"Ikaw ang Cristo - ang Anak sang Dios nga Buhi"

Liturhiya sang Pulong

(Huwebes, Agosto 8, 2019)

Santo Domingo de Guzman, Pari

Ang Pagbasa gikan sa Libro sang:

Numeros 20:1-13

   Sa nahauna nga bulan, ang bug-os nga katilingban sang Israel nakaabot sa desierto sang Zin kag naghimo sila sing kampamento sa Cades. Didto si Miriam napatay kag ginlubong.

   Wala sing tubig sa duog nga ila ginhimuan sing kampamento, gani ang mga tawo nagtipon sa palibot ni Moises kag ni Aaron kag nagreklamo,"Maayo pa kontani kon magkalamatay kami sa atubangan sang Tolda nga Tilipunan sang Ginoo, upod sa amon kasimanwa nga Israelinhon. Ngaa bala gindala ninyo kami sa sini nga desierto? Agod bala magkalamatay kami upod sa amon mga kasapatan? Ngaa bala nga ginpagwa ninyo kami halin sa Egipto pakadto sa sining malain nga duog nga wala sing bisan ano nga nagatubo? Wala sing trigo, mga higos, mga ubas, ukon mga granada. Wala gani sing tubig nga sarang mainom!" Si Moises kag si Aaron naghalin sa mga tawo kag nagtindog sila sa puwertahan sang Tolda nga Tilipunan. Nagluhod sila nga ang ila mga guya nagaduot sa duta kag ang masilaw nga kapawa nga nagapakita sang presensya sang Ginoo nagpahayag sa ila.

   Ang Ginoo nagsiling kay Moises, “Kuhaa ang baston nga yara sa atubangan sang Kaban sang Kasugtanan, dayon ikaw kag si Aaron magtipon sang bug-os nga katilingban. Didto sa atubangan sang tanan maghambal ka sa bato, kag gikan sa sini magatubod ang tubig. Sa sini nga paagi magapagwa ka sing tubig gikan sa bato para sa mga tawo, agod imnon nila kag sang ila mga kasapatan." Si Moises naglakat kag ginkuha niya ang baston suno sa sugo sang Ginoo.

   Sia kag si Aaron nagtipon sang bug-os nga katilingban sa atubangan sang bato, kag si Moises nagsiling, "Pamati kamo nga mga rebelde! Kinahanglan bala nga magkuha kami sing tubig gikan sa sini nga bato para sa inyo?" Dayon ginbayaw ni Moises ang baston kag ginhampak sing makaduha ang bato, kag nagpuswak ang madamo nga tubig, kag ang tanan nga mga tawo kag mga kasapatan nag-inom. Pero gin-akigan sang GINOO si Moises kag si Aaron. Nagsiling ang GINOO, “Tungod kay kulang ang inyo pagtuo sa pagkilala sang akon balaan nga gahom sa atubangan sang mga tawo sang Israel, indi kamo makadala sa ila sa pagsulod sa duta nga akon ginsaad nga ihatag sa ila."

   Nahanabo ini sa Meriba, sa diin ang mga tawo sang Israel nagreklamo batok sa Ginoo, kag sa diin nagpakita sia sa ila nga sia balaan.

Salmo sa Pagsabat:

Mga Salmo 95:1-2, 6-7, 8-9

(S) Pamatii ninyo ang ginasiling sang Ginoo: "Indi ninyo pagpatig-aha ang inyo mga kasing-kasing."

Kari kamo, dayawon ta ang Ginoo! Magkanta kita sing malipayon sa aton mangangapin kag manlulowas! Magpalapit kita sa iya atubangan nga may pagpasalamat, kag magkanta sing masadya nga mga ambahanon sang pagdayaw! (S)

Kari kamo, magyaub kita kag magsimba sa iya; magluhod kita sa atubangan sang Ginoo nga aton Manunoga! Sia amo ang aton Dios, kag kita ang mga tawo nga iya ginaatipan, ang mga panong nga iya ginapahalab. Karon pamatii ninyo ang iya ginasiling. (S)

“Indi kamo magpakatig-a subong sang inyo mga katigulangan didto sa Meriba, subong sang didto sila sa desierto sa Masa. Didto gintilawan kag ginsulay  nila ako, bisan nakita na nila ang akon ginhimo para sa ila. (S)

Aleluya:

Mateo 16:18

Ikaw si Pedro nga kon sayuron ‘Bato’ kag sa sini nga bato pagatukoron ko ang akon iglesia. Bisan ang gahom sang kamatayon indi makadaog sa iya.

Ang Pagbasa sang Santos nga Ebanghelyo suno kay:

San Mateo 16:13-23

   Nagkadto si Jesus sa kadutaan sang Cesarea Filipo sa diin nagpamangkot sia sa iya mga gintuton-an, “Sin-o bala ang Anak sang Tawo suno sa mga tawo?”

   Nagsabat sila, “May nagasiling nga si Juan Bautista. May iban nga nagasiling nga si Elias kag may iban pa gid nga nagasiling nga si Jeremias ukon iban nga mga propeta.”

   Si Jesus nagpamangkot sa ila, “Pero suno sa inyo, sin-o bala ako?”

   Si Simon Pedro nagsabat, “Ikaw ang Cristo, ang Anak sang Dios nga buhi.”

   Si Jesus nagsabat, “Bulahan ka, Simon, anak ni Juan! Kay ini nga kamatuoran wala ginpahayag sa imo sang tawo, kundi sang akon Amay sa langit. Kag ako nagasiling sa imo, ikaw si Pedro nga kon sayuron ‘Bato’ kag sa sini nga bato pagatukoron ko ang akon iglesia. Bisan ang gahom sang kamatayon indi makadaog sa iya. Ihatag ko sa imo ang mga yabi sang Ginharian sang langit, kag kon ano ang imo ginadumilian sa duta pagadumilian man didto sa langit, kag kon ano ang imo ginatugotan sa duta pagatugotan man didto sa langit.”

   Dayon nagpaandam si Jesus sa iya mga gintuton-an, nga indi nila pag-isugid sa kay bisan sin-o nga sia amo ang Cristo.

   Sugod sadto nga tion naghambal si Jesus sing maathag sa iya mga gintuton-an, “Dapat ako magkadto sa Jerusalem kag mag-antos sing tama sa mga katigulangan sang mga Judio, sa pangulo nga mga pari, kag sa mga manunodlo sang Kasugoan. Pagapatyon ako, kag sa ikatlo nga adlaw pagabanhawon ako.” 

   Gindala sia ni Pedro sa uloonhan kag ginsaway, “Ginoo, ang Dios indi magtugot sini! Indi ini dapat mahanabo sa imo!”

   Nagbalikid si Jesus kay Pedro kag ginsingganan sia, “Palayo ka sa akon, Satanas! Ginabalabagan mo ako, kay ang imo mga panghunahona iya sang tawo, kag indi iya sang Dios!” 

Agosto 7 | Agosto 9