Ang Pagpabautiso ni Jesus kay Juan

Liturhiya sang Pulong

(Domingo, Enero 12, 2020)

Ang Pagbunyag sa Ginoo

1. Ang Pagbasa gikan sa Libro ni:

Isaias nga Propeta 42:1-4, 6-7

   Ang Ginoo nagasiling, “Yari ang akon alagad,

   nga akon ginpalig-on--ang akon pinili, 

   nga sa iya nalipay gid ako. 

   Ginpun-an ko sia sang akon gahom, 

   kag magadala sia sing katarungan 

   sa tanan nga mga kapungsoran. 

   Indi sia magsinggit ukon magbayaw sang iya tingog, 

   ukon maghambal sing tudo sa mga dalan.    

   Manginmalulo sia sa mga maluya, 

   kag mabinuligon sa mgamakalulooy. 

   Magahatag sia sing walay katapusan 

   nga katarungan sa tanan. 

   Indi sia madulaan sing paglaom ukon kaisog, 

   kag magapaluntad sing katarungan sa duta. 

   Ang malayo nga mga duta 

   nagapaabot sang iya mga pagtudlo.” 

   “Ako, ang Ginoo, nagtawag sa imo 

   kag naghatag sa imo sing gahom 

   agod nga ang katarungan magluntad sa duta. 

   Paagi sa imo magahimo ako sing kasugtanan 

   sa tanan nga mga tawo; 

   paagi sa imo 

   magahatag ako sing kapawa 

   sa mga kapungsoran. 

   Pamuklaton mo ang mga mata sang mga bulag, 

   kag hilwayon mo 

   ang mga yara sa madulom nga mga prisuhan.

Salmo sa Pagsabat:

Mga Salmo 29:1-2, 3-4, 3, 9-10

(S) Ang Ginoo magabendisyon sing paghidait sa iya banwa.

Dayawa ninyo ang Ginoo, langitnon nga mga tinuga nga may kabuhi dayawa ninyo ang iya himaya kag gahom. Dayawa ninyo ang mahimayaon nga ngalan sang Ginoo, kon magpahayag ang Balaan, magsimba kamo. (S)

Ang tingog sang Ginoo mabatian sa mga kadagatan. Ang tingog sang Ginoo mabatian sa iya bug-os nga kusog kag pagkahalangdon! (S)

Ang mahimayaon nga Dios nagadaguob, kag ang lya tingog mabatian sa mga kalalawran. Samtang sa iya Templo ang tanan nagasinggit, "Himaya sa Dios!" Ang Ginoo nagagahom sa madalom nga tubig, nagagahom Sia subong hari sa walay katapusan. (S)

2. Ang Pagbasa gikan sa mga:

Binuhatan sang mga Apostoles 10:34-38

   Nagsugod si Pedro sa paghambal, “Karon natalupangdan ko nga alangay ang pagkabig sang Dios sang tanan nga mga tawo. Kay ang nagakahadlok sa iya kag nagahimo sing matarong, bisan ano ang iya rasa, nahamut-an sia sang Dios. Inyo nahibaluan ang mensahi nga iya ginpadala sa mga tawo sa Israel, nga nagabantala sang Maayong Balita sang paghidait paagi kay Jesu-Cristo nga Ginoo sang tanan nga mga tawo. Inyo nahibaluan ang bantog nga hitabo sa bug-os nga Israel, nga nagsugod sa Galilea, sa tapos nga ginwali ni Juan ang nahanungod sa pagbautiso. Nakahibalo man kamo nahanungod kay Jesus nga taga-Nazaret, kon daw ano ang paghatag sang Dios sa iya sang Espiritu Santo kag gahom. Nagkadto sia sa tanan nga mga duog nga nagahimo sang maayo nga mga buhat kag nagaayo sang tanan nga ginagamhan sang Yawa, kay ang Dios kaupod niya.

Aleluya:

Marcos 9:7

   Nag-abri ang langit kag nabatian ang tingog sang Amay: "Ini amo ang Akon hinigugma nga Anak, pamatii ninyo Sia.”

Ang Pagbasa sang Santos nga Ebanghelyo suno kay:

San Mateo 3:13-17

   Karon nag-abot si Jesus sa Jordan halin sa Galilea, kag nagkadto sia kay Juan sa pagpabautiso. Si Juan indi kuntani magbautiso sa iya nga nagasiling, “Ako ang dapat magpabautiso sa imo, kag ikaw pa karon ang nagkari sa akon!”

   Pero si Jesus nagsabat sa iya, “Sigi lang. Kay sa sini nga paagi ginatuman ta ang ginapaabot sang Dios.” 

   Gani nagpasugot si Juan. Sang mabautisohan na si Jesus, nagtakas sia. Dayon ang langit nag-abri kag nakita niya ang Espiritu sang Dios nga nagkunsad subong sang isa ka pating kag naghapon sa ibabaw niya. Kag may tingog gikan sa langit nga nagsiling, “Amo ini ang hinigugma ko nga Anak, nga akon gid nahamut-an.”

Enero 11 | Enero 13