"Tungod sang Dalagku nga mga Butang nga Nahimo sa Akon sang Gamhanan nga Dios"

Liturhiya sang Pulong

(Huwebes, Agosto 15, 2019)

Ang Pagdala sa Langit sa Mahal nga Birhen Maria
(Misa sa Adlaw)

1. Ang Pagbasa gikan sa Libro sang:

Bugna kay Juan 11:19; 12:1-6, 10

   Ang templo sang Dios sa langit gin-abrihan, kag ang kaban nga nasudlan sang kasugtanan nakita sa iya templo. Dayon nagpangilat, nagginahod sing mabaskog, nagdinaguob, naglinog, nag-ulan sing madamo nga mga yelo nga daw bato.
   Dayon ang isa ka daku kag makatalanhaga nga talan-awon nagpakita sa langit: may isa ka babayi nga ang iya bayu amo ang adlaw, ang bulan yara sa idalom sang iya mga tiil, kag ang iya ulo may korona nga 12 ka mga bituon. Manugbata na sia, kag nagasinggit sia tungod sang kasakit sang pag-anak.
   Ang isa pa gid ka makatalanhaga nga talan-awon nagpakita sa langit. May isa ka daku kag pula nga dragon nga may pito ka mga ulo kag napulo ka mga sungay, kag may korona sa tagsa niya ka ulo. Ginpanglalas sang iya ikog ang ikatlo nga bahin sang mga bituon sa langit kag ginpanghaboy sila sa duta. Nagtindog sia sa atubangan sang babayi nga manugbata, agod nga iya kaunon ang bata sa tion sang iya pagkatawo. Dayon ang babayi nag-anak sang isa ka bata nga lalaki nga magagahom sang tanan nga kapungsoran sa baston nga salsalon. Pero ang bata ginsabnit kag gindala sa Dios kag sa iya trono. Ang babayi nagpalagyo pakadto sa desierto, didto sa duog nga gin-aman sang Dios para sa iya, sa diin pagatatapon sia sa sulod sang 1,260 ka adlaw.
   Dayon nabatian ko ang mabaskog nga tingog sa langit nga nagasiling, “Karon nag-abot na ang kaluwasan halin sa Dios! Karon ang Dios nagpahayag sang iya gahom subong Hari! Karon ang iya Cristo nagpahayag sang iya awtoridad!

Salmo sa Pagsabat:

Mga Salmo 45:10, 11, 12, 16

(S) Sa tuo sang imo trono nagatindog ang rayna, nga nagasuksok sang mga alahas nga nahimo sa pinakapuraw nga bulawan.

Sa tuo sang imo trono nagatindog ang rayna, nga nagasuksok sang mga alahas nga nahimo sa pinakapuraw nga bulawan. (S)
Nobya nga kalaslon sa hari, pamatii ang ginasiling ko, kalimti ang imo mga tawo kag mga himata. (S)
Pagahandumon ka sang hari tungod sang imo katahom, agalon mo sia, gani dapat ka magtuman sa iya. (S)
Nagakari sila sing malipayon kag masinadyahon, kag nagasulod sa palasyo sang hari. (S)

2. Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Corinto 15:20-27

   Pero matuod gid nga si Cristo ginbanhaw gikan sa mga minatay, kag sia amo ang garantiya nga ang mga minatay pagabanhawon. Kay subong nga ang kamatayon nag-abot paagi sa isa ka tawo, sa amo man nga bagay, ang pagkabanhaw gikan sa kamatayon magaabot paagi sa isa ka tawo. Kay subong nga ang tanan nga mga tawo nagkalamatay tungod sang ila kaangtanan kay Adam, sa amo man nga bagay, ang tanan pagabanhawon tungod sang ila kaangtanan kay Cristo. Pero ini pasunod: nahauna si Cristo, kag ang madason amo sila nga iya ni Cristo sa tion sang iya pagkari. Dayon ang katapusan magaabot. Si Cristo magadaog sang tanan nga espirituhanon nga mga gahom, mga awtoridad kag mga kagamhanan kag itugyan niya ang Ginharian sa Dios nga Amay. Kay kinahanglan nga si Cristo maghari, tubtob malutos sang Dios ang tanan nga mga kaaway kag mabutang niya sila sa idalom sang iya mga tiil. Ang katapusan nga kaaway nga pagadag-on amo ang kamatayon. Kay ang kasulatan nagasiling, “Ang Dios nagbutang sang tanan nga mga butang sa idalom sang iya mga tiil.” Maathag gid nga ang mga tinaga “tanan nga mga butang” wala nagalakip sang Dios mismo nga nagbutang sang tanan sa idalom ni Cristo.

Aleluya:

   Si Maria gindala sa langit; nagakalipay ang hangaway sang mga angheles.

Ang Pagbasa sang Santos nga Ebanghelyo suno kay:

San Lucas 1:39-56

   Sa tapos sadto si Maria nanghimos kag nagdalidali sa pagkadto sa isa ka banwa sa kabakuloran sang Judea. Nagkadto sia sa balay ni Zacarias kag iya gin-abiabi si Elisabet. Sang pagkabati ni Elisabet sang pag-abiabi ni Maria, nagkibo ang bata sa iya tiyan. Napun-an si Elisabet sang Espiritu Santo, kag sa mabaskog nga tingog naghambal, “Bulahan ikaw sa tanan nga mga babayi! Bulahan ang bata nga imo ginadala! Ngaa matabo ining daku nga butang sa akon, nga ang iloy sang akon Ginoo magduaw sa akon? Kay sang pagkabati ko gid sang imo pag-abiabi, ang bata sa akon tiyan nagkibo sa kalipay. Bulahan ikaw nga nagtuo nga matuman sa imo ang ginsiling sang Ginoo.”
   Si Maria nagsiling:

“Ang akon tagipusoon
Nagadayaw sa Ginoo,
Kag nagakalipay ang akon espiritu
Tungod sa Dios nga akon Manlulowas.
Kay gintamod niya ako,
Ang iya kubos nga alagad!
Sugod karon ang tanan nga mga tawo
Magatawag sa akon ang bulahan,
Tungod sang dalagku nga mga butang
Nga nahimo sa akon
Sang Gamhanan nga Dios.
Ang iya ngalan balaan.
Nagakaluoy sia sa tanan
Nga nagakahadlok sa iya,
Sa mga kaliwatan kag mga kaliwatan.
Nagpakita sia sang iya gahom,
Ginguba niya
Ang mga plano sang mga bugalon.
Ginpukan niya
Ang gamhanan nga mga hari
Sa ila trono,
Kag ginbayaw niya ang mga kubos.
Ginbusog niya
Sang maayo nga mga butang
Ang mga ginagutom,
Ginpalakat niya nga wala sing dala
Ang mga manggaranon.
Gintuman niya
Ang iya saad sa aton mga katigulangan;
Ginbuligan niya si Israel
Nga iya alagad,
Kag wala sia magkalipat
Sa pagkaluoy sa kay Abraham
Kag sa tanan niya nga mga kaliwat
Sa walay katubtoban!” 

   Si Maria nagtener kanday Elisabet sa sulod sang tatlo ka bulan, kag ugaling nagpauli.

Agosto 15 (Misa sa Bihilya) | Agosto 16