"Nag-ayo ang mga Mata sang Bulag, kag Makakita na sia sing Maathag gid sang Tanan"

Liturhiya sang Pulong

(Miyerkules, Pebrero 19, 2020)

Ika-6 nga Semana sang Tuig

 Ang Pagbasa gikan sa Sulat ni:

Santiago nga Apostol 1:19-27

   Dumdoma ninyo ini, hinigugma ko nga mga utod! Magmaabtik kamo sa pagpamati, pero indi kamo magdasudaso sa paghambal kag indi magmadali sa pagpangakig. Kay ang kaakig sang tawo indi makatigayon sa paglambot sang matarong nga tinutoyo sang Dios. Gani, bayai ninyo ang inyo mahigko nga pamatasan kag ang inyo malaut nga pagginawi. Itugyan ang inyo kaugalingon sa Dios kag batuna ninyo ang pulong nga iya ginatanom sa inyo mga tagipusoon, nga sarang makaluwas sa inyo.

   Indi pagbuanga ang inyo kaugalingon paagi sa pagpamati lamang sang iya mga pulong, kundi ibutang ninyo ini sa buhat. Kay ang nagapamati sa pulong kag wala niya ini ginabutang sa buhat kaangay sa isa ka tawo nga nagapang-espeho kag makita niya ang iya kaugalingon nga kahimtangan. Ginatan-aw niya ang iya kaugalingon kag dayon nagalakat, kag sa gilayon malipatan niya kon daw ano ang iya hitsura. Pero ang tawo nga nagausisa sing maid-id sang himpit nga kasugoan nga nagahilway sa mga tawo, kag nagapadayon sa pagbantay sini, kag indi lamang nagapamati kag nagakalimot sini, kundi iya ini ginabutang sa buhat, ina nga tawo pagabendisyunan sang Dios sa iya mga ginahimo.

   Kon ang isa ka tawo nagahunahona nga sia diosnon, pero wala nagapugong sang iya dila, ang pagtuloohan sini nga tawo wala sing pulos kag ginalimbungan lang niya ang iya kaugalingon. Amo ini ang ginakabig sang Dios nga Amay nga putli kag wala sing dagta nga pagtuloohan: ang pagsapupo sa mga ilo kag sa mga balo sa ila pag-antos, kag ang bisan sin-o nga nagatipig sang iya kaugalingon sa mga kagarukan sang kalibutan.

Salmo sa Pagsabat:

Mga Salmo 15:2-3, 3-4, 5

(S) O Ginoo, sin-o bala ang makapuyo sa imo Templo?

Ang tawo nga nagatuman sa Dios sa tanan nga bagay, kag nagahimo sa gihapon sing matarong, nga nagahambal sing matuod kag tinagipusoon, kag wala nagabutangbotang sa iban. Wala sia nagahimo sing malain sa iya mga abyan. (S)

Wala nagapatupato sing malain sa iya isigkatawo. Ginatamay niya ang mga ginasikway sang Dios, pero iya ginapadunggan ang mga nagatuman sa Ginoo. (S)

Nagapahulam sia nga wala nagapasaka, kag indi sia mahamhaman sa pagpanaksi batok sa wala sing sala. Ang tawo nga nagahimo sini indi gid malingkang. (S)

Aleluya:

Efeso 1:17-18

   Kabay nga mapasanag sang Amay sang aton Ginoong Jesukristo ang aton painuino, agod aton mahibaluan kon ano ang paglaum sang Iya pagtawag sa aton.

Ang Pagbasa sang Santos nga Ebanghelyo suno kay:

San Marcos 8:22-26

   Karon nag-abot sila sa Betsaida. May mga tawo didto nga nagdala sang isa ka bulag kay Jesus kag nagpakiluoy sa iya nga iya sia tandugon. Gin-uyatan ni Jesus ang bulag sa kamot kag gintuytoyan pa gwa sa baryo. Sang malamhitan ni Jesus sang dupla ang mga mata sang bulag, gintungtong niya ang iya mga kamot sa bulag kag magpamangkot, “May makita ka bala?”

   Nagtangla ang tawo kag nagsiling, “May Makita ako nga mga tawo, pero daw mga kahoy sila nga nagalakatlakat.”

   Ginbutang liwat ni Jesus ang iya mga kamot sa mga mata sang bulag. Sa sini nga tion naghimutad gid ang tawo kag nag-ayo ang iya mga mata, kag makakita na sia sing maathag gid sang tanan. Ginpapauli sia ni Jesus kag ginsingganan, “Indi ka magbalik sa baryo.”

Pebrero 18 | Pebrero 20