"Para sa Iya ang Tanan Buhi"

Liturhiya sang Pulong

(Sabado, Nobyembre 23, 2019)

San Columbano, Abad

Ang Pagbasa gikan sa Nahauna nga Libro sang mga:

Macabeo 6:1-13

   Samtang nagapalangkaton si Haring Antioco IV sa Mesopotamia, nabatian niya nga sa Persia may isa ka siyudad nga ginatawag Elymais, nga nabantogan tungod sang iya manggad, sang iya pilak kag bulawan, kag ang iya templo may madamo nga manggad pareho sang mga helmet nga bulawan, mga hapin sa dughan, kag mga hinganiban nga ginbilin didto ni Alejandro, nga anak ni Felipe nga hari sang Macedonia, ang nahauna nga hari sa mga Griego. Gani naglakat sia kag nagtinguha sa pag-agaw kag pag-ati sang siyudad. Pero wala niya mahimo ini, tungod kay ang iya plano nahibal-an sang mga pumoluyo sang siyudad, kag nagpakig-away sila sing tudo gid batok sa iya. Gani nag-isol sia kag sa daku nga pagsalangisag, naghalin sia didto kag nagbalik sa Babilonia. Pero samtang didto sia sa Persia, nakabaton sia sing balita nga ang mga hangaway nga nagsalakay sa duta sang Juda nalutos, kag si Lysias nga nagkadto didto upod sa makusog nga mga hangaway gindusdos kag ginpanglagas sang mga Judio. Ini nga mga Judio nagbakod tungod sang ila naagaw nga mga hinganiban, mga pagkabutang gikan sa mga hangaway nga ila ginpamatay. Ginguba nila ang kangil-aran nga iya ginpatindog sa altar sa Jerusalem, kag ginpalibotan sing mataas nga pader ang santuaryo subong sang una, kag ginpamakuran ang Betzur ang isa sang iya mga siyudad. Sang mabatian sang hari ini nga balita, dinakop sia sing kahadlok kag nagpalangurog gid. Naghigda sia sa katre kag nagmasakit sia tungod sa kasubo, tungod kay napaslawan ang iya mga plano. Didto nagpabilin sia sa sulod sang malawig nga mga inadlaw, nga ginadapo sang tuman nga kalisod, tubtob sang ulihi nabatyagan niya nga madali na lang sia mapatay. 

   Dayon ginpatawag niya ang tanan nga mga Abyan sang Hari kag ginsingganan sila, "Indi na ako makatulog, tungod kay ang akon tagipusoon daw malumos sa kalisod. Nagasiling ako sa akon kaugalingon, kon ngaa naabutan ko ining daku nga kaantusan, kag isa ka daku nga palaligban nga naglumos sa akon—ako nga maalwan kag ginahigugma sang yara pa ako sa gahom. Pero karon akon nadumdoman ang mga kalautan nga akon nahimo sa Jerusalem, sang pagkuha ko sang tanan nga mga gamit nga bulawan kag pilak nga yadto didto, kag sa wala sing kabangdanan nagmando ako sa pagpamatay sang mga pumoluyo sang Juda. Nahibal-an ko nga amo ini ang kabangdanan sang tanan nga mga kalainan nga nag-abot sa akon, kag karon mamatay ako sa mapait nga kalisod sa iban nga duta."

Salmo sa Pagsabat:

Mga Salmo 9:2-3, 4 kag 6, 16 kag 19

(S) O Ginoo, magakalipay ako kay ginluwas mo ako.

Pagadayawon ko ikaw, O GINOO, sa bug-os ko nga tagipusoon, ibantala ko ang tanan mo nga makatilingala nga mga binuhatan. Tungod sa imo magaamba ako sing malipayon! Magaamba ako sa imo sang mga pagdayaw, O Labing Mataas. (S)

Kon ikaw magpakita, nagapalagyo ang akon mga kaaway, nagakapukan sila kag nagakalamatay. Ginkondenar mo ang mga indi diosnon kag ginlaglag mo ang mga malaut; kag indi na gid sila madumdoman. (S)

Nagkutkot sing tugalbong ang mga indi diosnon kag sila man lang ang nahulog, naghimo sila sing siod kag sila man lang ang nadakop. Ang mga makalulooy indi pagkalimtan sing dayon, ang paglaom sang mga ginapigos indi mapaslawan sing dayon. (S) 

Aleluya:

2 Timoteo 1:10

Ang aton Manlulowas nga si Jesukristo naglaglag sang kamatayon, kag ginpahayag niya ang kabuhi paagi sa Maayong Balita.

Ang Pagbasa sang Santos nga Ebanghelyo suno kay:

San Lucas 20:27-40

   May mga Saduceo nga nagpalapit kay Jesus. (Amo ini sila ang nagasiling nga wala sing pagkabanhaw.) Ginpamangkot nila sia, “Manunodlo, si Moises nagsulat sining kasugoan para sa amon, ‘Kon ang isa ka tawo mapatay nga wala sila sing bata sang iya asawa, ang utod nga lalaki sang napatay magapangasawa sang nabalo agod nga sila makapamata para sa napatay nga tawo.’ Sadto anay may pito ka mag-ulotod nga lalaki. Ang magulang nagpangasawa, kag napatay nga wala sing anak. Dayon ang ikaduha nagpangasawa sang nabalo, kag amo man ang ikatlo. Amo man ang natabo sa tanan sa ila. Napatay sila nga wala sing ginbilin nga anak.  Sang ulihi ang babayi napatay man. Sila nga pito nakapangasawa sa iya. Karon, sa adlaw sang pagkabanhaw sang mga minatay, kay sin-o bala sia asawa?” 

   Si Jesus nagsabat sa ila, “Ang mga lalaki kag mga babayi sining kalibutan nagaasawahay, pero ang mga lalaki kag mga babayi nga takos nga pagabanhawon kag magakabuhi sa palaabuton nga panahon wala na nagaasawahay. Kay kasubong sila sang mga anghel kag indi na sila mapatay. Mga anak sila sang Dios, kay ginbanhaw sila gikan sa kamatayon. Si Moises nagapamatuod sing maathag nga ang mga patay pagabanhawon. Sa bahin sang kasulatan nahanungod sang nagadabdab nga kahuykahoy, nagahambal sia nahanungod sa Ginoo subong ‘Dios ni Abraham, Dios ni Isaac, kag Dios ni Jacob.’ Ini nagakahulogan nga ang Dios amo ang Dios sang mga buhi kag indi sang mga patay, kay para sa iya ang tanan buhi.” 

   May mga manunodlo sang Kasugoan nga nagtugda, “Manunodlo, maayo ang imo sabat.” Kag wala na sila magpangahas sa pagpamangkot pa sa iya. 

Nobyembre 22 | Nobyembre 24