Indi Paghidait kundi Espada

Liturhiya sang Pulong

(Lunes, Hulyo 15, 2019)

San Buenaventura, Obispo kag Doktor sang Simbahan

Ang Pagbasa gikan sa Libro sang:

Exodo 1:8-14, 22

   Karon may isa ka bag-o nga hari nga naggahom sa Egipto. Wala sia makakilala kay Jose. Ang hari nagsiling sa iya mga ginsakpan, “Tan-awa ninyo, ini nga mga tawo nga Israelinhon nagadamo kag nagabakod, kag nabutang kita sa katalagman. Karon pamatii ninyo! Andaman naton nga indi na gid sila magdamo. Kay kon may inaway, basi magdampig sila sa aton mga kaaway sa pag-away batok sa aton, kag magpalagyo sila sa aton pungsod.” Gani ginbutangan sila sing mga mapintas nga mga kabo sa pagpaobra sa ila sing pataypatay agod magluya sila. Ang mga Israelinhon nagpatindog sang mga siyudad sang Pitom kag Raamses para kay Paraon nga pagatipunan nila sing mga pagkaon. Pero sa nagadugang ang pagpigos sang mga Egiptohanon sa mga Israelinhon, tapat pa gani nga nagadamo kag nagalapnag sila. Ang mga Egiptohanon nagdumot kag nagkahadlok sa mga Israelinhon. Gin-ulipon nila sing mapintas ang mga Israelinhon, kag ginpapiot ang ila pagkabuhi paagi sa pagpaobra sa ila sa lunang kag sa tisa, kag sa tanan nga mabug-at nga mga obra sa uma. Ginpilit nila sila sa paghimo sang tanan nga mabug-at nga mga obra.

   Dayon si Paraon nagmando sa tanan niya nga mga ginsakpan, “Ihaboy ninyo sa Suba ang tagsa ka bata nga lalaki nga matawo sa mga Hebreo, pero pabay-i ninyo ang mga bata nga babayi nga mabuhi."

Salmo sa Pagsabat:

Mga Salmo 124:1-3, 4-6, 7-8

(S) Ang aton bulig nagagikan sa Ginoo.

Ano na alang abi kon ang Ginoo wala magdampig sa aton? Magsabat ka, O Israel! “Kon ang Ginoo wala magdampig sa aton, sang pagsalakay sa aton sang aton mga kaaway, kuntani ila kita ginlamon nga buhi, sa ila nagabalingaso nga kaakig batok sa aton. (S)

Dayon kuntani gindala nila kita palayo subong sang baha, ginlapawan nila kita kuntani subong sang tubig, ang nagasagana nga baha naglumos na kuntani sa aton." Magpasalamat kita sa Ginoo, nga wala magtugot nga laglagon kita sang aton mga kaaway. (S)

Nakapalagyo kita kaangay sang isa ka pispis sa manugsiod; ang siod nabugto, kag nahilway kita! Ang aton bulig nagagikan sa Ginoo, nga naghimo sang langit kag duta. (S)

Aleluya:

Mateo 5:10

Bulahan ang mga ginahingabot tungod kay ginatuman nila ang ginapaabot sang Dios sa ila, kay ila ang Ginharian sang langit!

Ang Pagbasa sang Santos nga Ebanghelyo suno kay:

San Mateo 10:34–11:1

   “Indi kamo maghunahona nga nagkari ako sa kalibutan sa pagdala sing paghidait. Wala ako magkari sa pagdala sing paghidait kundi sang espada. Nagkari ako sa pagpaaway sang anak nga lalaki batok sa iya amay, sang anak nga babayi batok sa iya iloy, sang umagad nga babayi batok sa iya ugangan nga babayi. Ang mapait nga kaaway sang tawo amo ang mga katapo sang iya panimalay.

   “Ang nagahigugma sang iya amay ukon iya iloy sing labi pa sa akon, indi takos sa akon; ang nagahigugma sa iya mga kabataan sing labi pa sa akon, indi takos sa akon. Ang wala nagapas-an sang iya krus kag nagasunod sa akon, indi takos sa akon. Ang nagapaniguro sang iya kabuhi madulaan sini; kag ang nagadula sang iya kabuhi tungod sa akon makita niya ini.”

   “Ang nagabaton sa inyo nagabaton sa akon; kag ang nagabaton sa akon nagabaton man sang nagpadala sa akon. Ang nagabaton sang mensahero sang Dios tungod kay mensahero sia sang Dios may parti sang balos nga para sa mensahero sang Dios. Ang nagabaton sang matarong nga tawo tungod kay sia matarong may parti sang balos nga para sa matarong. Dumdoma ninyo ini! Ang nagapainom sang bisan isa lamang ka baso nga mabugnaw nga tubig sa isa sining akon pinakakubos nga gintuton-an, tungod kay gintuton-an ko sia, magabaton gid sang iya balos.”

   Sa tapos masingganan ni Jesus ang iya dose ka mga apostoles kon ano ang ila himuon naghalin sia sa sadto nga duog sa pagpanudlo kag pagwali sa palibot nga mga banwa.

Hulyo 14 | Hulyo 16