Nagpanudlo si Jesus nga may Awtoridad

Liturhiya sang Pulong

(Martes, Enero 14, 2020)

Ang Pagbasa gikan sa Nahauna nga Libro ni:

Samuel nga Propeta 1:9-20

   Isa sadto ka tion sa Silo, sang makatapos sila kaon, si Ana nagtindog. Si Eli nga pari nagalingkod sa iya lugar sa puwertahan sang templo sang GINOO. Si Ana natublag gid kag naghilibion nga nagpangamuyo sa GINOO. Nagpanumpa sia sa GINOO nga nagasiling, “O GINOO nga Makagagahom, tamda ang imo alagad! Tan-awa ang akon pag-antos kag dumdoma ako! Indi ako pagkalimti! Kon hatagan mo ako sing anak nga lalaki, nagasaad ako nga ihalad ko sia sa imo sa bug-os niya nga kabuhi, kag indi gid sia pagpaguntingan sang iya buhok.”

   Nagpadayon si Ana sa pagpangamuyo sa GINOO sing malawig nga tion, kag si Eli nagabantay sang iya mga bibig. Nagapangamuyo sia sing mahipos, kag bisan ang iya mga bibig nagahulag, pero indi mabatian ang iya tingog. Gani si Eli naghunahona nga sia hubog kag nagsiling sa iya, “Indi ka maghinubog! Untati ang pag-inom agod maumpawan ka!” Nagsabat sia, “Indi ako hubog, sir. Wala ako nakainom! Daku gid ang akon kalisod, kag nagapangamuyo ako kag nagasugid sang akon balatyagon sa GINOO. Indi ka maghunahona nga ako isa ka talamayon nga babayi. Nagapangamuyo ako subong sini kay puno ako sing kalisod.” Nagsiling si Eli, “Lakat ka kag indi na magpalibog. Kabay nga ang Dios sang Israel maghatag sang imo ginapangayo.” Nagsabat sia, “Kabay nga magmaluloy-on ka pirme sa akon.” Gani naglakat sia kag nagkaon nga wala na nagapangasubo. 

   Sang madason nga adlaw si Elcana kag ang iya panimalay nagbangon sing aga pa gid kag nagsimba sa GINOO. Dayon nagpauli sila sa Rama. Si Elcana naghiusa sa iya asawa nga si Ana, kag ang GINOO nagsabat sang pangamuyo ni Ana. Gani nagbusong sia kag nag-anak sang isa ka bata nga lalaki. Ginhingalanan niya ang iya bata kay Samuel kay siling niya, “Ginpangayo ko sia sa GINOO.”

Kalantahon sa Pagsabat:

1 Samuel 2:1, 4-5, 6-7

(S) Ang Ginoo nagpuno sang akon tagipusoon sang kasadya.

Nagpangamuyo si Ana: "Ang Ginoo nagpuno sang akon tagipusoon sing kasadya, nagakalipay ako tungod sang iya nahimo. Ginakadlawan ko ang akon mga kaaway. Nagakasadya ako tungod kay ang Dios nagbulig sa akon. (S)

Ang mga pana sang isganan nga mga soldado nagkalabali, pero ang mga maluya nagabaskog. Ang mga busog anay nagapamugon na karon para sa ila pagkaon, pero ang mga gutom may tuman nga kalan-on. Ang baw-as nga asawa nagbata sing pito. Pero ang iloy sang madamo nawad-an sing anak. (S)

Ang Ginoo nagapatay kag nagahatag sing kabuhi sia ang nagapadala sang mga tawo sa Iulobngan, kag sia nagabanhaw sa ila. Ginapaimol niya ang iban kag ang iban iya ginapamanggad; ginapaubos niya ang iban kag ang iban iya ginapataas. (S)

Ginabayaw niya ang mga imol gikan sa yab-ok, kag ginabayaw niya ang mga nawad-an gikan sa ila pag-antos. Ginapalingkod niya sila upod sa mga prinsipe, kag ginapahamtang niya sila sa duog sang kadungganan. Ang mga sadsaran sang duta iya sang Ginoo, sa ibabaw sini ginpasad niya ang kalibutan. (S)

Aleluya:

1 Tesalonica 2:13

   Batuna ninyo ang pulong sang Dios, indi subong pulong sang tawo, kundi subong matuod nga pulong sang Dios.

Ang Pagbasa sang Santos nga Ebanghelyo suno kay:

San Marcos 1:21-28

   Nag-abot sila sa banwa sang Capernaum, kag sang Adlaw nga Inugpahuway nagsulod si Jesus sa sinagoga kag nagpanudlo. Ang mga tawo nga nakabati sa iya natingala sang iya pagpanudlo kay nagpanudlo sia nga may awtoridad kag indi sia pareho sang mga manunodlo sang Kasugoan.

   Sa amo gid nga tion nagsulod sa sinagoga ang isa ka tawo nga may malaut nga espiritu kag nagsinggit, “Ano ang luyag mo himuon sa amon, Jesus nga taga-Nazaret? Nagkari ka bala sa paglaglag sa amon? Nahibal-an ko kon sin-o ka. Ikaw ang Balaan nga ginpadala sang Dios!” 

   Ginmanduan ni Jesus ang espiritu: “Maghipos ka kag maggwa sa tawo.” 

   Ginpakurog sang malaut nga espiritu ang tawo, nagsinggit sing tudo kag naggwa sa tawo. Ang mga tawo natingala gid, sa bagay nga nagpinamangkutanay sila, “Ano ini? Bag-o bala ini nga pagtulon-an? Ini nga tawo may gahom bisan pa sa pagsugo sang malaut nga mga espiritu, kag nagatuman sila sa iya.” 

   Gani, ang balita nahanungod kay Jesus naglapnag sing madali sa bug-os nga probinsya sang Galilea.

Enero 13 | Enero 15