Magaabot ang Ginharian ni Kristo

Liturhiya sang Pulong

(Huwebes, Nobyembre 14, 2019)

Ang Pagbasa gikan sa Libro sang:

Kaalam ni Salomon 7:22–8:1

   Ang espiritu sang Kaalam maalam kag balaan. Isa lamang ang iya kinaugali pero ginapahayag niya ang iya kaugalingon sa madamo nga paagi. Wala ini sing lawas nga makit-an gani hilway sia nga maghulag sa palibot. Matin-aw ini sia, matinlo kag may pagsalig. Indi ini sia mahalitan. Ginahigugma niya ang maayo. Matalom sia kag indi malutos, maluloy-on sia kag abyan sang mga katawhan. Masaligan sia kag wala sia sing palaligban. May gahom sia sa tanan nga butang kag makita niya ang tanan. Nagasulod sia sa tagsa ka espiritu nga maalam kag putli, bisan daw ano ini ka halalungan.

   Ang Kaalam nagahulag sing mas mahapos pa sang sa hulag mismo; tama ini ka putli nga sarang makasulod sa tanan nga butang. Sia ang ginhawa sang gahom sang Dios - isa ka putli kag masanag nga silak sang himaya gikan sa Makagagahom. Ang mga may dagta indi makaangkon sang Kaalam. Sia ang silak sang walay katapusan nga kapawa, ang himpit nga espeho sang ginahimo sang Dios kag sang iya kaayo. Bisan pa nga nagaisahanon ang Kaalam mabuhat ang bisan ano. Mabuhat niya ang tanan nga manginbag-o walay sapayan nga sia mismo wala nagabalhin. Gikan sa kaliwatan kag kaliwatan nagasulod sia sa mga kalag sang balaan nga mga tawo kag iya sila ginabuhat nga mga abyan sang Dios kag mga propeta. Wala na sing ginahigugma sing labi ang Dios sang sa mga tawo nga may Kaalam. Ang Kaalam mas matahom pa sang sa adlaw kag mga bituon. Mas maayo pa sia sang sa kapawa mismo, tungod kay ang kagab-ihon nagasunod sa adlaw, pero ang kalautab indi makadaog sa Kaalam. Ang iya daku nga gahom nagalambot sa bug-os nga bahin sang kalibutan kag iya ginabutang ang tanan sa mapuslanon nga pagkahimtang.

Salmo sa Pagsabat:

Mga Salmo 119:89, 90, 91, 130, 135, 175

(S) Ang imo pulong, O Ginoo, magapadayon sa walay katubtoban.

Ang imo pulong, O Ginoo, magapadayon sa walay katubtoban; kay napasad ini sing malig-on sa langit. (S)

Ang imo katutom nagapadayon sa tanan nga panahon; ginpahamtang mo ang duta sa iya duog kag ini nagapadayon. (S)

Ang tanan nga mga butang nagapadayon tubtob karon tungod sang imo sugo, kay ini tanan imo mga alagad. (S)

Ang kasaysayan sang imo mga pagtulon-an nagahatag sing kapawa, kag nagahatag sing kaalam sa mga wala sing tinun-an. (S)

Mag-upod ka sa akon, kag tudloi ako sang imo mga kasugoan. (S)

Hatagi ako sing kabuhi, agod makadayaw ako sa imo; kabay nga ang imo mga pagtudlo magbulig sa akon! (S)

Aleluya:

Juan 15:5

   Ako amo ang Puno sang ubas, kamo ang mga sanga, siling sang Ginoo ang nagapabilin sa akon, kag ako sa iya, magapamunga sing madamo.

Ang Pagbasa sang Santos nga Ebanghelyo suno kay:

San Lucas 17:20-25

   May mga Fariseo nga nagpamangkot kay Jesus kon san-o magaabot ang Ginharian sang Dios. Nagsabat sia sa ila, “Indi mahibal-an ang pag-abot sang Ginharian sang Dios. Wala sing makasiling, ‘Tan-awa ninyo, yari diri!’ ukon ‘Yadto didto!’ kay ang Ginharian sang Dios yara sa inyo.” 

   Dayon nagsiling sia sa mga gintuton-an, “Magaabot ang mga inadlaw nga magahandom kamo sa pagtan-aw sang isa sang mga inadlaw sang Anak sang Tawo, pero indi ninyo ini makita. May magasiling sa inyo, ‘Tan-awa, yadto didto!’ ukon, ‘Tan-awa, yari diri.’ Pero indi kamo magkadto sa pagpangita sini. Subong nga ang kilat nagaidlab kag nagapasanag sang langit halin sa pihak tubtob sa pihak, mangin-amo man ang Anak sang Tawo sa iya pag-abot. Ugaling dapat sia anay mag-antos sing madamo kag pagasikwayon sang mga tawo sa sini nga panahon.

Nobyembre 13 | Nobyembre 15