"Magkalipay kag Maghinugyaw Kamo, Tungod kay Daku ang Inyo Balos sa Langit"

Liturhiya sang Pulong

(Lunes, Hunyo 10, 2019)

Birhen Maria, Iloy sang Simbahan

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 1:1-7

   Pag-abiabi halin kay Pablo, apostol ni Cristo Jesus suno sa kabubot-on sang Dios, kag halin kay Timoteo nga aton utod— 
   Sa iglesia sang Dios nga yara sa Corinto, kag sa tanan nga mga tumoluo sa bug-os nga Grecia.

   Kabay nga ang Dios nga aton Amay kag ang Ginoong Jesu-Cristo maghatag sa inyo sing grasya kag paghidait.

   Magpasalamat kita sa Dios kag Amay sang aton Ginoong Jesu-Cristo, ang maluloy-on nga Amay, ang Dios nga ginahalinan sang tanan nga bulig! Ginabuligan niya kita sa tanan naton nga mga kalisdanan, agod nga paagi sa bulig nga aton nabaton sa Dios, makabulig man kita sa iban sa tanan nila nga mga kalisdanan. 

Makabulig man kita sa iban sa tanan nila nga mga kalisdanan. (1:4)

Subong nga nagaambit kita sa madamo nga mga pag-antos ni Cristo, amo man paagi kay Cristo nagaambit kita sang iya daku nga bulig. Kon nagaantos kami, tungod ini sa pagbulig sa inyo kag sa inyo kaluwasan. Kon kami nabuligan, ti kamo man nabuligan kag nahatagan sing kusog sa pagbatas nga may pagpailob sang amo man nga mga pag-antos nga amon ginabatas. Gani, malig-on ang amon paglaom sa inyo. Nakahibalo kami nga subong nga kamo nagaambit sang amon mga pag-antos, kamo man nagaambit sang bulig nga amon ginabaton.

Salmo sa Pagsabat:

Mga Salmo 34:2-3, 4-5, 6-7, 8-9

(S) Tilawi kag tan-awa ninyo kon daw ano kaayo sang Ginoo.

Magpasalamat kamo sa Ginoo paagi sa pagtukar sing arpa, magkanta kamo sa iya nga ginaupdan sang mga instrumento nga may kwerdas. Kantahi ninyo sia sing bag-o nga ambahanon, tukara sing maayo ang arpa, kag magsinggit sa kalipay! (S)
Ang mga pulong sang Ginoo matuod, kag ang tanan niya nga mga binuhatan masaligan. Ang Ginoo nagahigugma sang maayo matarong nga mga tawo, ang iya mapinadayunon nga gugma nagapuno sang duta. (S)
Gintuga sang Ginoo ang kalangitan sa iya pagmando, ang adlaw, bulan kag kabituonan sa iya pulong. Gintingob niya ang kadagatan sa isa ka lugar, ginsirhan niya ang kadadalman sang lawod sa mga talaguan. (S)
Simbaha ninyo ang Ginoo, bug-os nga kadutaan! Pasidunggi ninyo sia tanan nga mga katawhan sang kalibutan! Sang paghambal niya, ang kalibutan natuga, sang pagmando niya, ang tanan nagtuhaw. (S)

Aleluya:

Magkalipay kag maghinugyaw kamo, tungod kay daku ang inyo balus sa langit.

Ang Pagbasa sang Santos nga Ebanghelyo suno kay:

San Mateo 5:1-12

   Sang makita ni Jesus ang mga nagadinugok nga mga tawo nagtaklad sia sa bakulod. Nagpalapit sa iya ang iya mga gintuton-an kag naglingkod sia sa pagtudlo sa ila sang masunod:

   “Bulahan ang mga nagakilala 
   Sang kinahanglanon sang ila mga kalag, 
   Kay ila ang Ginharian sang langit!

   “Bulahan ang mga nagakasubo, 
   Kay pagalipayon sila sang Dios!

   “Bulahan ang mga mapainuboson, 
   Kay magabaton sila 
   Sang ginsaad sang Dios!

   “Bulahan ang may daku nga handom 
   Nga magmatarong 
   Suno sa ginapaabot sang Dios, 
   Kay ang Dios 
   Magahatag sing katumanan 
   Sina nga handom!

   “Bulahan ang mga maluloy-on, 
   Kay pagakaluoyan man sila sang Dios!

   “Bulahan ang may putli nga tagipusoon, 
   Kay makita nila ang Dios!

   “Bulahan ang nagapaluntad 
   Sang paghidait 
   Sa tunga sang mga tawo, 
   Kay ang Dios magatawag sa ila 
   Nga iya mga anak!

   “Bulahan ang mga ginahingabot 
   Tungod kay ginatuman nila 
   Ang ginapaabot sang Dios sa ila, 
   Kay ila ang Ginharian sang langit!

   “Bulahan kamo kon ang mga tawo magpasipala kag maghingabot kag magbutangbotang sa inyo tungod kay kamo sumolunod ko. Magkalipay kag maghinugyaw kamo, tungod kay daku ang inyo balos sa langit. Kay amo ini nga paghingabot ang naaguman sang mga propeta sang una.” 

Hunyo 9 | Hunyo 11