo, “May yari bala diri nga nagadumot sa mga Jebusnon, subong sang akon pagdumot kag handom sa pagpatay sa ila? Magkadto sia sa kanal nga ginaagyan sang tubig kag salakayon ining makalulooy nga mga bulag kag mga piang.” (Amo ina nga ginasiling nga ang mga bulag kag mga piang indi makasulod sa balay sang Ginoo.)
9 Sa tapos maagaw ni David ang pamakod, nagpuyo sia didto kag gintawag niya ini nga “Siyudad ni David.” Ginpatindugan niya sing mga pader ang palibot sini nga nagalambot halin sa Milo tubtob sa palasyo.
10 Naggamhanan sia nga naggamhanan, kay ang Ginoong Dios nga Makagagahom nagaupod sa iya.
11 Si Hiram nga hari sang Tiro nagpadala sing mga tiglawas kay David; ginpadalhan sia sing mga tablon nga sedro, mga panday kag mga kantero sa pagpatindog sang iya palasyo.
12 Gani si David nakatalupangod nga ang GINOO nagpalig-on sa iya subong nga hari sa Israel, kag nagpauswag sang iya ginharian tungod sang iya mga tawo nga Israel.
13 Sa tapos sia makahalin sa Hebron, si David nagkuha sing madamo pa nga mga babayi kag mga asawa halin sa Jerusalem, kag nagdamo pa ang iya mga anak nga lalaki kag mga anak nga babayi.
14 Ang mga anak nga natawo sa iya sa Jerusalem amo sanday Samua, Sobab, Natan, Salomon,
15 Ibhar, Elisua, Nefeg, Jafia,
16 Elisama, Eliada, kag Elifelet.
Ang Pagdaog Batok sa mga Filistinhon
(1 Cron. 14:8-17)
17 Ang mga Filistinhon nakabati nga si David nanginhari sa Israel, gani naggwa sila tanan sa pagdakop sa iya. Sang pagkabati sini ni David nagpanago sia sa pamakod.18 Ang mga Filistinhon nag-abot sa Kapatagan sang mga Refaim kag gin-agaw ini.
19 Si David nagpamangkot sa Ginoo, "Malakat bala ako sa pagpakig-away sa mga Filistinhon? Padag-on mo bala ako?” Ang Ginoo nagsabat, "Lakat ka, padag-on ko ikaw.”
20 Gani si David nagkadto sa Baal Perazim kag ginlutos ang mga Filistinhon didto. Nagsiling sia, "Ang GINOO nagbulwang sang akon mga kaaway subong sang isa ka baha." Gani yadto nga duog gintawag nga Baal Perazim.e
21 Ginbayaan sang mga Filistinhon ang ila mga diosdios didto, kag gindala ini ni David kag sang iya mga tinawo.
22 Dayon ang mga Filistinhon nagbalik sa Kapatagan sang Refaim kag gin-agaw ini liwat.
23 Sa liwat ginpamangkot ni David ang GINOO kag ang Ginoo nagsabat, “Indi sila pagsalakaya halin diri, kundi libot ka kag salakaya sila sa likod malapit sa mga kahoy nga balsamo.
24 Kon imo mabatian ang pagmartsa sa ibabaw sang mga kahoy, maghanda ka sa pagsalakay, kay ina nagakahulogan nga nag-una ako sa imo sa paglutos sang mga hangaway sang mga Filistinhon.”
25 Ginhimo ni David ang ginsiling sang Ginoo, kag gintabog niya ang mga Filistinhon halin sa Geba tubtob sa Gezer.
eBAAL PERAZIM: Ini nga ngalan sa Hebreo nagakahulogan "GINOO sang pagbulwang."
No comments:
Post a Comment