"Magsiling Ka lang, kag Magaayo ang Akon Suloguon"

Liturhiya sang Pulong

(Lunes, Setyembre 16, 2019)

San Cornelio, Santo Papa kag Martir
San Cipriano, Obispo kag Martir

Ang Pagbasa gikan sa Nahauna nga Sulat ni San Pablo nga Apostol, kay:

Timoteo 2:1-8

   Karon, una sa tanan, nagalaygay gid ako nga ang mga pag-ampo kag mga pagpangamuyo, ang mga pagpangabay kag mga pagpasalamat ihalad sa Dios para sa tanan nga mga tawo; para sa mga hari kag sa tanan nga yara sa awtoridad, agod nga magkabuhi kita sing matawhay kag mahidaiton sa bug-os nga pagkadiosnon kag sa nagakaigo nga pagginawi. Maayo ini kag nahamut-an sang Dios nga aton Manlulowas, nga luyag nga ang tanan nga mga tawo maluwas kag makadangat sa paghibalo sang kamatuoran. Kay may isa lamang ka Dios kag may isa lamang nga nagapahiusa sang Dios kag sang mga tawo, ang tawo nga si Cristo Jesus, nga nagtugyan sang iya kaugalingon sa pagtubos sang tanan nga mga tawo. Amo yadto ang pagpamatuod, sa nagakaigo nga panahon, nga luyag sang Dios nga ang tanan nga mga tawo maluwas. Tungod sini, ginpadala ako subong isa ka apostol kag manunodlo sang mga Gentil, sa pagbantala sang pagtuo kag kamatuoran. Wala ako nagabutig, kundi nagasugid ako sing matuod!
   Luyag ko nga ang tanan nga mga lalaki sa bisan diin nga duog magpangamuyo nga nagabayaw sang ila mga kamot sa matinlo nga tagipusoon nga wala sing kaakig kag pagsinuay.

Salmo sa Pagsabat:

Mga Salmo 28:2, 7, 8-9

(S) Dayawon ang Ginoo kay ginpamatian niya ang akon pagpangayo sing bulig!

Pamatii man ako kon magpangayo ako sa imo sing bulig, nga nagabayaw sang akon mga kamot ayon sa imo balaan nga Templo. (S)

Ang Ginoo amo ang nagabantay kag nagaapin sa akon, sa iya ako nagasalig, iya ako ginbuligan, gani nagakalipay ako, kag nagaamba sing mga pagdayaw sa iya. (S)

Ang Ginoo nagaapin sa iya mga tawo, ginaapinan kag ginaluwas niya ang iya pinili nga hari. Luwasa ang imo mga tawo, O Ginoo, kag bendisyuni sila!Ikaw ang ila manugbantay, kag atipana sila sa wala sing katubtoban.  (S)

Aleluya:

Juan 3:16 

   Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. 

Ang Pagbasa sang Santos nga Ebanghelyo suno kay:

San Lucas 7:1-10

   Sa tapos ni Jesus mahambal ining mga butang sa mga tawo, nagkadto sia sa Capernaum. Ang kapitan nga Romanhon didto may isa ka suloguon nga palangga gid niya. Ini nga suloguon nagamasakit kag tagumatayon. Sang pagkabati sang kapitan nahanungod kay Jesus, ginpadala niya ang pila ka mga katigulangan sang mga Judio sa pagpangabay kay Jesus nga magkari kag ayuhon ang iya suloguon. Nagkadto sila kay Jesus kag nagpakiluoy gid sa iya: “Ini nga kapitan takos gid sang imo bulig. Nagahigugma sia sang aton pungsod kag sia gid nagpatindog sang amon sinagoga.”

   Gani si Jesus nag-upod sa ila. Sang malapit na si Jesus sa balay, ginsugo sang kapitan ang iya mga abyan nga sugataon si Jesus kag silingon, “Sir, indi ka na magpagamo! Indi ako takos nga magkadto ka sa akon balay, kag indi man ako takos magpalapit sa imo. Pero magsiling ka lang kag magaayo ang akon suloguon. Kay ako sa idalom man sang pagbulot-an sang mataas pa nga mga opisyales, kag may mga soldado man ako. Ginasugo ko ining isa, ‘Lakat!’ kag nagalakat sia. Ginasugo ko inang isa, ‘Kari!’ kag nagakari sia. Kag ginasugo ko ang akon suloguon, ‘Himoa ini!’ kag ginahimo niya.” Natingala si Jesus sang pagkabati niya sini. Nagliso sia kag nagsiling sa mga nagasunod sa iya, “Nagasiling ako sa inyo, wala ako makakita sing pagtuo kasubong sini, bisan sa Israel.” Sang magbalik sa balay sang kapitan ang mga ginsugo nakita nila nga maayo na ang suloguon.

Setyembre 15 | Setyembre 17