Si Juan Nakakita sang Wala Sulod nga Lulobngan kag Nagtuo

  Liturhiya sang Pulong

(Domingo, Abril 12, 2020)

Paskwa sa Pagkabanhaw sang Ginoo

1. Ang Pagbasa gikan sa mga:

Binuhatan sang mga Apostoles 10:34, 37-43 

   Nagsugod si Pedro sa paghambal, “Inyo nahibaluan ang bantog nga hitabo sa bug-os nga Israel, nga nagsugod sa Galilea, sa tapos nga ginwali ni Juan ang nahanungod sa pagbautiso. Nakahibalo man kamo nahanungod kay Jesus nga taga-Nazaret, kon daw ano ang paghatag sang Dios sa iya sang Espiritu Santo kag gahom. Nagkadto sia sa tanan nga mga duog nga nagahimo sang maayo nga mga buhat kag nagaayo sang tanan nga ginagamhan sang Yawa, kay ang Dios kaupod niya. Mga saksi kami sang tanan nga ginhimo niya sa mga kabanwahanan sang mga Judio kag sa Jerusalem. Ginpatay nila sia paagi sa paglansang sa iya sa krus. Pero ginbanhaw sia sang Dios sa ikatlo nga adlaw kag ginpahayag sia, indi sa tanan nga mga tawo, kundi sa amon lang nga ginpili na sang Dios nga mga saksi. Sa tapos sia mabanhaw sang Dios, nagkaon kag nag-inom kami upod sa iya. Kag ginsugo niya kami sa pagwali sang Maayong Balita sa mga tawo kag sa pagpamatuod nga sia amo ang ginpili sang Dios nga hukom sang mga buhi kag sang mga patay. Nahanungod sa iya, ang tanan nga mga propeta naghambal nga ang tanan nga magtuo sa iya pagapatawaron sang ila mga sala paagi sa gahom sang iya ngalan.” 

Salmo sa Pagsabat:

Mga Salmo 118:1-2, 16-17, 22-23

(S) Ini amo ang adlaw nga ginhimo sang Ginoo; magkalipay kag magkasadya kita sa iya.

Magpasalamat sa Ginoo kay maayo sia kag ang iya gugma nagapadayon sa gihapon. Magsiling ang mga tawo sang Israel, “Ang iya gugma nagapadayon sa gihapon." (S) 

Ang iya gahom nagpadaog sa aton ang iya gamhanan nga kusog sa inaway! Indi ako mapatay, kundi magakabuhi, kag isugid ko ang ginhimo sang Ginoo. (S) 

Ang bato nga ginsikway sang mga manunokod, nangin pamakod nga bato. Ang Ginoo amo ang naghimo, daw ano ka makatilingala ini tan-awon! (S) 

2. Ang Pagbasa gikan sa Sulat ni San Pablo nga Apostol, sa mga:

Taga-Colosas 3:1-4

   Ginbanhaw kamo kaupod ni Cristo. Gani pangitaa ninyo ang mga butang nga yara sa langit, sa diin nagalingkod si Cristo sa iya trono sa tuo sang Dios. Ibug-os ang inyo mga panghunahona sa mga butang nga didto sa langit kag indi sa mga butang nga yari diri sa duta. Kay napatay kamo kag ang inyo kabuhi natago upod kay Cristo sa Dios. Ang inyo matuod nga kabuhi amo si Cristo, kag kon sia magpahayag, kamo man magapahayag upod sa iya kag magaambit sang iya himaya! 

Sekwensya:

   O mga Kristianos, sa Biktima sang Paskwa,
     ambahanon kag pagdayaw, ihalad sa iya;
   kay sa mga obehas, Kordero ang nagtubos sa ila.
     Kag si Kristo nga wala sing sala,
     magpahauli sa iya Amay sang mga makasasala.
   Kabuhi kag kamatayon sing makatilingala nagsambuwa.
     Napatay ang Prinsipe sang kabuhi, apang karon, buhi nga nagahari.
   O Maria, isiling sa amon:
     Ano ang nakita mo sa dalanon?
   Nakita ko ang lulobngan sang buhi nga Kristo,
     nakita ko ang himaya sang nabanhaw nga Ginoo.
   Ang mga Angheles nga mga saksi nakita nakon,
     ang naputos sa napatay nga mga lino kag panapton.
   Nabanhaw ang akon paglaum nga si Kristo,
     sa Galilea, sia naga-una sa inyo.
   Nga si Kristo nabanhaw sing matuod, nahibaluan naton.
     O Ikaw! Hari nga magdadaog, maluoy ka sa amon,
     Amen, Aleluya. 

Aleluya:

1 Corinto 5:7, 8

   Aleluya, Aleluya, Aleluya! Si Kristo ang aton Kordero nga palaskwahan ginhalad na, gani, maghinugyaw kita sa Ginoo. Aleluya, Aleluya, Aleluya! 

Ang Pagbasa sang Santos nga Ebanghelyo suno kay:

San Juan 20:1-9

   Aga pa gid sang nahauna nga adlaw sang simana sang madulomdulom pa, si Maria Magdalena nagkadto sa lulobngan, kag nakita niya nga nakuha na ang bato sa puwertahan sang lulobngan. Nagdalagan sia kag nagkadto kay Simon Pedro kag sa gintuton-an nga hinigugma ni Jesus, kag ginsugiran sila, “Ginkuha nila ang Ginoo sa lulobngan, kag wala kami makahibalo kon diin nila sia ginbutang!”
   Dayon si Pedro kag yadtong isa ka gintuton-an nagkadto sa lulobngan. Nagdalagan sila nga duha, pero yadtong isa ka gintuton-an madasig pa sa kay Pedro kag una sia nakaabot sa lulobngan. Nagsid-ing sia kag nakita niya ang tela nga lino, pero wala sia magsulod. Si Simon Pedro nga nagasunod sa iya, nag-abot man, kag nagsulod sia dayon sa lulobngan. Nakita niya ang tela nga lino nga nahamtang didto, kag ang tela nga ginsambod sa ulo ni Jesus. Wala ini nahamtang upod sa mga tela nga lino, kundi nabalulon. Dayon yadtong gintuton-an nga una nag-abot sa lulobngan nagsulod man. Nakakita sia kag nagtuo. (Wala pa sila makahangop sang kasulatan nga nagasiling nga kinahanglan mabanhaw sia.) 

Abril 11 | Abril 13