Pamatii ang Akon Hinigugma nga Anak

Liturhiya sang Pulong

(Domingo, Marso 8, 2020)

Ika-2 nga Domingo sang Kwaresma

1. Ang Pagbasa gikan sa Libro sang:

Genesis 12:1-4

   Ang Ginoo nagsiling kay Abram, “Halin ka sa imo kaugalingon nga duta, sa imo mga himata, kag sa puloy-an sang imo amay, kag magkadto ka sa isa ka duta nga igapakita ko sa imo. Hatagan ko ikaw sing madamo nga mga kaliwat kag mangin-isa sila ka daku nga pungsod. Bendisyunan ko ikaw kag himuon ko nga manginbantog ang imo ngalan, agod nga paagi sa imomadamo ang makabaton sing mga kaayuhan.

   Hatagan ko sing mga kaayuhan ang mga maayo sa imo.Pero pakamalauton ko ang mga nagapakamalaut sa imo. Ang tanan nga mga pungsod sa duta magapangayo sa akon nga bendisyunan ko subong sang akon pagbendisyon sa imo.”

   Sang si Abram nagaedad sing 75 ka tuig, naghalin sia sa Haran,suno sa ginsiling sang Ginoo sa iya.

Salmo sa Pagsabat:

Mga Salmo 33:4-5, 18-19, 20, 22

(S) O Ginoo, ipakita sa amon ang imo kaluoy, suno sa amon pagsalig sa imo.

Ang mga pulong sang Ginoo matuod, kag ang tanan niya nga mga binuhatan masaligan. Ang Ginoo nagahigugma sang matarong kag nagakabagay, ang iya mapinadayunan nga gugma nagapuno sang duta. (S)

Ang Ginoo nagabantay sa mga nagakahadlok sa iya, sa mga nagasalig sa iya mapinadayunon nga gugma. Ginaluwas niya sila sa kamatayon; ginabuhi niya sila sa tion sang tiggulotom. (S)

Ang aton paglaom yara sa Ginoo; sia ang aton manugbulig kag mangangapin. Nagakalipay kita tungod sa iya; sa iya balaan nga ngalan nagasalig kita. (S)

2. Ang Pagbasa gikan sa Ikaduha nga Sulat ni San Pablo nga Apostol, kay:

Timoteo 1:8-10

   Magpakigbahin ka sa mga pag-antos tungod sang Maayong Balita, suno sa kusog nga ginahatag sang Dios sa imo para sini. Iya kita ginluwas kag gintawag nga mangin-iya kaugalingon nga mga tawo, indi tungod sang aton mga binuhatan, kundi tungod sang iya tinutoyo kag grasya. Ginhatag niya ini nga grasya sa aton paagi kay Cristo Jesus sa wala pa ang ginsugoran sang panahon. Pero ginpahayag na ini karon sa aton paagi sa pag-abot sang aton Manlulowas nga si Cristo Jesus. Kay gindula ni Cristo ang gahom sang kamatayon, kag paagi sa Maayong Balita iya ginpahayag ang kabuhi nga wala sing katapusan.

Aleluya:

Mateo 17:5

   Gikan sa panganod, nabatian ang tingog sang Amay, “Amo ini ang akon gid hinigugma nga Anak, Pamatii ninyo sia!”

Ang Pagbasa sang Santos nga Ebanghelyo suno kay:

San Mateo 17:1-9

   Sang makaligad ang anom ka adlaw gindala ni Jesus si Pedro kag ang mag-utod nga si Santiago kag si Juan sa isa ka mataas nga bukid nga silahanon lang. Samtang nagatulok sila, nagbalhin ang dagway ni Jesus. Ang iya guya nagsilaw subong sang adlaw, kag ang iya bayu nagputi subong sang kapawa. Dayon nakita sang tatlo ka mga gintuton-an si Moises kag si Elias nga nagapakighambal kay Jesus. Gani si Pedro nagsiling kay Jesus, “Ginoo, maayo gid nga yari kita diri. Kon luyag mo, mahimo ako sing tatlo ka tolda, isa para sa imo, isa para kay Moises, kag ang isa para kay Elias.”

   Sang nagahambal pa sia, ginlikupan sila sang masilaw nga panganod, kag gikan sa panganod may isa ka tingog nga nagasiling, “Ini amo ang akon hinigugma nga Anak nga nahamut-an ko gid. Pamatii ninyo sia!”

   Sang pagkabati sini sang mga gintuton-an, hinadlukan gid sila kag naghapa sila sa duta. Ginpalapitan sila ni Jesus kag gintandog nga nagasiling, “Tindog kamo kag indi magkahadlok!” Sang pagtangla nila, wala sila sing iban nga nakita, kundi si Jesus lamang.

   Sang pagdulhog nila sa bukid, nagpaandam si Jesus sa ila nga nagasiling, “Indi kamo magpanugid bisan kay sin-o sang inyo nakita, tubtob nga ang Anak sang Tawo mabanhaw.”

Marso 7 | Marso 9