"Nagkalaon Sila Tanan kag Nagkalabusog"

Liturhiya sang Pulong

(Domingo, Hunyo 23, 2019)

Ang Labing Santos nga Lawas kag Dugo ni Kristo 

1. Ang Pagbasa gikan sa Libro sang:

Genesis 14:18-20

   Kag si Melquisedec nga hari sang Salem kag pari sang Labing Mataas nga Dios, nagdala sing kalan-on kag bino kay Abram, kag ginbendisyunan niya kag nagsiling, “Kabay nga ang Labing Mataas nga Dios nga naghimo sang langit kag duta magbendisyon kay Abram. Kabay nga pagdayawon ang Labing Mataas nga Dios nga nagpadaog sa imo batok sa imo mga kaaway.” Kag si Abram naghatag sa iya sang ikapulo nga bahin sang tanan nga iya nakuha.

Salmo sa Pagsabat:

Mga Salmo 110:1, 2, 3, 4

(S) Mangin pari Ikaw sa walay katubtoban, suno sa pagsulondan sang pagkapari ni Melquisedec.

Ang Ginoo nagsiling sa akon Ginoo nga hari, "Pungko ka diri sa akon tuo, tubtob mabutang Ko ang imo mga kaaway sa idalom sang imo mga tiil." (S)
Gikan sa Sion ang Ginoo magapasangkad sang imo harianon nga gahom. Nagasiling Sia, "Maggahom ka sa imo mga kaaway." (S)
Sa adlaw nga awayon mo ang imo mga kaaway ang imo mga tawo magabulig sing kinabubot-on. Kaangay sang tun-og sa kaagahon, ang imo pamatan-on nga mga lalaki magakadto sa imo sa balaan nga mga bakulod. (S)
Ang Ginoo nagsumpa, kag indi Niya ini pagbawion; Manginpari Ikaw sa walay katubtoban, suno sa linya sang pagkapari ni Melquisedec." (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 11:23-26

   Kay ginbaton ko halin sa Ginoo ang pagtulon-an nga ginpaalinton ko man sa inyo: nga si Ginoong Jesus, sang gab-i nga gintugyan sia, nagkuha sing tinapay, nagpasalamat sa Dios, nagpamihakpihak sini kag nagsiling, “Ini amo ang akon lawas para sa inyo. Himoa ninyo ini sa akon handumanan.” Sa amo man nga bagay ginkuha niya ang kupa sa tapos ang panihapon kag nagsiling, “Ini nga kupa amo ang bag-o nga kasugtanan nga ginsilyuhan sang akon dugo. Sa inyo pag-inom sini, himoa ninyo ini sa akon handumanan.”

   Kay sa tagsa ninyo ka pagkaon sini nga tinapay kag pag-inom sa sini nga kupa, ginabantala ninyo ang kamatayon sang Ginoo tubtob nga magkari sia.

Sekwensya:

Tan-awa ang tinapay sang mga Angheles
nahimo nga kalan-on sang mga nagapanglakaton;
matuod nga kalan-on sang mga anak
nga wala ginhaboy sa mga ido
subong ang tanda, ginpat-in ini nga daan dira sa paghalad
kay Isaac, Ang Kordero Paskwal gintalana
sa paghatag sing Mana sa kaliwatan.
Maayo nga manugbantay, matuod nga tinapay O Jesus,
maluoy ka sa amon,
pahalba kami, tamda kami,
buhata nga makita man ikaw,
sa duta sang mga nagakabuhi.
Ikaw nga nakahibalo sang tanan
kag nagahatag kaayuhan sa tanan,
ikaw nga nagatatap sa mga mamalatyon:
Buhata nga magkaon kami upod sa imo,
sa imo nga pinili kag mga manunobli
sa bangkete sang mga Santos.

Aleluya:

Juan 6:51

Ako amo ang buhi nga tinapay nga naghalin sa langit, siling sang Ginoo, ang bisan sin-o nga magkaon sini nga tinapay magakabuhi sing dayon.

Ang Pagbasa sang Santos nga Ebanghelyo suno kay:

San Lucas 9:11-17

   Ginbaton niya sila kag naghambal sa ila nahanungod sang Ginharian sang Dios. Gin-ayo niya ang mga nagakinahanglan sang pag-ayo.

   Sang nagahinunod na ang adlaw, ang dose ka mga apostoles nagkadto sa iya kag nagsiling, “Palakta na ang mga tawo agod nga makakadto sila sa mga baryo kag kaumhan sa palibot sa pagpangita sing kalan-on kag dalayunan kay baw-ing ini nga duog.” Pero si Jesus nagsiling sa ila, “Kamo ang magpakaon sa ila.” 
   Nagsabat sila, “Lima gid lang ka bilog ang aton tinapay kag duha lang ang aton isda. Luyag mo bala nga maglakat kami sa pagbakal sing pagkaon para sa sining mga tawo?” (Mga 5,000 ang mga tawo didto.) 
   Si Jesus nagsiling sa iya mga gintuton-an, “Papungkoa ninyo sila sing hinut-ong nga tag-singkuwenta kada hut-ong.”

   Gintuman ini sang mga gintuton-an kag ginpapungko sila tanan. Ginkuha ni Jesus ang lima ka bilog nga tinapay kag ang duha ka isda, nagtangla sia sa langit, nagpasalamat sa Dios, ginpamihakpihak ini, kag ginhatag sa mga gintuton-an agod ipanagtag sa mga tawo. Nagkalaon sila tanan kag nagkalabusog. Ang mga gintuton-an nakatipon sing dose ka alat sang nagkalabilin sang ginkaon sang mga tawo.

Hunyo 22 | Hunyo 24