"Magpangamuyo Kamo sa Ginoo nga Magpadala sing Dugang pa nga mga Mangangani sa Iya Alanyon"

Liturhiya sang Pulong

(Domingo, Hulyo 7, 2019)

Ang Pagbasa gikan sa Libro ni:

Isaias nga Propeta 66:10-14

   Maghinugyaw kamo upod sa Jerusalem; magkalipay kamo tungod sa iya, tanan kamo nga nagapalangga sini nga siyudad! Maghinugyaw kamo upod sa iya karon, tanan kamo nga naglalaw tungod sa iya! Maagom ninyo ang iya kauswagan, kaangay sang isa ka bata sa suso sang iya iloy.
   Ang Ginoo nagasiling, "Pauswagon ko kamo sa walay katapusan; ang manggad sang mga kapungsoran magailig sa inyo kaangay sang suba nga wala ginahubsi. Manginkaangay ikaw sang isa ka bata nga ginapatiti sang iya iloy, ginakugos kag ginapalangga. Pagalipayon ko kamo sa Jerusalem, subong sang isa ka iloy nga nagalipay sang iya anak. Kon makita ninyo ini nga mahanabo, magakalipay kamo; magapabakod ini sa inyo kag magahatag sing maayo nga lawas. Dayon mahibal-an ninyo nga ako, ang Ginoo, magabulig sa mga nagatuman sa akon, kag magapakita sang akon kaakig batok sa akon mga kaaway." 

Salmo sa Pagsabat:

Mga Salmo 66:1-3, 4-5, 6-7, 16, 20

(S) Dayawa ninyo ang Dios tanan kamo nga mga katawuhan.

Dayawa ninyo ang Dios nga may paghinugyaw sa kalipay, tanan kamo nga mga katawuhan! Amba kamo sa paghimaya sang iya ngalan, ihalad sa iya ang mahimayaon nga pagdayaw! Isiling sa Dios, “Daw ano ka makatilingala ang mga butang nga imo ginahimo! (S)
Ang tanan sa duta nagasimba sa imo, nagakanta sila sing mga pagdayaw sa imo, nagakanta sila sing mga pagdayaw sa imo ngalan.” Dali kamo kag tan-awa ninyo ang ginhimo sang Dios, ang iya makatilingala nga mga binuhatan sa tunga sang mga tawo. (S)

Ang dagat ginhimo niya nga mamala nga duta, gintabok sang aton mga katigulangan ang suba nga nagalakat lang, didto naghinugyaw kita tungod sang iya ginhimo. Nagagahom sia sa walay katapusan paagi sa iya kusog kag ginabantayan niya sing maid-id ang mga kapungsoran. (S)

Kari kag magpamati, tanan kamo nga nagatahod sa Dios, kag sugiran ko kamo kon ano ang iya ginhimo sa akon. Ginadayaw ko ang Dios, kay wala niya ginsikway ang akon pangamuyo, ukon ginkuha ang iya mapinadayunon nga gugma sa akon. (S)

2. Ang Pagbasa gikan sa Sulat ni San Pablo nga Apostol, sa mga:

Taga-Galacia 6:14-18

   Pero para sa akon, ang akon lamang mapabugal amo ang krus sang aton Ginoong Jesu-Cristo, kay paagi sa iya krus ang kalibutan patay para sa akon kag ako patay man para sa kalibutan. Indi kinahanglanon ang pagkatinuli ukon ang pagkadi-tinuli, kundi ang kinahanglanon amo ang pagkabag-o nga tinuga. Nahanungod sa mga nagasunod sini nga pagsulondan sa ila pagkabuhi, kabay nga ang paghidait kag ang kaluoy manginyara sa ila, kag sa tanan nga mga pinili sang Dios.

   Sa katapusan: indi na ninyo ako paggamuha, kay ang mga pinalian nga yari sa akon lawas nagapakita nga ako ulipon ni Jesus.

   Mga kautoran ko, kabay nga ang grasya sang aton Ginoong Jesu-Cristo manginyara sa inyo. Kabay pa.

Aleluya:

Colosas 3:15, 16

Ang paghidait nga ginahatag ni Cristo magahari sa inyo mga tagipusoon; ang pulong ni Cristo sa iya kabuganaan dapat magpuyo sa inyo mga tagipusoon. 

Ang Pagbasa sang Santos nga Ebanghelyo suno kay:

San Lucas 10:1-12, 17-20

   Sa tapos sini ang Ginoo nagpili sing 72 ka mga tawo kag iya sila ginpadala sing tag-duhadoha sa pag-una sa iya sa tagsa ka mga banwa kag duog nga iya pagakadtuan. Nagsiling sia sa ila, “Malapad ang alanyon, pero diutay lang ang mga mangangani. Gani magpangamuyo kamo sa tag-iya sang alanyon nga magpadala sia sing dugang pa nga mga mangangani sa iya alanyon. Lakat kamo! Ginapadala ko kamo subong mga karnero sa tunga sang mga lobo. Indi kamo magdala sing kahita, ukon puyo, ukon sandalyas. Indi kamo magdulog sa pagpanamyaw bisan kay sin-o sa dalan. Kon magsulod kamo sa isa ka balay, magsiling kamo anay, ‘Paghidait sa sini nga balay.’ Kon ang nagapuyo dira tawo nga mahidaiton, ibilin sa iya ang inyo panamyaw sang paghidait. Kon indi sia mahidaiton, bawia ninyo ang inyo panamyaw sang paghidait. Magdayon kamo sa sina nga balay, magkaon kag mag-inom sang ginaamuma nila sa inyo, kay ang manugpangabudlay dapat hatagan sang iya suhol. Indi kamo magsagad saylusaylo sing dalayunan. Kon magkadto kamo sa isa ka banwa kag ginaabiabi kamo, kauna ninyo ang ginaamuma sa inyo, ayuha ninyo ang mga nagamasakit sa sina nga banwa, kag magsiling kamo sa mga tawo didto, ‘Ang Ginharian sang Dios malapit na sa inyo.’ Pero kon magsulod kamo sa isa ka banwa kag wala kamo ginaabiabi didto, kadto kamo sa mga dalan kag magsiling, ‘Bisan ang yab-ok sang inyo banwa nga nagatapik sa amon mga tiil amon nga taktakon batok sa inyo. Pero dumdoma ninyo ini, ang Ginharian sang Dios malapit na kuntani sa inyo.’ Nagasiling ako sa inyo nga sa Adlaw sang Paghukom sobra pa ang silot nga pagabatunon sadto nga banwa sang Sodoma.”

   Ang 72 nagbalik nga puno sang kalipay. Nagsiling sila, “Ginoo, bisan pa ang mga yawa nagtuman sa amon tungod sa imo ngalan!”

   Si Jesus nagsabat sa ila, “Nakita ko si Satanas nga nahulog subong sang kilat gikan sa langit. Pamatii ninyo ini! Ginhatag ko sa inyo ang gahom sa pagtapak sa mga man-og kag mga iwiiwi, kag sang tanan nga gahom sang Kaaway, kag wala sing bisan ano nga makahalit sa inyo. Pero indi kamo magkalipay tungod kay ang malaut nga mga espiritu nagatuman sa inyo, kundi magkalipay kamo kay ang inyo ngalan nasulat sa langit.”

Hulyo 6 | Hulyo 8