"Nagluhod sia sa Tiilan ni Jesus kag Nagpasalamat"

Liturhiya sang Pulong

(Domingo, Oktubre 13, 2019)

1. Ang Pagbasa gikan sa Ikaduha nga Libro sang:

Mga Hari 5:14-17

   Gani si Naaman naglusong sa Jordan, nagtum-oy sang iya kaugalingon sing makapito suno sa ginsiling ni Eliseo, kag nag-ayo sia sing bug-os. Ang iya panit nagtinlo kaangay sang isa ka bata. Nagbalik sia kay Eliseo upod ang iya mga tinawo kag nagsiling, “Karon nakahibalo ako nga wala sing dios, kundi ang Dios sang Israel; gani, sir, batuna ining akon regalo.”
   Nagsabat si Eliseo, “Ginasumpa ko sa Dios nga buhi, nga akon ginaalagad, indi ako magbaton sing regalo."
   Si Naaman nagpamilit nga batunon niya ini, pero indi gid sia. Gani si Naaman nagsiling, "Kon indi ikaw magbaton sang akon regalo, hatagi lang ako sing duta nga madala sang duha ka mula nga dalhon ko pauli, kay halin karon indi na ako magdulot sang mga halad ukon mga halad nga sinunog sa iban nga dios luwas sa Ginoo.

Salmo sa Pagsabat:

Mga Salmo 98:1, 2-3, 3-4

(S) Ang Ginoo nagpakilala sang iya kaluwasan sa tanan nga mga kapungsoran.

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog sia. (S)
Ginbantala sang Ginoo ang iya pagdaog, ginpakilala niya sa mga pungsod ang iya gahom sa pagluwas. Gintuman niya ang iya saad sa mga tawo sang Israel, nga may mapinadayunon nga gugma kag pag-unong sa ila. (S)
Ang tanan nga katawuhan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; dayawa sia sa mga ambahanon kag mga paghinugyaw! (S)

2. Ang Pagbasa gikan sa Ikaduha nga Sulat ni San Pablo nga Apostol, kay:

Timoteo 2:8-13

   Dumdoma si Jesu-Cristo nga kaliwat ni David, nga ginbanhaw suno sa Maayong Balita nga akon ginawali. Tungod kay ginawali ko ang Maayong Balita, nagaantos ako kag ginkadenahan pa gani ako nga daw isa ka kriminal. Pero ang pulong sang Dios indi makadenahan, kag tungod sini ginabatas ko ang tanan tungod lamang sa mga pinili sang Dios, agod nga ila man maagom ang kaluwasan kag himaya nga dayon, nga yara kay Cristo Jesus. Matuod ini nga mga pulong:
   “Kon napatay kita upod kay Cristo,
   Magakabuhi man kita upod sa iya.
   Kon nagapadayon kita sa pagbatas,
   Magagahom man kita upod sa iya.
   Kon ginapanghiwala naton sia,
   Sia man magapanghiwala sa aton.
   Kon kita aton indi matutom,
   Sia iya matutom man gihapon,
   Kay indi sia makapanghiwala
   Sang iya kaugalingon.”

Aleluya:

1 Tesalonica 5:18

   Magmapasinalamaton bisan sa ano nga kahimtangan kay amo ini ang ginapaabot sang Dios sa inyo, sa inyo pagkabuhi kay Cristo Jesus. 

Ang Pagbasa sang Santos nga Ebanghelyo suno kay:

San Lucas 17:11-19

   Sang nagapakadto si Jesus sa Jerusalem nag-agi sia sa dulonan sang Samaria kag Galilea. Sang nagapasulod sia sa isa ka baryo ginsugata sia sang napulo ka mga aruon. Ang mga aruon nagtindog sa unhan kag nagsinggit, “Jesus nga manunodlo, kaluoyi kami!”
   Nakita sila ni Jesus kag nagsiling sia sa ila, “Lakat kamo kag ipatan-aw ang inyo kaugalingon sa mga pari.”
   Sang nagalakat sila nag-ayo sila. L Ang isa sa ila, sang matalupangdan niya nga nag-ayo na sia, nagbalik nga nagadayaw sa Dios sa mabaskog nga tingog. Nagluhod sia sa tiilan ni Jesus kag nagpasalamat sa iya. Yadto nga tawo taga-Samaria. Si Jesus nagsiling, “Indi bala napulo ka tawo ang gintinluan? Karon diin na ang siyam? Ngaa ining dumoluong lang ang nagbalik sa pagpasalamat sa Dios?” Si Jesus nagsiling sa tawo, “Tindog ka kag maglakat. Ang imo pagtuo nag-ayo sa imo.” 

Oktubre 12 | Oktubre 14