○○○○○
Ang Maisog nga Pagpasimpalad ni Jonatan
1 Isa ka adlaw si Jonatan nagsiling sa pamatan-on nga lalaki nga nagadala sang iya mga hinganiban, "Makadto kita sa kampamento sang mga Filistinhon." Pero wala pagsugiri ni Jonatan ang iya amay.2 Si Saul yadto sa iya kampamento sa idalom sang kahoy nga granada sa Migron, nga indi gid man malayo sa Gabaa kag may mga 600 ka mga tinawo nga nagaupod sa iya.
3 (Ang pari nga nagadala sang balaan nga kaban amo si Ahias, anak nga lalaki ni Ahitub, nga utod ni Ikabod, nga anak ni Pines, kag apo ni Eli, nga pari sang Ginoo sa Silo.) Ang mga tawo wala makahibalo nga si Jonatan naglakat.
4 Sa magtimbang nga kilid sang alagyan ni Jonatan pakadto sa kampamento sang mga Filistinhon may duha ka dalagku nga mga bato nga nagagasanggasang kag matalom. Ang isa ginatawag nga Boses, kag ang isa Sene.
5 Ang isa yara sa naaminhan nga kilid sang alagyan nga nagaatubang sa Mikmas, kag ang isa yara sa bagatnan nga kilid sang alagyan nga nagaatubang sa Geba.
6 Nagsiling si Jonatan sa pamatan-on nga lalaki, "Dali sudlon naton ang kampamento sining mga di-diosnon nga mga Filistinhon. Ayhan ang GINOO magabulig sa aton; kon sia magbulig, wala sing makapugong sa iya sa pagpadaog sa aton, bisan diutay lamang kita."
7 Nagsabat ang pamatan-on nga lalaki, "Himoa ang luyag mo. Magaupod ako sa imo.”
8 Nagsiling si Jonatan, “Dali, makadto kita didto kag magpakita sa ila.
9 Kon magsiling sila nga hulaton ta sila, mahulat lang kita.
10 Pero kon magsiling sila nga magpalapit kita, mapalapit kita dayon, kay amo ini ang tanda nga ang Ginoo naghatag sa aton sing pagdaog batok sa ila.”
11 Gani nagpakita sila sa mga Filistinhon kag ang mga Filistinhon nagsiling, "Tan-awa! Ang iban sang mga Hebreo naggwa sa mga buho nga ila ginapanaguan!"
12 Ang mga hangaway nga mga Filistinhon nagtawag kay Jonatan kag sa pamatan-on nga lalaki, "Taklad kamo diri! May isilingi kami sa inyo!" Nagsiling si Jonatan sa pamatan-on, "Sunod ka sa akon. Ang Ginoo naghatag sa Israel sing pagdaog batok sa ila."
13 Si Jonatan nagkamang pataklad, kag ang pamatan-on nga lalaki nagsunod sa iya. Gin-atake ni Jonatan ang mga Filistinhon kag nagkalapukan sila, kag ang pamatan-on nga lalaki nagpamatay sa ila.
14 Sa nahauna nila nga pagpamatay si Jonatan kag ang pamatan-on nagpatay sing mga 20 ka mga tawo sa duog nga may kalaparon nga duha ka libo ka metro kuwadrado.
15 Hinadlukan gid ang mga hangaway nga mga Filistinhon kag ang tanan nga mga tawo sa latagon. Ang mga gwardya kag ang grupo sang mga manug-atake sa kampamento ginkugmat. Ang duta nagkurog, kag nagsinalasala sila.
Ang Pagkalutos sang mga Filistinhon
16 Ang mga tinawo ni Saul nga nagabantay sa Gabaa, sa kadutaan sang mga Benjaminhon nakakita nga ang mga Filistinhon nagadinalagan nga nagasalasala.17 Gani si Saul nagsiling sa iya mga tinawo, "Isipa ninyo ang mga soldado kag tan-awa ninyo kon sin-o ang wala." Gintuman nila ini kag nasapwan nila nga si Jonatan kag ang pamatan-on nga lalaki nga nagadala sang iya mga hinganiban amo ang wala.
18 Dayon si Saul nagsiling kay Ahias nga pari, "Dalha diri ang balaan nga kaban" (kay sang una ang kaban nagauna sa mga tawo sang Israel).
19 Samtang nagahambal pa si Saul sa pari, ang pagkinagula sa kampamento sang mga Filistinhon nagadugang nga nagadugang, gani si Saul nagsiling sa iya, "Wala na sing tion sa pag-usisa kon ano ang Kabubot-on sang Ginoo!"
20 Dayon sia kag ang iya mga soldado nag-atake sa mga Filistinhon nga sa ila pagsinalasala nagainaway batok sa isa kag isa.
21 Ang iban nga mga Hebreo nga nagdampig sa mga Filistinhon, kag nag-upod sa ila sa kampamento, nagsaylo kag nagdampig kay Saul kag kay Jonatan.
22 Ang mga Israelinhon nga nagapanago sa mga bakulod sang Efraim nakabati nga ang mga Filistinhon nagpalagyo, gani nagbuylog sila sa pagsalakay sa mga Filistinhon.
23 Ang Ginoo nagluwas sa Israel sadto nga adlaw, kag ang pag-inaway naglambot tubtob sa unhan pa sang Betaben.
Ang mga Hitabo sa Tapos ang Inaway
24 Ang mga Israelinhon nagpalangluya tungod sa gutom sadto nga adlaw, tungod kay si Saul nagsumpa kag naghatag sing mando nga nagasiling, "Pakamalauton ang bisan sin-o nga magkaon karon nga adlaw sa wala pa ako makatimalos sa akon mga kaaway." Gani wala sing isa nga nagkaon sang bisan ano sa bilog nga adlaw.25 Tanan sila nagkadto sa kakahuyan kag nakakita sila sing madamo nga dugos.
26 May madamo nga dugos sa mga kakahuyan, pero wala gid sing isa nga nagkaon sini kay nahadlok sila sang pagpakamalaut ni Saul.
27 Pero si Jonatan wala makabati sang paandam nga may pagpakamalaut sang iya amay sa mga tawo, gani ginbayaw niya ang lipak nga iya ginadala, gintuslok ini sa balayan sang dugos, kag nagkaon sini. Sa gilayon nag-ayo ang iya pamatyag.
28 Pero ang isa sang mga tawo nagsiling, "Ang tanan maluya na sa gutom, pero ang imo amay nagpaandam sa amon nga pakamalauton ang bisan sin-o nga magkaon sang bisan ano karon nga adlaw."
29 Nagsabat si Jonatan, "Tama kalain ang ginhimo sang akon amay sa aton mga tawo! Tan-awa kon daw ano kaayo sang akon pamatyag tungod kay nakakaon ako sang dugos.
30 Daw ano pa gid ayhan kaayo kon ang mga tawo karon nga adlaw nagkaon sang mga pagkaon nga ila nakuha sang malutos nila ang mga kaaway. Daw ano pa gid ayhan kadamo nga mga Filistinhon ang ila napatay!”
31 Sa sadto nga adlaw ang mga Israelinhon naglutos sa mga Filistinhon halin sa Mikmas tubtob sa Ayalon. Ang mga Israelinhon tama kaluya sa gutom,
32 kag nagdinaguso sila sa pagkuha sang ila naagaw sa mga kaaway. Ginpanguha nila ang mga karnero, mga baka kag mga tinday, gin-ihaw nila didto gid mismo, kag ginkaon ang karne nga may dugo pa.
33 Ginsugiran nila si Saul sini, "Tan-awa, ang mga tawo nagapakasala batok sa GINOO sa pagkaon sang karne nga may dugo." Nagsinggit si Saul, "Mga traidor kamo. Paligid kamo sing daku nga bato pakadto diri sa akon."
34 Dayon nagmando sia, "Kadto kamo sa mga tawo kag singgani sila tanan nga dalhon nila ang ila mga baka kag mga karnero diri. Ihawon nila ini kag kaunon diri, kag indi magpakasala batok sa Ginoo paagi sa pagkaon sang karne nga may dugo pa." Gani sa sadto nga gab-i gindala nila tanan ang ila mga baka kag gin-ihaw didto.
35 Nagpatindog si Saul sing altar sa Ginoo. Amo ini ang nahauna nga altar nga iya ginpatindog.
36 Nagsiling si Saul sa iya mga tinawo, "Madulhog kita kag salakayon ang mga Filistinhon karon nga gab-i, atihon naton sila tubtob sa kaagahon, kag pamatyon naton sila tanan." Nagsabat sila,"Himoa ang labing maayo nga imo ginahunahona.” Pero ang pari nagsiling, "Mamangkot kita anay sa Dios."
37 Gani nagpamangkot si Saul sa Dios, "Salakayon ko bala ang mga Filistinhon? Padag-on mo bala kami?” Pero wala magsabat ang Dios sadto nga adlaw.
38 Dayon nagsiling si Saul sa mga pangulo sang mga tawo, "Palapit kamo diri kag usisaon naton kon ano nga sala ang aton nahimo karon nga adlaw.
39 Nagasaad ako sa buhi nga Ginoo, ang Manlulowas sang Israel, nga bisan pa si Jonatan nga akon anak ang may sala pagapatyon sia." Pero wala sing may nagsabat.
40 Dayon si Saul nagsiling sa ila, "Tanan kamo magtindog didto sa pihak, kag ako kag si Jonatan magatindog diri.” Nagsabat sila, "Himoa ang labing maayo nga imo ginahunahona."
41 Si Saul nagsiling sa Ginoo, ang Dios sang Israel, "O Ginoo, ngaa nga wala mo ako pagsabta karon nga adlaw? O Ginoo, Dios sang Israel, sabta ako paagi sa Urim kag sa Tumim. Kon ang sala akon ukon iya ni Jonatan, sabta ako sang Urim; pero kon iya sang imo mga tawo nga Israel, sabta ako sang Tumim." Ang sabat nagapakita nga ang sala yara sa kay Saul kag kay Jonatan, kag indi sa mga tawo.
42 Karon si Saul nagsiling, "Pat-ura paagi sa Urim kag Tumim kon sin-o sa amon ni Jonatan ang nakasala." Kag si Jonatan amo ang napilian.
43 Dayon ginpamangkot ni Saul si Jonatan, "Ano ang imo nahimo?" Nagsabat si Jonatan, "Nagkaon ako sing diutay nga dugos. Yari ako, handa ako nga mapatay.”
44 Nagsiling si Saul sa iya, "Kabay nga patyon ako sang Dios kon indi ikaw mapatay."
45 Pero ang mga tawo nagsiling kay Saul, "Pagapatyon bala si Jonatan nga amo ang naghatag sing daku nga pagdaog sa Israel? Indi mahimo! Nagasaad kami sa buhi nga Ginoo sang Israel nga wala sing bisan isa ka nahot sang iya buhok nga madula sa iya. Ang iya nahimo karon nga adlaw nahimo tungod sa bulig sang Dios." Gani ang mga tawo nagluwas kay Jonatan nga indi mapatay.
46 Nag-untat si Saul sa paglagas sang mga Filistinhon, kag nagbalik sila sa ila kaugalingon nga kadutaan.
Ang Paggahom ni Saul kag ang Iya Panimalay
47 Sa tapos nanginhari si Saul sang Israel, gin-away niya ang tanan niya nga kaaway sa tanan nga duog: ang mga tawo sang Moab, sang Amon, kag sang Edom, mga hari sa Soba, kag ang mga Filistinhon. Bisan diin sia nagapakig-away nagadaog sia.48 Nagpakig-away sia nga may kaisog, kag ginlutos ang mga Amaleknon. Ginluwas niya ang mga Israelinhon gikan sa tanan nga mga pagsalakay.
49 Ang mga anak nga lalaki ni Saul amo sanday Jonatan, Isyo, kag Malkisua. Ang magulang niya nga anak nga babayi amo si Merab, kag ang manghod si Mikal.
50 Ang iya asawa amo si Ahinoam, ang anak ni Ahimaas. Ang pangulo sang iya mga soldado amo si Abner nga iya pakaisa, anak nga lalaki sang iya tiyo nga si Ner.
51 Ang amay ni Saul nga si Cis kag si Ner nga amay ni Abner mga anak nga lalaki ni Abiel.
52 Sang buhi pa si Saul nagapakig-away sia nga may kaisog batok sa mga Filistinhon. Kon may makita sia nga ma bakod ukon maisog nga tawo ginapaentra niya sa iya soldado.
iisiling; ukon ipakita.
No comments:
Post a Comment