"Ang Inyo Ngalan Nasulat sa Langit"

Liturhiya sang Pulong

(Sabado, Oktubre 5, 2019)

Ang Pagbasa gikan sa Libro ni:

Baruc nga Propeta 4:5-12, 27-29

   Magpakaisog mga tawo ko, kamo ang nagpadayon nga mabuhi ang ngalan ni Israel. Ginbaligya kamo sa Gentil nga mga pungsod, pero wala kamo malaglag. Gintugyan kamo sang Dios sa inyo mga kaaway tungod kay ginpaakig ninyo sia. Sang maghalad kamo sang mga sakripisyo sa mga demonyo, ginpaakig ninyo sia nga nagtuga sa inyo. Nalipat kamo sa Walay Katapusan nga Dios nga nag-alila sa inyo subong isa ka bata, kag gani gindala ninyo ang kalisod sa Jerusalem nga nanginkasubong sang iloy sa inyo. Ang Jerusalem nakakita nga ginsilutan kamo sang Dios tungod kay naakig sia sa inyo, kag nagsiling ang Jerusalem sa kaiping niya nga siyudad, "Tan-awa ang daku nga kalalat-an nga ginpadala sa akon sang Dios. Nakita ko ang akon mga anak nga lalaki kag babayi nga gindala subong mga bihag, ang kabihagan nga gintugot sang Walay Katapusan nga Dios sa ila. Ginsapupo ko sa daku nga kalipay ang akon mga kaanakan, pero nagpangasubo kag naghibi ako sang kuhaon ini sila sa akon. Dili pag-itugot nga may magkasadya sa akon kasubo, sa karon nga balo na ako kag madamo sang akon mga kaanakan ang ginkuha sa akon. Nagtalikod sila sa kasugoan sang Dios kag ang ila mga sala nagbuhat sa akon nga isa ka pinatumbayaan nga siyudad.
   "Magpakaisog, mga anak ko, kag magpakibulig sa Dios. Ginsilutan niya kamo, pero indi sia magkalipat sa inyo. Subong nga sang una nagpamat-od kamo sa pagtalikod sa Dios, sa karon magbalik kamo kag mag-alagad sa iya nga may napulo ka pilo nga pamat-od sang sa una. Sia nga nagpadala sini nga mga kalalat-an sa inyo magaluwas sa inyo kag magadala sa inyo sang walay katapusan nga kalipay."

Salmo sa Pagsabat:

Mga Salmo 69:33-35, 36-37

(S) Ang Ginoo nagapamati sa mga imol.

Ang Ginoo nagapamati sa mga imol, kag wala niya ginakalimti ang iya mga tawo nga nabilanggo. Dayawa ang Dios, O langit kag duta, O mga dagat kag ang tanan nga mga nagapuyo sa inyo! (S)
Luwason niya ang Sion, kag patindugon liwat ang mga banwa sang Juda. Ang iya mga tawo magapuyo didto kag magapanag-iya sang duta; ang mga kaliwat sang iya mga alagad magapanubli sini, kag ang mga nagahigugma sa iya magapuyo didto. (S)

Aleluya:

Mateo 11:25

   Bulahan ikaw, O Amay, Ginoo sang langit kag duta kay ginpahayag mo sa mga di-maalam ang mga misteryo sang Ginharian.

Ang Pagbasa sang Santos nga Ebanghelyo suno kay:

San Lucas 10:17-24

   Ang 72 nagbalik nga puno sang kalipay. Nagsiling sila, “Ginoo, bisan pa ang mga yawa nagtuman sa amon tungod sa imo ngalan!” Si Jesus nagsabat sa ila, “Nakita ko si Satanas nga nahulog subong sang kilat gikan sa langit. Pamatii ninyo ini! Ginhatag ko sa inyo ang gahom sa pagtapak sa mga man-og kag mga iwiiwi, kag sang tanan nga gahom sang Kaaway, kag wala sing bisan ano nga makahalit sa inyo. Pero indi kamo magkalipay tungod kay ang malaut nga mga espiritu nagatuman sa inyo, kundi magkalipay kamo kay ang inyo ngalan nasulat sa langit.”
   Sa amo nga takna si Jesus nga puno sing kalipay sang Espiritu Santo nagsiling, “O Amay, Ginoo sang langit kag duta, nagapasalamat ako sa imo kay ang imo gintago sa mga maalam kag may tinun-an imo ginpakita sa indi mga maalam. Huo, Amay, kay amo ini ang ginpakamaayo mo.
   “Gintugyan sa akon sang Amay ang tanan nga butang. Wala sing may nakakilala sa Anak luas sa Amay, kag wala sing may nakakilala sa Amay luas sa Anak kag sa mga luyag sang Anak ipahayag ang Amay.”
   Dayon si Jesus nag-atubang sa iya mga gintuton-an kag nagsiling sini sa ila lamang, “Bulahan kamo nga makakita sang mga butang nga inyo ginatan-aw. Nagasiling ako sa inyo nga madamo sang mga propeta kag mga hari ang naghandom sa pagtan-aw sang inyo ginatan-aw karon, pero indi sila makakita, kag sa pagpamati sa inyo ginapamatian, pero wala sila makabati.”

Oktubre 4 | Oktubre 6