Paghidait sa Pagdaog sang Kalibutan

Liturhiya sang Pulong

(Lunes, Hunyo 3, 2019)

San Carlos Lwanga kag Kaupdanan
mga Martires sang Uganda 

Ang Pagbasa gikan sa mga:

Binuhatan sang mga Apostoles 19:1-8

   Samtang didto si Apolos sa Corinto, si Pablo nagpangadtukadto sa interyor sang probinsya tubtob nga nakaabot sia sa Efeso. May nakita sia didto nga mga gintuton-an. Ginpamangkot niya sila, “Nabaton bala ninyo ang Espiritu Santo sang magtuo kamo?” 
   Nagsabat sila, “Wala gani kami makabati nga may ginatawag nga Espiritu Santo.”
   Ginpamangkot sila ni Pablo, “Ti, ano ang sahi sang bautiso ang nabaton ninyo?” 
   Nagsabat sila, “Ang bautiso ni Juan.”

   Nagsiling si Pablo sa ila, “Ang bautiso ni Juan para sa mga nagbiya sang ila mga sala. Nagsiling si Juan sa mga taga-Israel nga magtuo sila sa isa nga magakari nga ulihi lang sa iya kag ini amo si Jesus.”

   Sang mabatian nila ini, ginbautisohan sila sa ngalan ni Ginoong Jesus. Gintungtong ni Pablo ang iya mga kamot sa ila kag ginkunsaran sila sang Espiritu Santo. Naghambal sila sa linggwahe nga indi maintiyendihan kag nagwali man sila sang pulong sang Dios. Mga dose sila tanan.

   Sa sulod sang tatlo ka bulan nagpadayon si Pablo sa pagkadto sa sinagoga, kag sa wala sing kahadlok naghambal sia sa mga tawo kag nagpakigbais sa ila, agod makonbensir niya sila nahanungod sa Ginharian sang Dios.

Salmo sa Pagsabat:

Mga Salmo 68:2-3, 4-5, 6-7

(S) Magkanta kamo sa Dios, mga ginharian sang kalibutan. 

Nagabangon ang Dios kag nagapaalaplaag sang iya mga kaaway! Kabay nga magpalagyo ang tanan nga nagadumot sa iya. Subong sang pagpalid sang aso, sa amo man pagatabugon niya sila, subong nga ang kandila nagakatunaw sa kalayo, amo man ang mga malauton nagakawala sa atubangan sang Dios. (S)
Pero ang mga matarong magakasadya kag magahinugyaw sa iya atubang, magakalipay sila kag magasinggit sa kasadya. Mag-amba kamo sa Dios, mag-amba sing mga pagdayaw sa iya ngalan, amana ang dalan para sa iya nga nagasakay sa mga panganod. Ang iya ngalan amo c Ginoo, magkalipay kamo sa iya atubang! (S)
Ang Dios nga nagaestar sa iya balaan nga templo, naga-atipan sang mga ilo kag nagaapin sang mga balo nga babayi. Nagahatag sia sang balay sa mga naga-isahanon, kag ginahilway niya ang mga binilanggo kag ginapa-uswag sila, pero ang mga rebelde magaestar sa desierto. (S) 

Aleluya:

Colosas 3:1

Kon ginbanhaw kamo upod ni Kristo, pangita-a ninyo ang mga butang nga yara sa langit sa diin nagalingkod si Kristo sa trono sa tuo sang Dios sa paggahom.

Ang Pagbasa sang Santos nga Ebanghelyo suno kay:

San Juan 16:29-33

   Dayon ang iya mga gintuton-an nagsiling sa iya, “Karon, nagahambal ikaw sing maathag nga wala nagagamit sang mga palaanggiran. Karon nahibaluan namon nga ikaw nakahibalo sang tanan kag indi na kinahanglan nga pamangkuton pa. Tungod sini nagatuo kami nga ikaw nagikan sa Dios.”

   Si Jesus nagsabat, “Nagatuo na bala kamo karon? Ang tion magaabot kag kon sa bagay nag-abot na, nga tanan kamo magaalaplaag kag magapalauli kag ako magaisahanon na lang. Pero indi gid ako mag-isahanon, kay ang Amay kaupod nakon. Ginsugiran ko kamo sini, agod may paghidait kamo paagi sa akon. Ang kalibutan magapaantos sa inyo, pero magpakaisog kamo! Gindaog ko ang kalibutan!”

Hunyo 2 | Hunyo 4