"Ang Espiritu Magatuytoy sa Inyo sa Bug-os nga Kamatuoran"

Liturhiya sang Pulong

(Domingo, Hunyo 16, 2019)

Solemnidad sang Santisima Trinidad

1. Ang Pagbasa gikan sa Libro sang mga:

Hulobaton 8:22-31

   "Ang GINOO nagtuga sa akon una sa tanan,
   Ang nahauna sang iya mga binuhatan sadto anay.
   Ginhimo niya ako sa ginsugoran gid,
   Ang nahauna gid, sa wala pa magsugod ang kalibutan.
   Yara na ako sang wala pa ang mga kadagatan,
   Sang wala pa ang mga tuboran sang tubig.
   Yara na ako sang wala pa ang mga kabukiran,
   Sang wala pa mapahamtang ang mga bakulod sa ila mga duog.
   Sang wala mahimo sang Dios ang duta kag ang iya mga kaumhan,
   Ukon ang nahauna nga yab-ok sang duta.
   Didto ako sang pagpahamtang niya sang langit,
   Sang pagbutang niya sang gintaipan sang kadagatan,
   Sang pagpahamtang niya sang mga panganod sa langit,
   Sang pag-abri niya sang mga tuboran sang kadagatan,
   Sang pagmando niya sang mga tubig sa dagat
   Nga indi maglapaw sa ginbutang niya nga dulonan.
   Didto ako sang pagbutang niya sang mga sadsaran sang duta.
   Yara ako sa luyo niya kaangay sang manugdumala sang obra,
   Ako ang iya kalipayan adlaw-adlaw,
   Malipayon ako sa gihapon sa iya atubangan,
   Nga nasadyahan sang kalibutan
   Kag sang mga katawuhan.

Salmo sa Pagsabat:

Mga Salmo 8:4-5, 6-7, 8-9

(S) O Ginoo, Ginoo namon, ang imo pagkahalangdon makita sa bug-os nga kalibutan.

Kon magtangla ako sa langlt, nga imo ginhimo, sa bulan kag sa kabituonan, nga imo ginbutang sa ila kaugalingon nga mga lugar, ano gid bala ang tawo nga imo sia dumdomon, ang ahaw nga tawo nga imo sia atipanon? (S)
Pero ginhimo mo sia nga kubos-kubos lamang sa imo, ginkoronahan mo sia sing himaya kag kadungganan. Gintugyan sa iya ang paggahom sa tanan nga imo ginhimo, ginpadumala mo sia sa tanan nga imo gintuga. (S)
Sa mga karnero kag mga baka, kag sa talunon man nga mga sapat, sa mga pispis kag mga isda, kag sa tanan nga mga tinuga sa kadagatan. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Roma 5:1-5

   Karon kay ginpakamatarong na kita paagi sa pagtuo, may paghidait kita sa Dios paagi kay Jesu-Cristo nga aton Ginoo. Paagi sa pagtuo, gindala niya kita sa pag-agom sang grasya sang Dios sa diin kita karon nagakabuhi. Gani, nagakalipay kita sa paglaom nga maambit naton ang himaya sang Dios! Kag nagakalipay man kita sa aton mga pag-antos, kay nakahibalo kita nga ang pag-antos nagapatubas sang pagbatas, kag ang pagbatas nahamut-an sang Dios, kag ang iya pagkahamuot nagahatag sing paglaom. Sa sini nga paglaom indi kita mapaslawan, kay ang Dios nagapuno sang aton mga tagipusoon sang iya gugma paagi sa Espiritu Santo, nga amo ang dulot sang Dios sa aton.

Aleluya:

Bugna 1:8

Himaya sa Amay, sa Anak kag sa Espiritu Santo, ang Dios nga amo karon, amo man anay, kag amo man ang magakari.

Ang Pagbasa sang Santos nga Ebanghelyo suno kay:

San Juan 16:12-15

   “May madamo pa ako nga inugsugid sa inyo, ugaling indi pa kamo sarang makahangop sini karon. Pero kon mag-abot ang Espiritu sang kamatuoran, sia magatuytoy sa inyo sa bug-os nga kamatuoran. Ang iya ihambal indi iya, kundi magasugid sia sa inyo sang iya nabatian, kag magapahayag sia sang mga butang nga palaabuton. Magahimaya sia sa akon, kay sia magabaton sang akon inugsiling kag iya ini ipahayag sa inyo. Ang tanan nga iya sang Amay akon, gani nagsiling ako nga ang Espiritu magabaton sang akon inugsiling kag iya ini ipahayag sa inyo.”

Hunyo 15 | Hunyo 17