MGA SALMO - Kapitulo 37

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 

Ang Madangatan sang Malaut kag sang Maayo^x

1 Indi ka mag-ugtas tungod sang malaut nga mga tawo,
     ukon magkahisa sa mga nagahimo sing malain;

2 magakadula sila kaangay sang hilamon nga nagakalaya,
     magakamatay sila kaangay sang mga tanom nga nagakalayong.

3 Magsalig ka sa GINOO, kag maghimo sing maayo;
     magkabuhi ka sa duta kag indi ka maano.

4 Pangitaa ang imo kalipay sa GINOO,
     kag ihatag niya sa imo ang imo gid ginahandom.

5 Itugyan ang imo kaugalingon sa GINOO;
     magsalig ka sa iya, kag sia magabulig sa imo;

6 Iya pasigahon ang imo kaayo subong kapawa,
     kag ang imo pagkamatarong subong sa udto nga adlaw.

7 Magpakalinong ka sa atubangan sang Ginoo, kag hulata sia nga may pagpailob;
     indi ka mag-ugtas nahanungod sa mga mainuswagon,
     ukon sa mga nagamadinalag-on sa ila malaut nga mga plano.

8 Indi ka magpangakig kag indi ka magpanginit!
     Indi ka mag-ugtas! Kay wala ka man sing makuha nga maayo.

9 Ang mga nagasalig sa Ginoo magakabuhi nga indi maano sa duta,
     pero ang mga malaut pagatabugon.

10 Sa indi madugay, ang mga malaut madula;
       magapangita kamo sa ila, pero indi ninyo sila makita;

11 pero ang mga maluloy-on magakabuhi nga indi maano sa duta,
       kag magaangkon sang himpit nga paghidait.

12 Ang malaut nagahimbon batok sa maayo nga tawo,
       kag nagapamudlo sa iya sa kaakig.

13 Ang Ginoo nagakadlaw lamang sa malaut nga mga tawo,
       kay nakahibalo sila nga sa indi madugay pagalaglagon sia.

14 Ang mga malaut nagagabot sang ila mga espada kag nagabingat sang ila mga pana
       sa pagpatay sang mga imol kag nawad-an,
       sa pagpatay sang mga tawo nga maayo;

15 pero pagabun-on sila sang ila kaugalingon nga mga espada,
       kag ang ila mga pana pamalion.

16 Ang diutay nga iya sang matarong nga tawo
       mas maayo pa sang sa manggad sang tanan nga malaut nga mga tawo;

17 kay ang Ginoo magakuha sang kusog sang mga malaut,
       pero magaapin sia sa mga matarong.

18 Ang Ginoo nagatatap sa mga nagatuman sa iya,
       kag mangin-ila ang duta sa walay katubtoban.

19 Indi sila magaantos sa tion sang kalalat-an,
       kag indi sila makulangan sa tion sang tiggulotom.

20 Pero ang mga malaut magakalamatay;
       ang mga kaaway sang Ginoo mawala subong sang mga bulak sa talon;
       magakawala sila kaangay sang aso.

21 Ang tawo nga malaut nagahulam, kag wala nagabayad,
       pero ang matarong maalwan kag mahinatagon.

22 Ang mga ginabendisyunan sang Ginoo magapuyo sa duta nga indi maano,
       pero ang mga ginapakamalaut niya pagatabugon.

23 Ang Ginoo nagatuytoy sa tawo nga indi maano sa iya dapat pagaagyan,
       kag nagakalipay sia sa iya pagginawi.

24 Kon mapukan sia, makabangon pa sia,
       kay ang Ginoo magabulig sa iya.

25 Tigulang na ako, kag indi na bata,
       pero wala pa ako kakita sang matarong nga ginpatumbayaan sang Ginoo,
       ukon ang iya mga anak nga nagapangayukayo sing pagkaon.

26 Sa tanan nga tion nagahatag sia sing maalwan kag nagapahulam sa iban,
      kag ang iya mga anak daku nga kaayuhan.

27 Likawi ang malaut kag himoa ang maayo,
       kag magakabuhi ka sa duta sa walay katubtoban;

28 kay ang Ginoo nagahigugma sang matarong,
       kag wala sila nagabiya sa iya matutom nga mga tawo.
     Iya sila ginaapinan sa gihapon,
       pero ang mga kaliwat sang malaut pagatabugon.

29 Ang mga matarong magakabuhi sa duta nga indi maano,
       kag mangin-ila ini sa walay katapusan.

30 Ang mga tinaga sang matarong nga tawo may kaalam,
       kag nagahambal sia sing matarong;

31 ginahuptan niya ang kasugoan sang iya Dios sa iya tagipusoon,
       kag wala gid sia nagalapas sini.

32 Ang tawo nga malaut nagabantay sang matarong,
       kag nagatinguha sa pagpatay sa iya;

33 pero indi sia pagpabay-an sang Ginoo sa gahom sang iya kaaway,
       kag indi man sia kondenahon kon sia pagahukman.

34 Magsalig sa Ginoo kag tumana ang iya mga sugo;
       hatagan niya ikaw sing kusog sa pag-angkon sang duta,
       kag makita mo ang pagtabog sang mga malaut.

35 Nakita ko ang malaut nga tawo nga mapiguson;
       labaw sia sa tanan, kaangay sang sedro sa Libano;

36 pero sang ulihi nag-agi ako kag wala na sia didto;
       ginpangita ko sia, pero wala ko sia makita.

37 Talupangda ang maayo nga tawo, kag panilagi ang matarong;
       ang mahidaiton nga tawo may mga kaliwat;

38 pero ginalaglag sing bug-os ang makasasala,
       kag ang ila mga kaliwat pagapapason.

39 Ang GINOO nagaluwas sang matarong nga mga tawo,
       kag iya sila ginaapinan sa tion sang kagamo.

40 Iya sila ginabuligan kag ginatabangan,
       ginaluwas niya sila sa mga malaut,
       kay nagadangop sila sa iya agod apinan.

^xTITULO SA HEBREO: Ni David.

MGA SALMO - Kapitulo 36 <<<   >>> MGA SALMO - Kapitulo 38