Sin-o ang Labing Daku?

Liturhiya sang Pulong

(Domingo, Enero 19, 2020)

Piesta ni Señor Santo Niño

1. Ang Pagbasa gikan sa Libro ni:

Isaias nga Propeta 9:1-6

   Ang duta sang tribo ni Zabulon kag ni Neftali sang una ginpakahuy-an, pero ang palaabuton magadala sang kadungganan sa sini nga kadutaan halin sa Mediteraneo, pakadto sa sidlangan sa duta sa tabok sang Jordan, pa Galilea, sa diin nagapuyo ang mga dumoluong. 

     Ang mga tawo nga nagalakat 

     sa kadudolman nakakita 

     sing daku nga kapawa! 

     Nagapuyo sila sa duta sang mga landong, 

     pero karon ang kapawa nagasilak sa ila. 

     O Ginoo, ginhatagan mo sila sing daku nga kalipay; 

     ginhimo mo nga magmalipayon sila. 

     Magahugyaw sila sa imo ginhimo, 

     subong sang paghinugyaw 

     sang mga tawo nga nagaani, 

     ukon magpartida sila 

     sang inagaw nga mga manggad. 

     Kay ginbali mo ang gota 

     nga nagapabug-at sa ila 

     kag ang baston 

     nga naghanot sang ila mga abaga. 

     Ikaw, O Ginoo, ang naglutos sang pungsod 

     nga nagpigos kag nagpamintaha 

     sang imo mga tawo 

     subong sang imo paglutos 

     sadto anay sang mga hangaway sang Midian. 

     Ang mga botas sang nagpanggubat 

     nga mga hangaway, 

     kag ang tanan nila nga mga bayu 

     nga nabulit sang dugo, 

     pagasunogon sa kalayo! 

     Ang isa ka bata matawo sa aton! 

     Ang isa ka anak ginhatag sa aton! 

     Kag sia ang aton manginpangulo. 

     Pagatawgon sia, “Maalam nga Manuglaygay,” 

     “Gamhanan nga Dios,” 

     “Amay nga wala sing Katubtoban,” 

     “Amay sang Paghidait.”

Salmo sa Pagsabat:

Mga Salmo 97:1, 2-3, 3-4, 5-6 

(S) Ang Ginoo amo ang hari! Magkalipay ka, O duta!

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! (S) 

Ang mga panganod kag kadudohnan yara sa palibot niya; ang iya ginharian napasad sa katarungan kag hustisya. Ang kalayo nagauna sa iya, kag nagasunog sa iya mga kaaway sa palibot niya. (S) 

Ang iya kilat nagapasanag sang kalibutan; ang duta nakakita sini kag nagakurog. (S) 

Ang mga bakulod nagakatunaw subong sang kandila sa atubangan sang Ginoo, sa atubangan sang Ginoo sang bug-os nga duta. Ang kalangitan nagabantala sang iya pagkamatarong, kag ang tanan nga katawohan nakakita sang iya himaya. (S) 

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 1:3-6, 15-18

   Magpasalamat kita sa Dios kag Amay sang aton Ginoong Jesu-Cristo! Kay iya kita ginbugayan sa aton paghiusa kay Cristo, paagi sa paghatag sa aton sang tagsa ka espirituhanon nga mga bugay gikan sa kalangitan. Sa wala pa matuga ang kalibutan, ginpili na kita sang Dios nga mangin-iya sa kay Cristo, agod manginbalaan kita kag wala sing kasawayan sa iya atubangan. Tungod sang iya gugma, ang Dios nagpat-od na nga daan nga paagi kay Jesu-Cristo, kita mangin-iya mga anak. Amo ini ang iya nahamut-an kag kabubot-on. Dayawon ta ang Dios tungod sang iya mahimayaon nga grasya, nga iya ginhatag sa aton paagi sa iya hinigugma nga Anak! 

    Sa sini nga kabangdanan, halin sang pagkabati ko nahanungod sang inyo pagtuo kay Ginoong Jesus kag sang inyo gugma sa mga tumoluo, wala ako mag-untat sa pagpasalamat sa Dios tungod sa inyo. Ginadumdom ko kamo sa akon mga pangamuyo, kag nagapangayo ako sa Dios sang aton Ginoong Jesu-Cristo, ang mahimayaon nga Amay, nga iya ihatag sa inyo ang Espiritu, nga amo ang magahatag sa inyo sing kaalam kag magapahayag sa inyo sang Dios, agod nga makilala ninyo sia. Nagapangayo ako nga ang inyo mga hunahona mabuksan kag makita ninyo ang iya kapawa, agod inyo mahibaluan kon ano ang paglaom sang iya pagtawag sa inyo, kon daw ano ka bugana ang makatilingala nga mga panublion nga iya ginasaad sa iya mga tumoluo.

Aleluya:

     Dayawon ang Imo labing santos nga ngalan; himaya-on kag bansagon Ikaw sa gihapon.

Ang Pagbasa sang Santos nga Ebanghelyo suno kay:

San Mateo 18:1-5, 10

   Sa sadto nga tion nagpalapit ang mga gintuton-an kay Jesus kag nagpamangkot, “Sin-o bala ang labing daku sa Ginharian sang langit?”

   Gintawag ni Jesus ang isa ka diutay nga bata kag ginpatindog sia sa ila atubangan, kag nagsiling, “Dumdoma ninyo ini! Kon indi kamo magbaylo kag manginkaangay sa magamay nga mga kabataan, indi gid kamo makasulod sa Ginharian sang langit. Gani ang nagapaubos sang iya kaugalingon kag manginkaangay sining diutay nga bata, amo ang labing daku sa Ginharian sang langit. Kag ang nagabaton sang kasubong sining diutay nga bata sa akon ngalan nagabaton sa akon.”

   “Mag-andam kamo nga indi ninyo matamay ang isa sining magamay nga mga kabataan. Nagasiling ako sa inyo nga ang ila mga anghel sa langit yara pirme sa atubangan sang akon Amay nga langitnon. 

Enero 18 | Enero 20