"Ang Bisan Sin-o nga Magkaon sini nga Tinapay, Magakabuhi sing Dayon"

Liturhiya sang Pulong

(Huwebes, Abril 30, 2020)

San Pio V, Papa

Ang Pagbasa gikan sa mga:

Binuhatan sang mga Apostoles 8:26-40

   Ang isa ka anghel sang Ginoo naghambal kay Felipe, “Mag-aman ka kag magkadto sa bagatnan nayon, sa dalan nga halin sa Jerusalem pakadto sa Gaza.” (Ini nga dalan wala na ginaagyi.) Gani naghimos si Felipe kag naglakat. Karon may isa ka tawo nga kapon nga taga-Etiopia nga nagapauli sa iya banwa. Ini sia isa ka mataas nga opisyal nga amo ang ginatugyanan sang manggad sang Rayna ukon Candace sang Etiopia. Didto sia maghalin sa Jerusalem sa diin nagsimba sia sa Dios. Nagapauli sia nga nagasakay sa iya karuwahi kag nagabasa sang libro ni Isaias nga propeta. Ang Espiritu Santo nagsiling kay Felipe, “Kadtoi kag tupari ang karuwahi.” Nagdalagan si Felipe kag nalambot niya ang karuwahi, kag nabatian niya nga nagabasa sia sang libro ni Isaias nga propeta. Ginpamangkot sia ni Felipe, “Nahangpan mo bala ang imo ginabasa?”

   Nagsabat ang opisyal, “Ano ang pagkahangop ko kon wala sing may magsaysay sini sa akon?” Kag gin-agda niya si Felipe sa pagsakay upod sa iya. Amo ini ang bahin sang kasulatan nga ginabasa niya: 

“Kaangay sia sang karnero 

Nga ginadala sa ilihawan, 

Kaangay sia sang cordero 

Nga nagahipos lang 

Samtang ginaguntingan sia 

Sang iya mga bulbol. 

Wala sia magtikab sang iya baba.

Ginpakahuy-an sia 

Kag wala paghatagi sing hustisya. 

Wala sing may makasugid 

Nahanungod sang iya kaliwatan, 

Kay natapos na ang iya kabuhi 

Sa sini nga duta.”

   Nagsiling ang opisyal kay Felipe, “Sugiri ako, sin-o bala ang ginapatungdan sini sang propeta? Ang iya kaugalingon ukon may iban pa?” Gani, halin sa sining dinalan sang kasulatan, ginsaysay ni Felipe sa iya ang Maayong Balita nahanungod kay Jesus. Sang nagapadayon sila sa ila dalanon, nakaabot sila sa isa ka duog nga may tubig. Nagsiling ang opisyal, “May tubig diri. May kabangdanan pa bala nga indi ako mabautisohan?”

   [Nagsiling si Felipe sa iya, “Sarang ka na mabautisohan kon nagatuo ka sa bug-os mo nga tagipusoon.” 

   Nagsabat ang opisyal, “Huo, nagatuo ako nga si Jesu-Cristo amo ang Anak sang Dios.”]

   Ginpadulog sang opisyal ang karuwahi kag naglusong sila nga duha sa tubig kag ginbautisohan sia ni Felipe. Sang pagtakas nila gindala si Felipe sang Espiritu sang Ginoo, kag wala na sia makita sang opisyal. Dayon nagpauli ang opisyal nga puno sang kalipay. Sang makamarasmas si Felipe didto na sia sa Asdod. Dayon nagwali sia sang Maayong Balita sa mga banwa nga iya gin-agihan tubtob nga nakaabot sia sa Cesarea.

Salmo sa Pagsabat:

Mga Salmo 66:8-9, 16-17, 20

(S) Dayawa ninyo ang Dios nga may paghinugyaw, tanan kamo nga mga katawhan!

Dayawa ang aton, Dios, tanan nga mga kapungsoran, ipabati ang inyo pagdayaw sa iya, tubtob karon iya kita ginbuhi, kag wala magtugot nga mapukan kita. (S)
Kari kag magpamati, tanan kamo nga nagatahod sa Dios, kag sugiran ko kamo kon ano ang iya ginhimo sa akon. Nagpangayo ako sa iya sing bulig; handa ako sa pagdayaw sa iya sa mga ambahanon. (S)
Ginadayaw ko ang Dios, kay wala niya ginsikway ang akon pangamuyo, ukon ginkuha ang iya mapinadayunon nga gugma sa akon. (S)

Aleluya:

Juan 6:51

   Ako amo ang buhi nga tinapay nga naghalin sa langit, siling sang Ginoo. Ang bisan sin-o nga nagakaon sini nga tinapay magakabuhi sing dayon.

Ang Pagbasa sang Santos nga Ebanghelyo suno kay:

San Juan 6:44-51

   Wala sing may makakari sa akon, kon indi sia pagbuyokon sang Amay nga nagpadala sa akon, kag banhawon ko sia sa katapusan nga adlaw. Ang mga propeta nagsulat, ‘Pagatudloan sang Dios ang tanan nga mga tawo.’ Ang tagsatagsa nga nagapamati kag nagatuo sa Amay nagakari sa akon. Wala ini nagakahulogan nga may nakakita sa Amay. Sia nga naghalin sa Dios amo lang ang nakakita sa Amay. Nagasiling ako sa inyo sang matuod: ang nagatuo may kabuhi nga wala sing katapusan. Ako amo ang tinapay sang kabuhi. Ang inyo mga katigulangan nagkaon sang mana sa desierto, pero nagkalamatay sila. Pero ang nagakaon sang tinapay nga naghalin sa langit indi mapatay. Ako amo ang buhi nga tinapay nga naghalin sa langit. Ang bisan sin-o nga magkaon sini nga tinapay magakabuhi sing dayon; kag ang tinapay nga akon ihatag amo ang akon unod, nga akon ginahatag para sa kabuhi sang kalibutan.”

Abril 29 | Mayo 1