Sunday, February 16, 2020

MGA SALMO - Kapitulo 119

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30
31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60
61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90
91 92 93 94 95 96 97 98 99 100 101 102 103 104 105 106 107 108 109 110 111 112 113 114 115
136 137 138 139 140 141 142 143 144 145 146 147 148 149 150 
Ang Kasugoan sang Ginoo
1 Bulahan ang mga wala sing dagta sa ila kabuhi, 
     nga nagakabuhi suno sa kasugoan sang Ginoo.
2 Bulahan sila nga nagasunod sang iya mga sugo, 
     nga nagatuman sa iya sa bug-os nila nga tagipusoon.
3 Matuod gid nga wala sila nagasayop; 
     nagalakat sila sa mga dalanon sang Ginoo.
4 O Ginoo, ginhatag mo sa amon ang imo mga kasugoan, 
     kag nagsugo sa amon sa pagtuman sini sing matutom.
5 Daku gid ang akon handom nga manginmatutom ako 
     sa pagtuman sang imo mga pagsulondan!
6 Kon tumanon ko ang tanan mo nga mga sugo, 
     ti indi ako mapaslawan.
7 Sa akon pagtuon sang imo matarong nga mga pagsulondan, 
     magadayaw ako sa imo sa putli nga tagipusoon.
8 Magatuman ako sang imo mga kasugoan, 
     indi gid ako pagpatumbayai!
Pagtuman sa Kasugoan sang Ginoo
9 Paano ang pagtipig sang isa ka pamatan-on sang iya kabuhi nga manginputli? 
     Paagi sa pagtuman sang imo mga sugo.
10 Sa bug-os ko nga tagipusoon nagtinguha ako sa pag-alagad sa imo, 
       buligi ako nga indi magmalalison sa imo mga sugo!
11 Ginatipigan ko ang imo kasugoan sa akon tagipusoon, 
       agod indi ako makasala batok sa imo.
12 Ginadayaw ko ikaw, O Ginoo: 
       tudloi ako sang imo mga pagsulondan!
13 Ihambal ko sing mabaskog 
       ang tanan nga mga kasugoan nga ginhatag mo.
14 Nagakalipay ako sa pagsunod sang imo mga sugo, 
       labi sang sa pag-angkon sa madamo nga mga manggad.
15 Nagapamalandong ako sang imo mga sugo,
       ginausisa ko ang imo mga pagtudlo.
16 Nagakalipay ako sa imo mga kasugoan, 
       indi ko pagkalimtan ang imo mga sugo.
Kalipay sa Kasugoan sang Ginoo
17 Magmaayo ka sa akon nga imo alagad,
       agod nga magkabuhi ako kag magtuman sang imo mga pagtudlo.
18 Buksi ang akon mga mata, agod nga makakita ako 
       sang makatilingala nga mga kamatuoran sa imo kasugoan.
19 Umalagi lang ako sa sining kalibutan; 
       indi pagtagoa ang imo mga sugo sa akon!
20 Ang akon dughan nagapin-ot sa daku nga handom, 
       sa paghibalo sa tanan nga tion sang imo mga pagsulondan.
21 Ginasabdong mo ang bugalon;
       pinakamalaut ang mga nagabiya sang imo mga sugo.
22 Hilwaya ako sa ila pagpakahuya kag pagtamay,
       kay gintuman ko ang imo mga kasugoan.
23 Bisan ang mga pangulo nagasinapol kag nagahimbon batok sa akon,
       ako nga imo alagad magapamalandong sang imo mga pagsulondan.
24 Ang imo mga pagtudlo nagahatag sa akon sing kalipay; 
       sila amo ang akon mga manuglaygay.
Pagtapat sa Pagtuman sang Kasugoan sang Ginoo
25 Nagahamyang ako sa yab-ok nga nalutos; 
       buhia ako liwat, suno sa imo ginsaad!
26 Gintuad ko ang tanan ko nga ginhimo, kag ginsabat mo ako; 
       tudloi ako sang imo mga pagsulondan!
27 Tudloi ako sa pagtuman sang imo mga kasugoan, 
       kag ako magapamalandong sang imo makatilingala nga mga pagtudlo.
28 Daw malumos ako sa kalisod; 
       pabakura ako suno sa imo ginsaad.
29 Buligi ako nga indi magtalang, 
       kag sa imo kaayo tudloi ako sang imo kasugoan.
30 Nagtapat ako nga magmasinulondon; 
       gintuman ko ang imo mga pagsulondan.
31 Ginsunod ko ang imo mga pagtudlo, O Ginoo, 
       indi pag-itugot nga mapaslawan ako!
32 Magatuman ako nga may kakunyag sang imo mga sugo, 
       kay ikaw magadugang sang akon paghangop.
Pangamuyo agod Makahangop
33 Tudloi ako, O Ginoo, sang kahulogan sang imo mga kasugoan,
       kag tumanon ko sila sa tanan nga tion.
34 Isaysay sa akon ang imo kasugoan, kag akon ini tumanon; 
       tipigan ko ini sa bug-os ko nga tagipusoon.
35 Tuytoyi ako sa dalanon sang imo mga sugo,
       kay sa ila may kalipayan ako.
36 Hatagi ako sing handom sa pagtuman sang imo mga pagsulondan, 
       sa baylo sang handom nga magmanggaranon.
37 Ilikaw ang akon igtalupangod sa wala sing pulos; 
       magmaayo ka sa akon suno sa imo ginsaad.
38 Tumana ang imo saad sa akon nga imo alagad, 
       ang imo ginasaad sa mga nagatahod sa imo.
39 Luwasa ako sa mga pasipala nga akon ginakahadlukan; 
       daw ano kanami sang imo mga pagsulondan!
40 Luyag ko magtuman sang imo mga sugo, 
       tungod kay ikaw matarong, hatagi ako sing bag-o nga kabuhi!
Pagsalig sa Kasugoan sang GINOO
41 Ipakita sa akon kon daw ano ang paghigugma mo sa akon, O Ginoo, 
       kag luwasa ako suno sa imo saad.
42 Dayon makasabat ako sa mga nagapasipala sa akon, 
       kay nagasalig ako sa imo pulong.
43 Hatagi ako sang ikasarang sa paghambal sang matuod nga mga pulong sa tanan nga tion, 
       kay ang akon paglaom yara sa imo mga paghukom.
44 Tumanon ko sa gihapon ang imo kasugoan, 
       sa walay katubtoban!
45 Magakabuhi ako sa bug-os nga kahilwayan, 
       kay nagtinguha ako sa pagtuman sang imo mga pagsulondan.
46 Ibantala ko ang imo mga sugo sa mga hari, 
       kag indi ako magkahuya.
47 Nagakalipay ako sa pagtuman sang imo mga kasugoan, 
       kay ginahigugma ko ini.
48 Ginatahod kag ginahigugma ko ang imo mga sugo; 
       magapamalandong ako sa imo mga pagtudlo.
Pagtuman sa Kasugoan sang GINOO
49 Dumdoma man ang imo saad sa akon nga imo alagad; 
       naghatag ini sing paglaom sa akon.
50 Bisan sa akon pag-antos ginlipay ako, 
       kay ang imo saad naghatag sa akon sing kabuhi.
51 Ang mga bugalon nagyubit sa akon,
       apang wala ako magbiya sa imo kasugoan.
52 Ginadumdom ko ang mga pagsulondan nga ginhatag mo anay sa akon, 
       kag nagalipay ini sa akon, O GINOO.
53 Naakig gid ako, 
       sang makita ko ang malaut nga nagalapas sang imo kasugoan.
54 Sa akon pagkabuhi nga malayo sa akon kaugalingon nga puloy-an, 
       nagakomposo ako nahanungod sang imo mga sugo,
55 Sa kagab-ihon ginapanumdom ko ikaw, O Ginoo, 
       kag ginatuman ko ang imo kasugoan.
56 Amo ini ang akon kalipay: 
       ang pagtuman sang imo mga sugo.
Katutom sa Kasugoan sang GINOO
57 Ikaw gid lang, O GINOO, ang akon ginahandom; 
       nagasaad ako sa pagtuman sang imo mga kasugoan.
58 Ginapangabay ko ikaw sa bug-os ko nga tagipusoon; 
       kaluoyi man ako, suno sa imo ginsaad!
59 Gin-usisa ko ang akon pagginawi, 
       kag nagasaad ako sa pagsunod sang imo mga pagsulondan.
60 Nagadalidali ako kag wala nagahinayhinay 
       sa pagtuman sang imo mga kasugoan.
61 Ang mga malaut nagsambod sa akon sing hugot sang ila lubid, 
       pero wala ako nagakalipat sang imo kasugoan.
62 Sa tungang gab-i nagamata ako 
       sa pagdayaw sa imo tungod sang imo matarong nga mga paghukom.
63 Abyan ako sang tanan nga nagaalagad sa imo, 
       sang tanan nga nagatuman sang imo mga kasugoan.
64 O Ginoo, ang duta puno sang imo mapinadayunon nga gugma; 
       tudloi ako sang imo mga sugo.
Ang Kapuslanan sang Kasugoan sang Ginoo
65 O Ginoo, gintuman mo ang imo saad, 
       kag maayo ikaw sa akon nga imo alagad.
66 Hatagi man ako sing kaalam kag ihibalo, 
       kay nagasalig ako sa imo mga sugo.
67 Sa wala mo pa ako pagsiluti nagtalang ako,
       pero karon ginatuman ko ang imo pulong.
68 Daw ano kaayo kag kamaluloy-on sa imo; 
       tudloi ako sang imo mga sugo!
69 Ang bugalon nga mga tawo nagsugid sing binutig nahanungod sa akon, 
       pero gintuman ko ang imo mga pagsulondan sa bug-os ko nga tagipusoon.
70 Ini nga mga tawo wala sing paghangop,
       pero nagakalipay ako sa imo kasugoan.
71 Ang akon silot maayo para sa akon,
       kay ini nagtudlo sa akon sa pagtuon sang imo mga sugo.
72 Ang kasugoan nga imo ginahatag labi pa sa akon sang sa tanan 
       nga pilak sa kalibutan.
Matarong ang Kasugoan sang Ginoo
73 Gintuga mo ako, kag gintipigan nga indi maano; 
       hatagi ako sing paghangop, agod nga makatuon ako sang imo mga kasugoan.
74 Ang mga nagatahod sa imo magakasadya kon makita nila ako,
       kay nagasalig ako sa imo saad.
75 O Ginoo, nakahibalo ako nga ang imo mga pagsulondan matarong, 
       kag ginsilutan mo ako kay ikaw matutom.
76 Lipaya ako sang imo mapinadayunon nga gugma, 
       suno sa imo ginsaad sa akon nga imo alagad.
77 Kaluoyi ako, kag ako magakabuhi, 
       kay nagakalipay ako sa imo kasugoan.
78 Kabay nga ang mga bugalon mahuy-an tungod sang ila binutig nga pagsumbong batok sa akon, 
       ako akon magapamalandong sa imo mga pagsulondan.
79 Kabay nga ang mga nagatahod sa imo 
       kag ang mga nakahibalo sang imo mga sugo magkari sa akon.
80 Kabay nga tumanon ko sing himpit ang imo mga sugo, 
       kag malikaw ako sa kahuloy-anan sang pagkalutos.
Pangamuyo agod Luwason
81 Ginalapyo na ako, O Ginoo, sa paghulat sang imo pagluwas sa akon, 
       nagasalig ako sa imo pulong.
82 Ang akon mga mata ginakapoy na sa pagpaabot sang imo saad, 
       samtang nagapamangkot ako, "San-o mo bala ako buligan?”
83 Wala na ako sing pulos kaangay sang indi na maggamit nga panit nga sulodlan sang bino,
       pero wala ko pagkalimti ang imo mga sugo.
84 Tubtob san-o pa bala ang akon paghulat? 
       San-o mo bala silutan ang mga nagahingabot sa akon?
85 Ang bugalon nga mga tawo nga wala nagatuman sang imo kasugoan, 
       nagkutkot sing mga tugalbong sa pagdakop sa akon.
86 Ang tanan mo nga mga sugo masaligan; 
       buligi man ako, kay ang mga tawo nagahingabot sa akon paagi sa mga kabutigan!
87 Diutayan na lang nila ako mapatay, 
       pero wala ako magbiya sa imo mga pagsulondan.
88 Tungod sang imo mapinadayunon nga gugma, magmaayo ka sa akon, 
       agod matuman ko ang imo mga kasugoan.
Pagtuo sa Kasugoan sang GINOO
89 Ang imo pulong, O Ginoo, magapadayon sa walay katubtoban;
       kay napasad ini sing malig-on sa langit.
90 Ang imo katutom nagapadayon sa tanan nga panahon; 
       ginpahamtang mo ang duta sa iya duog kag ini nagapadayon.
91 Ang tanan nga mga butang nagapadayon tubtob karon tungod sang imo sugo, 
       kay ini tanan imo mga alagad.
92 Kon ang imo kasugoan indi amo ang ginahalinan sang akon kalipay, 
       kuntani napatay na ako tungod sang akon silot.
93 Indi ko gid pagpatumbayaan ang imo mga pagsulondan, 
       kay paagi sa ila ginbuhi mo ako.
94 Imo ako—gani luwasa ako! 
       Gintinguhaan ko ang pagtuman sang imo mga sugo.
95 Ang malaut nga mga tawo nagahulat sa pagpatay sa akon, 
       pero magapamalandong ako sang imo mga kasugoan.
96 Natalupangdan ko nga wala sing bisan ano nga himpit, 
       pero ang imo sugo wala sing dulonan.
Paghigugma sa Kasugoan sang GINOO
97 Daw ano ang paghigugma ko sang imo kasugoan! 
       Ginapamalandungan ko ini sa bug-os nga adlaw.
98 Ang imo sugo yari sa akon sa tanan nga tion, 
       kag nagahimo ini sa akon nga maalam pa sang sa tanan ko nga mga kaaway.
99 Makahangop ako sing labaw pa sang sa tanan ko nga mga manunodlo,
       kay ginapamalandungan ko ang imo mga pagtudlo.
100 Labi pa ang akon kaalam sang sa tigulang nga mga tawo, 
         kay ginatuman ko ang imo mga sugo.
101 Ginlikawan ko ang tanan nga malain nga pagginawi, 
         kay luyag ako magtuman sang imo pulong.
102 Wala ko ginpatumbayai ang imo mga pagtudlo, 
         kay ikaw gid ang nagtudlo sa akon.
103 Daw ano katam-is sang lalim sang imo mga pagsulondan; 
         matam-is pa sila sang sa dugos!
104 Nagakuha ako sing kaalam gikan sa imo mga kasugoan,
         gani ginadumtan ko ang tanan nga malain nga pagginawi.
Kapawa gikan sa Kasugoan sang Ginoo
105 Ang imo pulong isa ka suga nga nagatuytoy sa akon mga tiil, 
         kag kapawa sa akon alagyan.
106 Tumanon ko ang akon ginsumpa 
         sa pagsunod sang imo matarong nga mga pagtudlo.
107 O Ginoo, tama gid ang akon mga pag-antos; 
         buhia ako, suno sa imo ginsaad!
108 Batuna ang akon pangamuyo sa pagpasalamat, O Ginoo, 
         kag tudloi ako sang imo mga sugo.
109 Handa ako sa tanan nga tion sa pagtaya sang akon kabuhi sa katalagman; 
         wala ako malipat sang imo kasugoan.
110 Ang malaut nga mga tawo nagbutang sing siod sa akon, 
         pero wala ako naglalis sang imo mga sugo.
111 Ang imo mga sugo amo ang akon mga pagkabutang nga wala sing katubtoban, 
         sila amo ang kalipay sang akon tagipusoon.
112 Nagtapat ako sa pagtuman sang imo mga pagsulondan, tubtob sa adlaw sang akon kamatayon.
Kalig-unan sa Kasugoan sang GINOO
113 Ginadumtan ko ang mga indi mainunongon sa imo, 
         pero ginahigugma ko ang imo kasugoan.
114 Ikaw ang akon mananabang kag mangangapin, 
         nagalaom ako sa imo saad.
115 Palayo kamo sa akon, kamo nga mga makasasala! 
         Tumanon ko ang mga sugo sang akon Dios.
116 Hatagi ako sing kusog suno sa imo ginsaad, kag magakabuhi ako, 
         indi man pag-itugot nga mapaslawan ako sa akon paglaom!
117 Uyati ako, kag indi ako maano, 
         kag talupangdon ko sa gihapon ang imo mga sugo.
118 Ginasikway mo ang tanan nga nagalalis sang imo mga kasugoan; 
         ang ila malimbungon nga pahito wala sing pulos.
119 Ang mga malaut ginakabig mo nga sagbot, 
         gani ginahigugma ko ang imo mga pagtudlo.
120 Tungod sa imo, nahadlok ako; 
         napun-an ako sing kahadlok tungod sang imo mga paghukom.
Pagtuman sang Kasugoan sang GINOO
121 Ginhimo ko ang matarong kag maayo, 
         indi ako pagpatumbayai sa akon mga kaaway!
122 Magsaad ka nga buligan mo ang imo alagad, 
         indi pag-itugot nga tublagon ako sang mga bugalon!
123 Ang akon mga mata ginakapoy na sa pagpaabot sang imo kaluwasan,
         sang kahilwayan nga imo ginsaad.
124 Tatapa ako suno sa imo malig-on nga gugma, 
         kag tudloi ako sang imo mga sugo.
125 Alagad mo ako, gani hatagi ako sing paghangop, 
         agod akon mahibaluan ang imo mga pagtulon-an.
126 Ginoo, tion na ini nga maghulag ikaw, 
         kay ang mga tawo nagalalis sang imo kasugoan!
127 Ginahigugma ko ang imo mga sugo sing labi pa sa bulawan, 
         labi pa sa pinakapuraw nga bulawan.
128 Gani ginasunod ko ang tanan mo nga mga pagtudlo, 
         kag ginapakalain ko ang di-matarong nga mga pagginawi.
Handom sa Pagtuman sang Kasugoan sang GINOO
129 Ang imo mga pagtulon-an maayo gid; 
         ginatuman ko ini sa bug-os ko nga tagipusoon.
130 Ang kasaysayan sang imo mga pagtulon-an nagahatag sing kapawa, 
         kag nagahatag sing kaalam sa mga wala sing tinun-an.
131 Nagahawathawat ang akon ginhawa, 
         sa paghandom sang imo mga sugo.
132 Balikda kag kaluoyi ako 
         subong sang imo ginahimo sa mga nagahigugma sa imo.
133 Indi pag-itugot nga mapukan ako suno sa imo ginsaad; 
         indi ako pag-ipadaog sa malaut.
134 Luwasa ako sa mga nagapigos sa akon,
         agod nga matuman ko ang imo mga sugo.
135 Mag-upod ka sa akon, 
         kag tudloi ako sang imo mga kasugoan.
136 Ang akon mga luha nagailig kaangay sang suba, 
         kay ang mga tawo wala nagatuman sang imo kasugoan.
Matarong ang Kasugoan sang GINOO
137 Matarong ka, O Ginoo, 
         kag ang imo mga kasugoan husto.
138 Ang mga pagsulondan nga imo ginhatag 
         matadlong gid kag matarong.
139 Ang akon kaakig nagadabdab sa sulod nakon kaangay sang kalayo,
         kay ang akon mga kaaway wala nagasapak sang imo mga sugo.
140 Masaligan gid ang imo saad! 
         Ginahigugma gid ini sang imo alagad!
141 Kubos ako kag hilikayan, 
         pero wala ko ginapatumbayai ang imo mga pagsulondan.
142 Ang imo pagkamatarong magapadayon sing walay katubtoban, 
         kag ang imo kasugoan matuod sa gihapon.
143 Napun-an ako sing kagamo kag kalisdanan, 
         pero ang imo mga sugo nagahatag sa akon sing kalipay.
144 Ang imo mga pagtudlo matarong sa walay katubtoban, 
         hatagi ako sing paghangop, kag ako magakabuhi.
Pangamuyo agod Luwason
145 Sa bug-os ko nga tagipusoon nagapanawag ako sa imo; 
         sabta ako, O Ginoo, kag tumanon ko ang imo nga sugo!
146 Nagapanawag ako sa imo; 
         luwasa ako, kag tumanon ko ang imo mga pagsulondan!
147 Sa wala pa magbutlak ang adlaw nagapangayo ako sa imo sing bulig; 
         nagalaom ako sa imo saad.
148 Sa bug-os nga gab-i nagahigda ako nga wala nagatulog, 
         sa pagpamalandong sa imo mga pagtudlo.
149 Pamatii ako, O Ginoo, suno sa imo mapinadayunon nga gugma, 
         tipigi ang akon kabuhi, suno sa imo kaayo!
150 Ang mapintas nga mga manughingabot sa akon nagapalapit na, 
         mga tawo nga wala gid nagatuman sang imo kasugoan.
151 Pero malapit ka sa akon, O Ginoo, 
         kag ang tanan mo nga mga saad matuod.
152 Dugay na nga natun-an ko ang imo mga pagtudlo, 
         ginhimo mo ini nga magpadayon sa walay katubtoban.
Pakiluoy agod Luwason
153 Tan-awa bala ang akon pag-antos, kag luwasa ako, 
         kay wala ko pagpatumbayai ang imo kasugoan.
154 Apini man ang akon tinindugan, kag hilwaya ako; 
         luwasa ako, suno sa imo ginsaad!
155 Ang malaut indi maluwas, 
         kay wala sila nagatuman sang imo mga kasugoan.
156 Pero daku ang imo kaluoy, O Ginoo, 
         gani luwasa ako, suno sa imo pagbuot.
157 Madamo ang akon mga kaaway kag mga manugpigos, 
         pero wala ako nagakalipat sa pagtuman sang imo mga kasugoan.
158 Kon magtulok ako sa sinang mga maluibon, nagalain gid ang akon buot, 
         kay wala sila nagatuman sang imo mga sugo.
159 O Ginoo, tan-awa kon daw ano ang paghigugma ko sang imo mga pagtudlo! 
         Luwasa ako suno sa imo mapinadayunon nga gugma.
160 Ang alibutod sang imo kasugoan kamatuoran, 
         kag ang tanan mo nga matarong nga mga pagsulondan nagapadayon sa walay katubtoban.
Pagkatutom sa Kasugoan sang GINOO
161 Ang gamhanan nga mga tawo nagahingabot sa akon sing indi matarong 
         pero ang imo kasugoan amo ang akon ginatahod.
162 Daw ano ka malipayon sa akon tungod sang imo mga saad, 
         subong ka malipayon sa tawo nga nakakita sing madamo nga manggad.
163 Ginapakalain ko kag ginakangil-aran ang tanan nga kabutigan, 
         pero ginahigugma ko ang imo kasugoan.
164 Makapito ako magpasalamat sa imo sa tagsa ka adlaw 
         tungod sang imo matarong nga mga paghukom.
165 Ang mga nagahigugma sang imo kasugoan may bug-os nga kalig-onan, 
         kag wala sing may makapukan sa ila.
166 O Ginoo, nagahulat ako sa imo sa pagluwas sa akon, 
         kag ginahimo ko ang imo ginasugo.
167 Ginatuman ko ang imo mga pagsulondan; 
         ginahigugma ko ini sa bug-os ko nga tagipusoon.
168 Ginatuman ko ang imo mga sugo kag mga pagtudlo; 
         makita mo ang tanan ko nga ginahimo.
Pangamuyo agod Buligan
169 Kabay nga mabatian mo ang akon pagpangayo sing bulig, O Ginoo!
         Hatagi ako sing paghangop, suno sa imo ginsaad.
170 Kabay nga ang akon pangamuyo makalambot sa imo, 
         kag luwasa ako, suno sa imo saad!
171 Dayawon ko ikaw sa gihapon, 
         kay ginatudloan mo ako sang imo mga pagsulondan.
172 Magakanta ako nahanungod sang imo kasugoan, 
         kay ang imo mga sugo matarong.
173 Magmanginhanda ka sa gihapon sa pagbulig sa akon, 
         kay ginatuman ko ang imo mga sugo.
174 Daw ano ang paghandom ko sang imo kaluwasan, O Ginoo!
         May kalipay ako sa imo kasugoan.
175 Hatagi ako sing kabuhi, agod makadayaw ako sa imo; 
         kabay nga ang imo mga pagtudlo magbulig sa akon!
176 Nagatalangtalang ako kaangay sang nadula nga karnero; 
         gani kari ka sa pagpangita sa akon nga imo alagad, 
         kay wala ko pagpatumbayai ang imo mga kasugoan.


Mga Salmo - Kapitulo 118 <<<   >>> MGA SALMO - Kapitulo 120
Posted by adg at 11:31 PM
Labels: , , ,

No comments:

Post a Comment

Subscribe to: Post Comments (Atom)