●●●●●
Si Amon kag si Tamar
1 Si Absalom nga anak ni David may matahom nga utod nga babayi nga ginahingalanan kay Tamar. Ang isa sang mga anak nga lalaki ni David nga si Amnon naluyag kay Tamar.2 Sa daku niya nga paghigugma nagmasakit sia. Naghunahona sia nga daw indi mahimo nga maangkon niya si Tamar kay ulay sia.
3 Pero may abyan sia nga tama ka tuso nga ginahingalanan kay Jonadab, anak sang utod ni David nga si Sama.
4 Si Jonadab nagsiling sa iya, "Anak ikaw sang hari, pero kada adlaw makita ko ikaw nga nagapangasubo. Ano bala ang kabangdanan?" Nagsabat sia, "Naluyag gid ako kay Tamar, ang utod sang akon utod sa amay nga si Absalom.”
5 Si Jonadab nagsiling sa iya, "Maghigda ka kag magpamulomasakit. Kon ang imo amay magduaw sa imo, singgana sia, ‘Kon mahimo pakadtoa ang akon utod nga si Tamar kag sia magpakaon sa akon. Luyag ko nga diri sia magluto sing pagkaon agod makita ko sia, kag dayon sia gid ang maghungit sa akon.'"
6 Gani naghigda si Amnon kag nagpamulomasakit. Si Haring David nagduaw sa iya, kag si Amnon nagsiling sa iya, "Kon mahimo pakadtoa diri si Tamar kag magluto sing tinapay sa diin makita ko sia, kag sia gid ang maghungit sa akon."
7 Gani si David nagpahibalo kay Tamar sa palasyo, "Kadtoi si Amnon sa iya balay kag lutoi sia sing pagkaon."
8 Nagkadto si Tamar didto kag nakita niya si Amnon nga nagahigda. Nagkuha sia sing arina, ginlamas ini, kag naghimo sing pila ka bilog nga tinapay sa diin makita sia ni Amnon. Dayon nagluto sia sing pila ka bilog nga tinapay,
9 kag ginbak-it niya ini sa kalaha kag ginpakaon kay Amnon, pero indi sia magkaon. Nagsiling sia, “Pagwaa sila tanan" kag tanan sila naggwa.
10 Dayon nagsiling sia sa iya, "Dalha diri ang tinapay sa akon katre kag hungita ako." Gindala niya ang tinapay kay Amnon.
11 Samtang ginahungit niya si Amnon, ginhakos sia ni Amnon kag nagsiling, "Dali, hulid ka sa akon!”
12 Nagsiling si Tamar, "Indi, indi ako paglugosa! Makahuloya ini! Indi ka maghimo sining malaw-ay nga butang!
13 Ano nga guya ang akon ipakita sa mga tawo? Kag ikaw, mahuy-an gid sa Israel. Kon mahimo hambala ang hari, kag siguro gid nga ihatag niya ako sa imo."
14 Pero indi si Amnon magpamati sa iya; kag tungod kay makusog sia sa iya, ginlugos niya sia.
15 Sa tapos sini si Amnon nainit gid sa iya; ang iya kaakig karon sobra pa sa iya gugma sang una, kag gintabog niya si Tamar.
16 Nagsiling si Tamar sa iya, "Indi mahimo, ang imo pagtabog sa akon daku pa, nga sala sang sa imo ginhimo sa akon!” Pero si Amnon indi magpamati sa iya;
17 gintawag niya ang iya suloguon kag nagsiling, "Ipahilayo ini nga babayi sa akon! Pagwaa sia kag siraduhi ang puwertahan!”
18 Ang suloguon nagpagwa kay Tamar kag ginsirahan niya ang puwertahan. Si Tamar nagabayu sing malaba nga may malaba nga pako,q ang bayu nga ginasuksok sang mga prinsesa nga wala pa sing bana sa sadto nga mga panahon.
19 Ginsabwagan niya sing abo ang iya ulo, gingisi ang iya malaba nga bayu, kag gintabunan niya ang iya guya sang iya kamot kag naglakat nga nagahibi.
20 Ang iya utod nga si Absalom nagpamangkot sa iya, "May malain bala nga ginhimo si Amnon sa imo? Indi pag-ipanugid ini, Tamar. Kon sa bagay imo sia utod sa amay. Indi ka lang magpangasubo.” Gani si Tamar nagpuyo nga masinulob-on kag isahanon sa balay ni Absalom.
21 Sang mabatian ni David ang nahanabo, nagpagot sia sa kaakig.
22 Gindumtan gid ni Absalom si Amnon tungod kay ginlugos niya ang iya utod nga si Tamar, kag wala na gid sia magpakighambal kay Amnon.
Nagtimalos si Absalom
23 Sang makaligad ang duha ka tuig si Absalom naggunting sang bulbol sang iya mga karnero sa Baal Hazor malapit sa banwa sang Efraim, kag gin-agda niya ang tanan nga mga anak nga lalaki sang hari sa pagkadto didto.24 Nagkadto sia sa kay Haring David kag nagsiling, "Mahal nga Hari, nagapagunting ako sang bulbol sang akon mga karnero. Makadto ka bala upod ang imo mga opisyales?"
25 Ang hari nagsabat, "Indi na lang, anak ko, mabudlayan pa ikaw kon tanan kami makadto didto.” Nagpamilit gid si Absalom, pero ang hari indi gid magpasugot kag ginpalakat sia.
26 Pero si Absalom nagsiling, “Ti, kon amo ina, pakadtoa bisan si Amnon na lang nga akon utod.” Ang hari nagpamangkot, “Ngaa bala pakadtuon gid sia?
27 Pero si Absalom nagpamilit gid tubtob nga si David nagpasugot nga pakadtuon si Amnon kag ang tanan niya nga mga anak nga lalaki upod kay Absalom. Si Absalom nag-aman sing bangkite nga bagay sa hari,
28 kag ginsingganan niya ang iya mga suloguon, “Bantayi ninyo nga kon hubog na si Amnon, masinyas ako sa inyo kag patyon ninyo sia. Indi kamo magkahadlok kay ako ang manabat sini. Magpakaisog kamo kag indi magduhadoha!"
29 Gani gintuman sang mga suloguon ang sugo ni Absalom kag ginpatay nila si Amnon. Dayon ang iban nga mga anak nga lalaki ni David nagsakay sa ila mga kabayo kag nagpalagyo.
30 Sang wala pa sila makaabot, nakabaton si David sing balita, "Ginpatay ni Absalom ang tanan mo nga mga anak nga lalaki kag wala gid sing nabilin sa iIa!"
31 Ang hari nagtindog, naggisi sang iya bayu sa pagpangalisod kag naghapa sa duta. Ang iya mga suloguon nga yadto didto naggisi man sang ila mga bayu.
32 Pero si Jonadab nga anak sang utod ni David nga si Sama nagsiling, “Mahal nga Hari, wala nila mapatay ang tanan mo nga mga anak, kundi si Amnon lang. Kay si Absalom nagpamat-od na sa paghimo sini halin pa sa paglugos ni Amnon sang iya utod nga si Tamar.
33 Gani indi ka magpati sang balita nga ang tanan nimo nga mga anak napatay; si Amnon lang ang napatay."
34 Sa pihak nga bahin si Absalom nagpalagyo. Sa amo man nga tion, ang soldado nga nagabantay nakakita sang madamo nga mga tawo nga nagapadulhog sa bakulod sa dalanon halin sa Horonaim. Nagkadto sia sa hari kag nagsugid sang iya nakita.
35 Nagsiling si Jonadab kay David, "Mga anak mo ina nga nagapakari, subong sang akon ginsiling."
36 Sa tapos sia makasiling sini, ang mga anak nga lalaki ni David nagsulod; naghinibi sila kag si David kag ang iya mga opisyales naghilibion sing tama gid.
37-38 Si Absalom nagpalagyo kag nagdangop sa hari sang Gesur nga si Talami nga anak ni Amihud, kag nagpabilin sia didto sing tatlo ka tuig. Si David naglalaw sing malawig tungod sang iya anak nga si Amnon;
39 pero sang maumpawan sia sa iya kasubo tungod sang pagkapatay ni Amnon, ginhidlaw gid sia kay Absalom.
qnagabayu sing malaba nga may malaba nga pako; ukon sing bayu nga may mga puni (tan-awa ang Gen. 37:30).
No comments:
Post a Comment