Liturhiya sang Pulong
(Miyerkules, Nobyembre 20, 2019)
Ang Pagbasa gikan sa Ikaduha nga Libro sang mga:
Macabeo 7:1, 20-31
Sa isa pa gid ka tion may pito man ka mag-ulutod nga lalaki nga ginpadakop upod ang ila iloy. Ginpagapos kag ginpahanot sila sang hari sa pagpilit sa ila nga magkaon sang unod sang baboy nga ginadumilian sang Kasugoan.
Ang labing dalayawon sa tanan amo ang iloy, kag takos gid pasidunggan ang iya handumanan. Sa sulod sang isa ka adlaw, ang iya pito ka mga anak nagkalamatay sa iya atubang, pero gin-antos niya ini nga may kaisog kag nagsalig sia sa Ginoo. Isa ka dungganon nga balatyagon ang nagpuno sang iya tagipusoon kag naghatag sa iya sing kusog subong sang lalaki. Gani ginpaisog niya ang iya mga anak nga nagahambal sa linggwahe sang ila mga katigulangan. Nagsiling sia sa ila, "Wala ako makahibalo kon paano kamo magkabuhi sa akon taguangkan, indi ako ang naghatag sa inyo sang ginhawa kag sang kabuhi, kag indi man ako ang nagbutang sang mga bahin sang inyo lawas. Ang manunuga sang kalibutan, nga ginhalinan sang tawo kag ginsugoran sang tanan nga mga butang, pat-od gid nga magahatag sa inyo sang ginhawa kag sang kabuhi tungod sang iya kaluoy kay inyo ginsikway ang inyo kaugalingon nga kabuhi tungod sang iya mga kasugoan."
Si Antioco naghunahona nga ginayaguta kag ginainsultohan sia tungod sang paghambal sang iloy. Samtang buhi pa ang kamanghuran, si Antioco naghaylo sa iya indi lamang sa mga pulong, kundi sa mga saad nga may panumpa nga kon bayaan lang niya ang mga pagsulondan sang iya mga katigulangan, sia magamanggaranon gid kag magmalipayon, sia mangin-abyan sang hari kag magalingkod sa mataas nga palangakuan. Ang pamatan-on wala magsapak sa iya gani, ginpatawag sang hari ang iloy kag ginsingganan nga laygayan ang iya anak sa pagluwas sang iya kabuhi. Sa daku nga pagpamilit sang hari, nagpasugot na lang ang iloy nga laygayan ang iya anak. Nagduko sia palapit sa anak kag ginbuang niya ang mapintas nga manugpigos paagi sa paghambal sang linggwahe sang ila mga katigulangan sa sini nga pulong, "Anak ko, maluoy ka sa akon. Gindala ko ikaw sa akon tiyan sa sulod sang siyam ka bulan kag ginbatiti ko ikaw sa sulod sang tatlo ka tuig. Ginsagod kag ginpadaku ko ikaw tubtob karon kag gin-atipan. Nagapangabay ako sa imo, anak ko, magtangla ka sa langit kag magtamod sa duta. Tan-awa ang tanan nga mga butang nga yara sa ila kag kilalaha ang Dios nga nagtuga sa ila nga wala sing ginhalinan, kag ang tawo nagakabuhi man sa amo nga paagi. Indi ka magkahadlok sa sining manugpatay. Batuna ang kamatayon kag pamatud-i nga subong ikaw ka takos sang imo mga utod, agod nga sa adlaw sang kaluoy batunon ko ikaw liwat upod sa ila."
Halos pa lang sia makatapos hambal sang magsiling ang pamatan-on, "Ano pa ang ginahulat ninyo? Indi ako magtuman sang mando sang hari. Ang akon lang ginatuman amo ang kasugoan nga ginhatag ni Moises sa amon mga katigulangan. Kay ikaw, Haring Antioco, imo ginapahito ang tanan nga sahi sang pag-antos para sa mga Hebreo, indi ka gid makapalagyo sa mga kamot sang Dios."
Si Antioco naghunahona nga ginayaguta kag ginainsultohan sia tungod sang paghambal sang iloy. Samtang buhi pa ang kamanghuran, si Antioco naghaylo sa iya indi lamang sa mga pulong, kundi sa mga saad nga may panumpa nga kon bayaan lang niya ang mga pagsulondan sang iya mga katigulangan, sia magamanggaranon gid kag magmalipayon, sia mangin-abyan sang hari kag magalingkod sa mataas nga palangakuan. Ang pamatan-on wala magsapak sa iya gani, ginpatawag sang hari ang iloy kag ginsingganan nga laygayan ang iya anak sa pagluwas sang iya kabuhi. Sa daku nga pagpamilit sang hari, nagpasugot na lang ang iloy nga laygayan ang iya anak. Nagduko sia palapit sa anak kag ginbuang niya ang mapintas nga manugpigos paagi sa paghambal sang linggwahe sang ila mga katigulangan sa sini nga pulong, "Anak ko, maluoy ka sa akon. Gindala ko ikaw sa akon tiyan sa sulod sang siyam ka bulan kag ginbatiti ko ikaw sa sulod sang tatlo ka tuig. Ginsagod kag ginpadaku ko ikaw tubtob karon kag gin-atipan. Nagapangabay ako sa imo, anak ko, magtangla ka sa langit kag magtamod sa duta. Tan-awa ang tanan nga mga butang nga yara sa ila kag kilalaha ang Dios nga nagtuga sa ila nga wala sing ginhalinan, kag ang tawo nagakabuhi man sa amo nga paagi. Indi ka magkahadlok sa sining manugpatay. Batuna ang kamatayon kag pamatud-i nga subong ikaw ka takos sang imo mga utod, agod nga sa adlaw sang kaluoy batunon ko ikaw liwat upod sa ila."
Halos pa lang sia makatapos hambal sang magsiling ang pamatan-on, "Ano pa ang ginahulat ninyo? Indi ako magtuman sang mando sang hari. Ang akon lang ginatuman amo ang kasugoan nga ginhatag ni Moises sa amon mga katigulangan. Kay ikaw, Haring Antioco, imo ginapahito ang tanan nga sahi sang pag-antos para sa mga Hebreo, indi ka gid makapalagyo sa mga kamot sang Dios."
Salmo sa Pagsabat:
Mga Salmo 17:1, 5-6, 8 kag 15
(S) Sa akon pagmata mapuno ako sing kalipay sa imo pagpakig-upod sa akon.
Pamatii, O Ginoo, ang akon matarong nga pagpakiluoy, talupangda ang akon pagpangayo sing bulig! Pamatii ang akon pangamuyo, kay wala ako nagalimbong. (S)
Sa gihapon nagalakat ako sa imo dalan, kag wala gid ako magsipak. Nagapangamuyo ako sa imo, O Dios, kay ikaw nagasabat sa akon, gani balikda ako, kag pamatii ang akon mga pulong. (S)
Tipigi ako, subong sang pagtipig mo sang imo gid mga mata, tagoa ako sa idalom sang imo mga pakpak. (S)
Makakita ako sa imo, tungod kay ako matarong, kag sa akon pagmata mapuno ako sing kalipay sa imo pagpakig-upod sa akon. (S)
Aleluya:
Juan 15:16
Ako ang nagpili sa inyo, kag nagsugo sa inyo sa paglakat kag sa pagpamunga sing madamo, ang sahi sang bunga nga nagapadayon, siling sang Ginoo.
Ang Pagbasa sang Santos nga Ebanghelyo suno kay:
San Lucas 19:11-28
Sang nagapamati pa ang mga tawo nagsugid si Jesus sa ila sing isa ka palaanggiran kay malapit na sia sa Jerusalem, kag naghunahona sila nga ang Ginharian sang Dios manug-abot na. Gani nagsiling sia, “May isa ka dungganon nga tawo nga nagkadto sa malayo nga pungsod sa pagbaton sing isa ka ginharian kag dayon magapauli. Sa wala pa sia makalakat, gintawag niya ang iya napulo ka mga suloguon kag ginhatagan ang tagsatagsa sa ila sing P100 kag ginsingganan, ‘Patikanga ninyo ini tubtob nga mag-abot ako.’ Karon, ang iya mga kasimanwa nagdumot sa iya, gani nagpaapas sila sing mga tawo nga magasiling, ‘Indi kami luyag nga ini nga tawo maghari sa amon.’
“Ang dungganon nga tawo ginhimo nga hari kag nagbalik sia. Sa gilayon ginpatawag niya ang iya mga suloguon nga ginhatagan niya sing kuwarta, agod nga mahibaluan niya kon pila ang naganansya sang tagsatagsa sa ila. Ang nahauna nag-abot kag nagsiling, ‘Amoy, nakaganansya ako sing P1,000 sa P100 nga ginhatag mo sa akon.’ Nagsiling sia sa iya, ‘Maayo gid! Maayo ka nga suloguon! Tungod kay matutom ka sa diutay nga mga butang, magagahom ka sa napulo ka siyudad.’ Ang ikaduha nga suloguon nag-abot kag nagsiling, ‘Amoy, nakaganansya ako sing P500 sa P100 nga ginhatag mo sa akon.’ Nagsiling sia sa sini nga suloguon, ‘Magagahom ka sa lima ka siyudad.’ Ang isa pa ka suloguon nag-abot kag nagsiling, ‘Amoy, yari ang imo kuwarta. Gintago ko ini nga naputos sa panyo. Nahadlok ako sa imo kay maid-id ka nga tawo. Ginakuha mo ang indi imo, kag ginaani mo ang wala mo masab-og.’ Nagsiling sia sa iya, ‘Wala ka pulos nga suloguon! Ang imo mismo ginsiling amo ang magakondenar sa imo. Nakahibalo ikaw nga maid-id ako nga tawo, nga nagakuha sang indi akon kag nagaani sang wala ko masab-og. Ti, ngaa bala wala mo pag-ipatago sa bangko ang akon kuwarta? Kuntani sa akon pagbalik makuha ko ang akon kuwarta nga may saka na.’ Kag nagsiling sia sa mga nagatilindog didto, ‘Kuhaa ninyo sa iya ang kuwarta kag ihatag sa suloguon nga nakaganansya sing P1,000.’ Nagsiling sila sa iya, ‘Amoy, may P1,000 na sia!’
Nagsabat sia, ‘Nagasiling ako sa inyo nga ang may yara na, hatagan pa, pero ang wala iya, bisan ang diutay nga iya kuhaon pa. Karon, nahanungod sining akon mga kaaway nga indi luyag nga ako manginhari nila, dalha sila diri sa akon atubangan kag pamatya sila.’ ” Sa tapos makahambal sini si Jesus, nag-una sia sa ila pa Jerusalem.
No comments:
Post a Comment