Ang mga Inagda Indi Magkadto sa Punsyon!

Liturhiya sang Pulong

(Huwebes, Agosto 22, 2019)

Ang Mahal nga Birhen Maria nga Reyna

Ang Pagbasa gikan sa Libro sang:

Mga Hukom 11:29-39

   Dayon gingamhan si Jepte sang espiritu sang Ginoo. Nag-agi sia sa Galaad kag sa Manases, kag nagbalik sia sa Mispa sa Galaad. Halin didto nagkadto sia sa Amon. Nagsaad si Jepte sa Ginoo nga nagasiling, "Kon padag-on mo ako batok sa mga Amonhon, igahalad ko subong nga halad nga sinunog ang nahauna nga tawo nga maggwa sa akon balay sa pagsugata sa akon, sa pag-abot ko halin sa akon pagdaog. Igahalad ko ina nga tawo sa imo subong halad nga sinunog.” Gani nagtabok si Jepte sa suba sa pagpakig-away sa mga Amonhon, kag ginpadaog sia sang GINOO. Ginsalakay niya sila halin sa Aroer tubtob sa mga kadutaan sa palibot sang Minit, duha ka pulo ka mga siyudad tanan, tubtob sa sapa sang Keramin. Madamo ang mga nagkalamatay, kag nalutos sang mga Israelinhon ang mga Amonhon.

   Sang pagbalik ni Jepte pauli sa Mispa, ang iya anak nga babayi naggwa sa pagsugata sa iya nga nagasaot kag nagatukar sang diutay nga tambor. Bugtong sia nga anak ni Jepte. Wala na si Jepte sing iban pa nga anak nga lalaki ukon babayi. Sang pagkakita niya sang iya anak nga babayi, gingisi ni Jepte ang iya kaugalingon nga bayu tungod sa kasubo, kag nagsiling, "Abaw, anak ko! Ginabuong mo ang akon tagipusoon! Ngaa bala nga ikaw pa ang magpakalisod sa akon? Nakapanumpa na ako sa GINOO, kag indi ko na ini mabawi!" Nagsiling ang anak nga babayi ni Jepte sa iya, "Kon nakapanumpa na ikaw sa Ginoo, tumana ang imo ginsumpa nga pagahimuon sa akon. Ang Ginoo naghatag sa imo sing pagtimalos sa imo mga kaaway nga mga Amonhon." Pero nagsiling sia sa iya amay, "Amo lang ini ang akon ginapangayo: pabay-i lang ako sa sulod sang duha ka bulan, agod makaupod ako sa akon mga abyan pakadto sa mga kabukiran sa pagpangasubo, tungod kay dapat ako mapatay nga isa ka ulay.” Gintugotan sia ni Jepte sa paglakat, kag nagpalayo sia sa kay Jepte sa sulod sang duha ka bulan. Sia kag ang iya mga abyan nagkadto sa mga kabukiran, kag nagpangasubo tungod kay mapatay sia nga isa ka ulay. Sa tapos sang duha ka bulan nagbalik sia sa iya amay.

Salmo sa Pagsabat:

Mga Salmo 40:5, 7-8, 8-9, 10

(S) Yari ako, O Ginoo, sa pagtuman sang imo kabubot-on.

O Ginoo nga akon Dios, madamo ang imo nahimo para sa amon; wala na sing pareho sa imo! Madamo kag makatilingala ang imo mga plano para sa amon. Kon isaysay ko sila tanan, madamo pa sila sang sa akon sarang masugid. (S)

Gani nagsabat ako, “Yari ako! Ang imo mga mando para sa akon yara sa libro sang Kasugoan. Daw ano ang kaluyag ko sa pagtuman sang imo kabubot-on, O Dios ko! (S)

Ginahuptan ko ang imo pagtulon-an sa akon tagipusoon.” Sa mga pagtililipon sang tanan nimo nga mga tawo, O Ginoo, ginasugid ko ang maayong balita nga ikaw nagaluwas. Ikaw nakahibalo nga indi ako mag-untat sa pagsugid sini. (S)

Wala ko gintago ang balita sang kaluwasan sa akon kaugalingon; ang imo pagkamatutom kag pagbulig ginasugid ko sa gihapon. Sa pagtililipon sang tanan nimo nga mga tawo, wala ako maghipos nahanungod sang imo mapinadayunon nga gugma kag pagkamainunongon. (S)

Aleluya:

Mga Salmo 95:8

    Pamatii ninyo ang ginasiling sang Ginoo: "Indi kamo magpakatig-a subong sang inyo tagipusoon."

Ang Pagbasa sang Santos nga Ebanghelyo suno kay:

San Mateo 22:1-14

   Si Jesus naghambal liwat sa mga tawo paagi sa mga palaanggiran. “Ang Ginharian sang langit kaangay sa isa ka hari nga naghanda sang isa ka punsyon sa kasal sang iya anak. Ginpadala niya ang iya mga suloguon sa pagtawag sang mga inagda sa punsyon, pero ang mga inagda indi magkadto. Gani ginsugo niya ang iban niya nga mga suloguon kag ginsingganan, ‘Singgana ninyo ang mga inagda nga ang akon punsyon handa na, ang akon mga baka kag mga tinday nga pinatambok naihaw na, kag ang tanan handa na. Gani kari kamo kag mamunsyon!’ Pero ang mga inagda wala magsapak kundi naglakat sila: ang isa sa iya uma, ang isa sa iya baligyaan, samtang ang iban nga mga inagda nagdakop, nagbunal, kag nagpatay sa mga suloguon. Ang hari naakig gid, kag ginpadala niya ang iya mga soldado sa pagpamatay sa mga nagpatay sang iya suloguon, kag sa pagsunog sang ila banwa. Dayon gintawag niya ang iya mga suloguon kag ginsingganan, ‘Ang akon punsyon sa kasal handa na, ugaling ang mga inagda indi takos. Karon kadto kamo sa mga dalan kag agdaha ninyo sa punsyon ang tanan nga inyo masugata.’ Gani ang mga suloguon nagkadto sa mga dalan kag gintipon nila ang tanan nga ila nakita, malain kag maayo. Kag ang kalan-an sa punsyon napuno sang mga inagda.

   “Nagsulod ang hari sa pagtan-aw sang mga inagda, kag nakita niya ang isa ka tawo nga wala makasuksok sang bayu para sa punsyon. Ginpamangkot sia sang hari, ‘Abyan, ngaa nga nakasulod ka diri nga wala makasuksok sang bayu para sa punsyon?’ Pero wala sia magsabat. Dayon ang hari nagsugo sa mga suloguon, ‘Gapusa ninyo ang iya kamot kag tiil kag ihaboy sa kadudolman sa gwa. Didto magahibi sia kag magabagrot sang iya mga ngipon.’”

   Kag sa katapusan si Jesus nagsiling, “Kay madamo ang mga gin-agda, pero pila lamang ang mga ginpili.” 

Agosto 21 | Agosto 23