"Para sa Iya ang Tanan Buhi"

Liturhiya sang Pulong

(Domingo, Nobyembre 10, 2019)

San Leon Magno, Santo Papa kag Doktor sang Simbahan

1. Ang Pagbasa gikan sa Ikaduha nga Libro sang:

Macabeo 7:1-2, 9-14

   Sa isa pa gid ka tion may pito man ka mag-ulutod nga lalaki nga ginpadakop upod ang ila iloy. Ginpagapos kag ginpahanot sila sang hari sa pagpilit sa ila nga magkaon sang unod sang baboy nga ginadumilian sang Kasugoan. Ang isa sa ila, bilang tiglawas, naghambal para sa ila tanan, "Ano bala ang luyag ninyo nga mahibaloan nahanungod sa amon? Handa kami magpanginmatay sang sa maglapas sang mga kasugoan sang amon mga katigulangan."
   Sang nagahimumogto na sia nagsinggit sia sa hari, "Malaut nga tawo, bisan imo kami dulaon sining kinabuhi, pero ang Hari sang duta kag sang langit magabanhaw sa amon sa pagkabuhi nga wala sing katapusan, tungod sa amon pagtuman sang iya mga kasugoan, kami handa nga mapatay. "
   Pagkatapos sa iya, ginwili sang mga soldado ang ila kaugalingon paagi sa ikatlo nga utod. Sang ginsingganan sia nga pagwaon ang iya dila, maabtik nga ginpagwa niya ini kag maisog nga gintan-ay ang iya mga kamot, kag dungganon nga nagsiling, "Ang Dios amo ang naghatag sa akon sini. Ginapasulabi ko pa ang iya mga kasugoan sang sa sini nga mga bahin sang lawas kag ako nagasalig nga mabaton ko liwat ini tanan halin sa iya." Sang pagkabati sini sang hari kag sang iya mga sumolunod, natingala gid sila sa kaisog sang pamatan-on kag sa iya pagkabig sang pag-antos nga daw sa wala lang.
   Sang mapatay na siya ginpaagi man nila ang ikap-at nga utod sining sinapat nga pagpaantos. Sang malapit na lang sia mapatay, nagsinggit sia, "Labing maayo ining amon napilian nga mapatay sa kamot sang mga tawo, samtang nagasalig kami sa saad sang Dios nga pagabanhawon niya kami; pero para sa inyo wala sing pagkabanhaw, wala sing bag-o nga kabuhi."

Salmo sa Pagsabat:

Mga Salmo 17:1, 5-6, 8, 15

(S) Sa akon pagmata mapuno ako sing kalipay sa imo pagpakig-upod sa akon.

Pamatii, O Ginoo, ang akon matarong nga pagpakiluoy, talupangda ang akon pagpangayo sing bulig! Pamatii ang akon pangamuyo, kay wala ako nagalimbong.  (S)
Sa gihapon nagalakat ako sa imo dalan, kag wala gid ako magsipak. Nagapangamuyo ako sa imo, O Dios, kay ikaw nagasabat sa akon, gani balikda ako, kag pamatii ang akon mga pulong.  (S)
Tipigi ako, subong sang pagtipig mo sang imo gid mga mata, tagoa ako sa idalom sang imo mga pakpak.  (S)
Makakita ako sa imo, tungod kay ako matarong, kag sa akon pagmata mapuno ako sing kalipay sa imo pagpakig-upod sa akon. (S)

2. Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Tesalonica 2: 16 - 3:5

   Kabay nga ang aton gid Ginoong Jesu-Cristo, kag ang Dios nga aton Amay, nga sa iya grasya naghigugma kag naghatag sa aton sang walay katapusan nga kalipay kag maayo nga paglaom, magpuno sang inyo mga tagipusoon sing kaisog kag magpalig-on sa inyo sa pagbuhat kag sa paghambal sang tanan nga maayo.
   Sa katapusan, mga kautoran, magpangamuyo kamo para sa amon, nga ang pulong sang Ginoo magpadayon sa paglapnag sing madali kag pakamahalon subong sang nahanabo dira sa inyo.
   Magpangamuyo man kamo nga ang Dios magluwas sa amon sa malaut kag malain nga mga tawo. Kay indi ang tanan nga mga tawo nagatuo sa pulong sang Dios.
   Pero ang Ginoo matutom. Sia ang magapalig-on sa inyo kag magaapin sa inyo batok  sa yawa. Kag ang Ginoo nagahatag sa amon sing pagsalig sa inyo. Nagasalig gid kami nga nagahimo kamo kag magapadayon sa paghimo sang amon ginasiling sa inyo.
   Kabay nga ang Ginoo magtuytoy sang inyo mga tagipusoon sa paghigugma sa Dios kag sa pagpailob nga ginhatag ni Cristo.

Aleluya:

Bugna 1:5, 6

   Si Jesukristo amo ang panganay nga anak nga ginbanhaw; ang iya himaya kag gahom wala sing katapusan.

Ang Pagbasa sang Santos nga Ebanghelyo suno kay:

San Lucas 20 2:27-38

   May mga Saduceo nga nagpalapit kay Jesus. (Amo ini sila ang nagasiling nga wala sing pagkabanhaw.) Ginpamangkot nila sia, “Manunodlo, si Moises nagsulat sining kasugoan para sa amon, ‘Kon ang isa ka tawo mapatay nga wala sila sing bata sang iya asawa, ang utod nga lalaki sang napatay magapangasawa sang nabalo agod nga sila makapamata para sa napatay nga tawo.’ Sadto anay may pito ka mag-ulotod nga lalaki. Ang magulang nagpangasawa, kag napatay nga wala sing anak. Dayon ang ikaduha nagpangasawa sang nabalo, kag amo man ang ikatlo. Amo man ang natabo sa tanan sa ila. Napatay sila nga wala sing ginbilin nga anak. Sang ulihi ang babayi napatay man. Sila nga pito nakapangasawa sa iya. Karon, sa adlaw sang pagkabanhaw sang mga minatay, kay sin-o bala sia asawa?”
   Si Jesus nagsabat sa ila, “Ang mga lalaki kag mga babayi sining kalibutan nagaasawahay, pero ang mga lalaki kag mga babayi nga takos nga pagabanhawon kag magakabuhi sa palaabuton nga panahon wala na nagaasawahay. Kay kasubong sila sang mga anghel kag indi na sila mapatay. Mga anak sila sang Dios, kay ginbanhaw sila gikan sa kamatayon. Si Moises nagapamatuod sing maathag nga ang mga patay pagabanhawon. Sa bahin sang kasulatan nahanungod sang nagadabdab nga kahuykahoy, nagahambal sia nahanungod sa Ginoo subong ‘Dios ni Abraham, Dios ni Isaac, kag Dios ni Jacob.’ Ini nagakahulogan nga ang Dios amo ang Dios sang mga buhi kag indi sang mga patay, kay para sa iya ang tanan buhi.” 

Nobyembre 9 | Nobyembre 11