●●●●●
Si David Ginhimo nga Hari sang Juda
1 Sa tapos sini, si David nagpamangkot sa GINOO, "Makadto bala ako kag maggahom sa isa sang mga banwa sang Juda?” Nagsabat ang Ginoo, “Huo.” Nagpamangkot liwat si David, "Sa ano nga banwa?" Ang Ginoo nagsiling, "Sa Hebron.”2 Gani si David nagkadto sa Hebron upod ang iya duha ka asawa, si Ahinoam nga taga-Jezreel, kag si Abigail nga balo ni Nabal nga taga-Carmel.
3 Gindala man niya ang iya mga tinawo kag ang ila mga panimalay kag nagpuyo sila sa mga banwa sa palibot sang Hebron.
4 Dayon ang mga tawo sang Juda nagkadto sa Hebron kag naghaplas kay David subong hari sang Juda. Sang pagkabati ni David nga ang mga tawo sang Jabes sa Galaad naglubong kay Saul,
5 nagpadala sia sing pila ka mga tawo didto sa pagsiling, "Kabay nga ang Ginoo magbendisyon sa inyo tungod sang inyo pag-unong sa inyo hari paagi sa paglubong ninyo sa iya.
6 Kag karon kabay nga ang Ginoo magmaayo kag magmatutom sa inyo. Ako man manginmaayo sa inyo, tungod sang inyo ginhimo.
7 Magpakalig-on kag magpakaisog kamo! Si Saul nga inyo hari patay na, kag ang mga tawo sang Juda naghaplas sa akon subong ila hari."
Si Isboset Ginhimo nga Hari sa Israel
8 Si Abner nga anak ni Ner, nga pangulo sang mga soldado ni Saul, nakapalagyo upod kay Isboset nga anak ni Saul sa tabok sang Jordan pakadto sa Mahanaim.9 Didto ginhimo ni Abner si Isboset nga hari sa mga kadutaan sang Galaad, Aser,b Jezreel, Efraim, kag Benjamin, kag sa bug-os gid nga Israel.
10 Si Isboset nagaedad sang 40 ka tuig sang paghimo sa iya nga hari sang Israel, kag naghari sia sa sulod sang duha ka tuig. Pero ang tribo sang Juda nag-unong kay David,
11 kag naggahom sia sa ila sa Hebron sa sulod sang pito ka tuig kag tunga.
Ang Inaway sa Tunga sang Israel kag sang Juda
12 Si Abner kag ang mga opisyales ni Isboset nagkadto sa siyudad sang Gabaon halin sa Mahanaim.13 Si Joab nga anak ni Sarvia kag ang iban nga mga opisyales ni David nagkadto kag nagsugata sa ila didto sa punong, sa diin naglingkod sila tanan, ang isa ka grupo sa pihak sang punong kag ang isa sa pihak.
14 Si Abner nagsiling kay Joab, "Paawayon ta ang aton mga pamatan-on nga mga tinawo kon sin-o ang madaog.” Nagsabat si Joab, "Sigi."
15 Gani, ang dose ka mga tawo gikan sa grupo ni Isboset kag sang tribo ni Benjamin, nagpakig-away sa dose ka mga tinawo ni David.
16 Ang kadaisa sa ila nagdakop sang iya kontra sa ulo kag ginbuno sang iya espada ang kilid sang iya kontra sa bagay nga nagkalamatay sila tanan. Amo ina nga yadto nga duog sa Gabaon ginatawag nga "Latagon sang mga Espada."
17 Dayon may malapuyot nga inaway, kag si Abner kag ang mga Israelinhon ginlutos sang mga tinawo ni David.
18 Ang tatlo ka mga anak nga lalaki ni Sarvia yadto didto: sanday Joab, Abisai, kag si Asael. Si Asael nga madasig magdalagan subong sang usa,
19 naglagas kay Abner nga wala bulobalikid.
20 Si Abner nagbalikid kag nagpamangkot, "Asael, ikaw bala ina?” Nagsabat si Asael, "Huo."
21 Si Abner nagsiling, "Indi ako paglagsa, kundi ang isa lang sang mga soldado kag kuhaa ang tanan nga yara sa iya.” Pero si Asael nagpadayon sa paglagas sa iya.
22 Sa liwat si Abner nagsiling sa iya, "Indi ako paglagsa! Ngaa nga piliton mo ako sa pagpatay sa imo? Ano ang pag-atubang ko sa imo utod nga si Joab?"
23 Pero si Asael wala mag-untat sa paglagas; gani si Abner sa isa ka duso sang iya bangkaw nagbuno sa iya sa tiyan kag ang bangkaw naglapos sa iya likod. Si Asael naghaplak sa duta nga patay, kag ang tagsatagsa nga nagkadto sa amo nga duog sa diin sia nagahamyang, nagdulog kag nagtindog didto.
24 Pero si Joab kag si Abisai nagpangita kay Abner, kag sang pagtunod sang adlaw nakaabot sila sa bakulod sang Ama, sa sidlangan sang Gia sa dalanon pakadto sa desierto sang Gabaon.
25 Ang mga tawo gikan sa tribo ni Benjamin nagtipon liwat sa palibot ni Abner, kag nagtindog sila sa ibabaw sang bakulod.
26 Si Abner nagsinggit kay Joab, “Indi na gid bala mag-untat ang aton pag-inaway? Wala ka bala kahibalo nga sa katapusan wala kita sing makuha sini kundi pagdumtanay? Mga kasimanwa man lang kita. San-o mo pa bala pauntaton ang imo mga tinawo sa paglagas sa amon?”
27 Nagsabat si Joab, “Nagasumpa ako sa Dios nga buhi nga kon wala ka lang maghambal, ang akon mga tinawo magapadayon sa paglagas sa imo tubtob mag-aga.”
28 Dayon si Joab nagpatunog sang trumpeta, kag ang tanan niya nga mga tinawo nag-untat sa paglagas sa mga Israelinhon kag nag-untat ang inaway.
29 Si Abner kag ang iya mga tinawo naglakat paagi sa kapatagan sang Jordan sa bug-os nga gab-i. Nagtabok sila sa Suba sang Jordan, kag sa tapos sila makapanglakaton sa bug-os nga aga nag-abot sila sa Mahanaim.
30 Sang pag-untat ni Joab sa paglagas, gintipon niya ang tanan niya nga mga tinawo kag nasapwan niya nga 19 ang wala sa ila lakip kay Asael.
31 Ang mga tinawo ni David nakapatay sing 360 ka mga tinawo ni Abner halin sa tribo ni Benjamin.
32 Si Joab kag ang iya mga tinawo nagkuha sang bangkay ni Asael kag ginlubong sia sa lulobngan sang iya panimalay sa Betlehem. Dayon naglakat sila sa bug-os nga gab-i kag nag-abot sila sa Hebron sang kaagahon.
bAng isa ka dumaan nga pagbadbad Aser; sa Hebreo Asiria.
No comments:
Post a Comment