"Hatagi Kami Adlaw-adlaw sang Kalan-on nga Amon Kinahanglanon"

Liturhiya sang Pulong

(Domingo, Hulyo 28, 2019)

1. Ang Pagbasa gikan sa Libro sang:

Genesis 18:20-32

   Dayon ang GINOO nagsiling kay Abraham, “Tama gid ang mga panumbongon batok sa Sodoma kag sa Gomorra, kag ang ila sala tama gid. Kinahanglan kadtuan ko kag tan-awon kon ang mga panumbongon batok sa ila matuod ukon indi.”
   Dayon ang duha ka tawo naglakat pakadto sa Sodoma, pero ang GINOO nagpabilin upod kay Abraham. Si Abraham nagpalapit sa GINOO kag nagpamangkot, “Pagalaglagon mo gid bala ang mga matarong upod sa mga malaut? Kon may yara nga 50 ka matarong nga mga tawo sa siyudad, pagalaglagon mo bala ang bilog nga siyudad? Indi mo bala pag-ipaiway ang siyudad agod maluwas ang 50? Sa pagkamatuod indi mo pagpatyon ang mga matarong upod sa mga malaut. Indi ina mahimo! Indi mo ina paghimuon. Kay kon amo ina, ang matarong pagasilutan pareho sang mga malaut. Indi ina mahimo. Ang Hukom sang bug-os nga kalibutan dapat maghukom sing matarong.”
   Ang GINOO nagsabat, “Kon makakita ako sing 50 ka matarong nga mga tawo sa Sodoma, indi ko paglaglagon ang bug-os nga siyudad tungod sa ila.”
   Si Abraham naghambal liwat, “Kon mahimo, O Ginoo, patawara ako sang akon kaisog sa pagpadayon sa pagpakighambal sa imo. Tawo lamang ako, kag wala ako kinamatarong sa paghambal sini. Abi may 45 lamang ka matarong nga mga tawo. Laglagon mo bala ang bug-os nga siyudad tungod kay kulang sing lima?” Ang Ginoo nagsabat, “Indi ko paglaglagon ang siyudad kon may makita ako nga 45 ka matarong nga mga tawo.”
   Si Abraham naghambal liwat, “Abi may 40 lang.”
   Nagsabat sia, “Indi ko paglaglagon ang siyudad kon may yara nga 40.”
   Si Abraham nagsiling, “Indi ka lang magkaakig sa akon, O Ginoo, kay indi ko mapunggan ang paghambal liwat. Ti, abi kon may 30 lang?”
   Nagsabat sia, “Indi ko paglaglagon ini kon may makita ako nga 30.”
   Si Abraham nagsiling, “Ginoo, kon mahimo, patawara ako sa akon kaisog sa pagpadayon sa pagpakighambal sa imo. Abi kon may 20 lang?”
   Nagsabat sia, “Indi ko paglaglagon ang siyudad kon may makita ako nga 20.”
   Si Abraham nagsiling, “Abaw, Ginoo, indi ka magkaakig, kag magahambal ako sing kaisa na lang. Abi kon may napulo lang?”
   Nagsiling sia, “Indi ko paglaglagon ini kon may yara nga napulo.”

Salmo sa Pagsabat:

Mga Salmo 138:1-2, 2-3, 6-7, 7-8

(S) Sa bisan ano nga adlaw nga magpanawag ako sa imo, O Ginoo, ginasabat mo ako.

Nagapasalamat ako sa imo, O GINOO, sa bug-os ko nga tagipusoon; nagakanta ako sing pagdayaw sa imo sa atubangan sang mga dios. Nagasimba ako sa atubangan sang imo balaan nga Templo. (S)
Kag nagadayaw sang imo ngalan, tungod sang imo mapinadayunon nga gugma kag katutom, kay nagpahayag ka nga ikaw kag ang imo mga sugo labaw sa tanan. Ginsabat mo ako sang nagpanawag ako sa imo; ginpabakod mo ako sang imo kusog. (S)
Bisan pa nga ang Ginoo yara sa kahitaasan, pero nagakabalaka sia sa mga kubos, kag ang mga bugalon indi makapanago sa iya. Bisan ginalibutan ako sang mga kagamo, ginabantayan mo ako nga indi maano. (S)
Ginasumpong mo ang akon akig nga mga kaaway, kag ginaluwas mo ako paagi sa imo gahom. Tumanon mo ang tanan nga imo ginsaad sa akon, O GINOO, ang imo gugma nagapadayon sa walay katapusan. Tapusa ang hilikuton nga imo ginsugoran. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Colosas 2:12-14

   Kay sang ginbautisohan kamo, ginlubong kamo upod kay Cristo, kag sa pagbautiso sa inyo ginbanhaw kamo upod kay Cristo paagi sa inyo pagtuo sa wala nagauntat nga gahom sang Dios nga amo ang nagbanhaw sa iya gikan sa kamatayon. Sang una, patay kamo sa espiritu tungod sang inyo mga sala kag tungod kay mga Gentil kamo nga wala masakop sa Kasugoan. Pero ginbuhi kamo sang Dios upod kay Cristo! Ginpatawad kita sang Dios sang tanan naton nga mga sala. Ginpanas niya ang lista sang tanan naton nga mga utang, lakip ang iya mga tulomanon nga indi naton matuman, kag ginwala niya ini paagi sa paglansang niya sini sa krus.

Aleluya:

Roma 8:15

   Iya kamo ginahimo nga mga anak sang Dios, kag paagi sa gahom sang Espiritu nagapanawag kita sa Dios, “O Amay, Amay ko!” 

Ang Pagbasa sang Santos nga Ebanghelyo suno kay:

San Lucas 11:1-13

   Isa sadto ka tion si Jesus nagapangamuyo sa isa ka duog. Sang pagkatapos niya, ang isa sang iya mga gintuton-an nagsiling sa iya, “Ginoo, tudloi kami sa pagpangamuyo, subong nga si Juan nagtudlo man sang iya mga gintuton-an.”
   Si Jesus nagsiling sa ila, “Magpangamuyo kamo sing subong sini:
   ‘Amay, Kabay nga magkari ang imo Ginharian.
   Hatagi kami adlaw-adlaw sang kalan-on
   Nga amon kinahanglanon.
   Patawara kami sang amon mga sala,
   Kay ginapatawad man namon
   Ang tanan nga nakasala sa amon.
   Indi kami pag-ipadaog sa mga pagsulay.’ ”
   Kag si Jesus nagsiling sa iya mga gintuton-an, “Abi may isa sa inyo nga magkadto sa balay sang iya amigo sa tungang gab-i kag magsiling sa iya, ‘Abyan, pahulama ako sing tatlo ka bilog nga tinapay, kay may amigo ako nga nagapanglakaton nga nag-abot sa balay kag wala gid ako sing ipakaon sa iya.’ Kag abi, ang imo amigo magsabat didto sa sulod sang iya balay, ‘Indi ako pagtublaga! Nakapanirado na kami, nagahigda na ako kag ang akon kabataan, mabudlay na ang magbangon sa paghatag sa imo sing bisan ano.’ Ti, ano karon? Nagasiling ako sa inyo, bisan nga indi sia magbangon sa paghatag sa imo sing tinapay tungod sang inyo pag-abyanay, pero tungod sang imo pagpamilit nga wala gid huyahoya magabangon sia kag magahatag sa imo sang imo kinahanglanon. Gani nagasiling ako sa inyo: Pangayo kamo, kag kamo magabaton, pangita kamo kag kamo makakita, panuktok kamo kag ang puwertahan pagabuksan sa inyo. Kay ang tagsatagsa nga nagapangayo magabaton, kag ang nagapangita makakita, kag ang puwertahan pagabuksan sa iya nga nagapanuktok.
   Kamo nga mga amay, may isa bala sa inyo nga magahatag sa iya bata sing man-og kon ang iya ginapangayo isda? Hatagan mo bala sia sing iwiiwi kon ang iya ginapangayo itlog? Kon kamo nga mga malaut makahibalo maghatag sing maayo nga butang sa inyo mga kabataan, daw ano pa gid ang inyo Amay nga langitnon. Magahatag sia sang Espiritu Santo sa mga nagapangayo sa iya.”

Hulyo 26 | Hulyo 28