Magsiling Kamo ‘Huo’ ukon ‘Indi’

Liturhiya sang Pulong

(Sabado, Hunyo 15, 2019)

Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 5:14-21

   Kay ginagamhan kami sang gugma ni Cristo, karon nga nakilala namon nga may isa ka tawo nga nagpanginmatay para sa tanan nga mga tawo, kag ini nagakahulogan nga ang tanan nga mga tawo nagpakig-ambit sa iya kamatayon. Nagpanginmatay sia para sa tanan nga mga tawo, agod nga ang nagakabuhi indi na magkabuhi para sa ila kaugalingon, kundi para lang sa iya nga napatay kag ginbanhaw tungod sa ila.

   Gani, wala na kami nagahukom sa bisan kay sin-o suno sa tawuhanon nga talaksan. Bisan nga sang una naghukom kami kay Cristo suno sa tawuhanon nga talaksan, karon wala na kami nagahimo sina. Ang bisan sin-o nga nahiusa kay Cristo bag-o na sia nga tinuga—ang daan wala na, ang tanan bag-o na. Ini tanan ginhimo sang Dios, nga paagi kay Cristo nangin-abyan niya kita bisan nga sang una mga kaaway niya kita, kag naghatag sa aton sang obra sa paghimo sa iban nga iya man mga abyan. Amo ini ang amon mensahi nga ang Dios nagahimo sang tanan nga mga tawo nga iya mga abyan paagi kay Cristo. Ang Dios wala mag-isip sang ila mga sala batok sa ila, kag naghatag sia sa amon sang mensahi kon paano niya sila mahimo nga mga abyan.

   Gani, yari kami karon nagahambal para kay Cristo. Kag subong nga ang Dios gid nagapakiluoy sa inyo paagi sa amon, sa ngalan ni Cristo, nagapakiluoy man kami sa inyo nga pahanugotan ninyo ang Dios sa paghimo sa inyo nga mga abyan niya bisan nga sang una mga kaaway niya kamo! Si Cristo wala gid sing sala, pero ginpatungod sang Dios sa iya ang aton mga sala, agod sa aton paghiusa sa iya, maambit naton ang pagkamatarong sang Dios.

Salmo sa Pagsabat:

Mga Salmo 103:1-2, 3-4, 9-10, 11-12

(S) Ang Ginoo maluloy-on kag mahigugmaon.

Dayawa ang Ginoo, O kalag ko! Dayawa ang iya balaan nga ngalan, O bug-os ko nga tagipusoon! Dayawa ang Ginoo, O kalag ko! Kag indi pagkalimti kon daw ano ang iya kaayo. (S)
Ginapatawad niya ang tanan ko nga mga sala, kag ginaayo niya ang tanan ko nga mga balatian. Ginaluwas niya ako sa lulobngan kag ginalikupan niya ako sang gugma kag kaluoy. (S)
Ang Ginoo maluluy-on kag mahigugmaon, indi madali mangakig kag puno sing mapinadayunon nga gugma. Wala sia nagasaway sing dalayon; ang iya pagpangakig wala nagapadayon. (S)
Subong sang kataas sang langit sa ibabaw sang duta, amo man kadaku ang iya paghigugma sa mga nagapasidungog sa iya. Subong sang kalayuon sang sidlangan sa nakatundan, amo man kalayo ang iya pagpahilayo sang aton mga sala sa aton. (S)

Aleluya:

Mga Salmo 119:36, 29

Hatagi ako sing handom sa pagtuman sang Imo mga pagsulondan, O Dios, kag sa Imo kaayo tudlo-i ako sang Imo kasugoan.

Ang Pagbasa sang Santos nga Ebanghelyo suno kay:

San Mateo 5:33-37

   “Inyo man nabatian ang ginsiling sang una sa inyo mga katigulangan, ‘Indi ka magsumpa sang indi mo man lang pagtumanon, kundi tumanon mo ang imo ginsumpa sa Ginoo.’ Pero karon nagasiling ako sa inyo: indi kamo magpanumpa kon magsaad kamo. Indi gid kamo magsumpa nga nagasiling, ‘Saksi ko ang langit,’ kay amo ini ang trono sang Dios; ukon magsiling, ‘Saksi ko ang duta,’ kay amo ini ang tulongtongan sang iya mga tiil; ukon magsiling, ‘Saksi ko ang Jerusalem,’ kay amo ini ang siyudad sang gamhanan nga Hari. Indi ka man magpanumpa nga nagasiling, ‘Bisan utdan pa ako sang ulo,’ kay indi ikaw makapaputi ukon makapaitom sang bisan isa lang ka nahot nga buhok. Magsiling kamo ‘Huo’ ukon ‘Indi’ kay ang bisan ano pa nga dugang sini, nagagikan sa Yawa.”

Hunyo 14 | Hunyo 16