●●●●●
Si Isboset Ginpatay
1 Sang pagkabati ni Isboset, nga anak ni Saul nga si Abner ginpatay sa Hebron, hinadlukan sia, kag ang tanan nga mga tawo sang Israel natublag.2 Si Isboset may duha ka opisyales nga nagpangulo sa pagsalakay, nga amo sanday Baana kag Recab, mga anak nga lalaki ni Rimon nga taga-Beerot nga nagikan sa tribo ni Benjamin. (Ang Beerot sakop sang Benjamin.
3 Ang mga tumandok nga nagapuyo didto nagpalagyo sa Gitaim sa diin nagpuyo sila subong mga dumoluong tubtob karon.)
4 Si Jonatan nga anak ni Saul may anak nga lalaki nga ginhingalanan kay Mefiboset. Nagaedad sia sing lima ka tuig sang si Saul kag si Jonatan napatay. Sang nag-abot ang balita nahanungod sang ila kamatayon halin sa Jezreel, ang iya yaya naghakwat sa iya kag nagpalagyo; pero sa iya pagdalidali nabuy-an niya sia kag napiang.
5 Si Recab kag si Baana nagkadto sa balay ni Isboset, kag nag-abot didto sila sang udto samtang nagapahuway si Isboset.
6 Ang babayi nga yara sa puwerta gintuyo samtang nagapahangin sia sang trigo kag natulogan sia, gani si Recab kag si Baana nagsulod nga wala mahibaloi.d
7 Sang didto na sila sa sulod nagkadto sila sa kuwarto ni Isboset, sa diin nagakatulog sia sing mahamuok kag ginpatay sia. Dayon ginpunggolan nila sia sing ulo, gindala nila ini, kag naglakat sila sa bug-os nga gab-i paagi sa kapatagan sang Jordan.
8 Ginhatag nila ang ulo kay Haring David didto sa Hebron kag nagsiling sa iya, "Yari ang ulo ni Isboset nga anak sang imo kaaway nga si Saul nga nagtinguha sa pagpatay sa imo. Karon Mahal nga Hari, ang Ginoo nagtimalos sa kay Saul kag sa iya mga kaliwat tungod sa imo.”
9 Si David nagsabat sa ila, "Ginasumpa ko sa Ginoo nga buhi, nga nagluwas sa akon sa tanan nga mga katalagman!
10 Ang tawo nga nagkadto sa akon sa Ziklag kag nagsugid sa akon sang pagkapatay ni Saul, naghunahona nga nagdala sia sang maayo nga balita. Ginpadakop ko sia kag ginpapatay. Amo yadto ang balos nga ginhatag ko sa iya tungod sang balita!
11 Daw ano pa gid ayhan kalain ang madangatan sang malaut nga mga nagpatay sang isa ka tawo nga wala sing sala kag nagakatulog sa iya kaugalingon nga balay! Karon magatimalos ako sa inyo tungod sang pagpatay sa iya kag dulaon ko kamo sa duta!”
12 Nagsugo si David sa iya mga soldado sa pagpatay kay Recab kag kay Baana, kag gin-utod ang ila mga kamot kag mga tiil, nga ila ginpakabit malapit sa punong sa Hebron. Ginkuha nila ang ulo ni Isboset kag ginlubong ini sa lulobngan ni Abner didto sa Hebron.
dAng bersikulo 6 nagasunod sang isa ka dumaan nga pagbadbad; sa Hebreo Nagsulod sila sa balay nga nagadala sing trigo kag ginbuno sia sa tiyan. Dayon si Recab kag ang iya utod nga si Baana nagpalagyo.
No comments:
Post a Comment