Ang Libro ni Josue

Panguna
   Ang Libro ni Josue maragtas sang pag-agaw sang Canaan sang mga Israelinhon sa idalom sang pagpangulo ni Josue, ang nagbulos kay Moises. Ang dalagku nga mga hitabo amo ang masunod: ang pagtabok sang mga tawo sang Jordan, ang pag-agaw sang Jerico, ang pag-inaway sa Ai, kag ang pagbag-o liwat sang kasugtanan sa tunga sang Dios kag sang iya mga tawo. Ang isa sang mga dinalan sang kasulatan nga nahibal-an sang madamo amo: "Pat-ura ninyo karon nga adlaw kon sin-o ang inyo alagaron . . . Pero ako kag ang akon panimalay magaalagad sa Ginoo" (24:15).

Balayan sang Kaundan
   Ang pag-agaw sang Canaan 1:1—12:24
   Ang pagpahatpahat sang duta 13:1—21:45
      a. Ang duta sa sidlangan sang Jordan 13:1-33
      b. Ang duta sa nakatundan sang Jordan 14:1—19:51
      c. Ang mga siyudad nga dalangpan 20:1-9
      d. Ang mga siyudad sang mga Levinhon 21:1-45
   Ang mga tribo sa sidlangan nagbalik sa ila lugar 22:1-34
   Ang pamilinbilin ni Josue 23:1-16
   Si Josue nagpahanumdom sang kasugtanan sa mga tawo didto sa Siquem 24:1-33

☆☆☆ JOSUE ☆☆☆

1 2 3 4 5 6 7 8 9 10
11 12 13 14 15 16 17 18 19 20
21 22 23 24

☆☆☆ JOSUE ☆☆☆

DEUTERONOMIO《 | 》 MGA HUKOM

JOSUE - Kapitulo 24

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Si Josue Naghambal sa mga Tawo sa Sikem

1 Gintipon ni Josue sa Sikem ang tanan nga mga tribo sang Israel. Gintawag niya ang mga katigulangan, mga pangulo, mga hukom, kag ang mga opisyales sang Israel, kag nagpalapit sila sa atubangan sang Dios.
2 Nagsiling si Josue sa tanan nga mga tawo, “Amo ini ang ginasiling sang Ginoo nga Dios sang Israel: 'Sang una anay ang inyo mga katigulangan nagpuyo sa tabok sang Suba sang Euprates, kag nagsimba sa iban nga mga dios. Ang isa sadtong inyo mga katigulangan amo si Tera, ang amay ni Abraham kag ni Nahor.
3 Ginkuha ko si Abraham halin sa tabok sang Euprates kag gindala ko sia sa bug-os nga duta sang Canaan. Ginhatagan ko sia sing madamo nga mga kaliwat. Ginhatag ko sa iya si Isaac,
4 kag sa kay Isaac, ginhatag ko si Jacob kag si Esau. Ginhatag ko kay Esau ang kabakuloran sang Seir nga mangin-iya kaugalingon, pero si Jacob kag ang iya mga kaanakan nagdulhog pa Ehipto.
5 Dayon ginpadala ko si Moises kag si Aaron, kag ginpadalhan ko sing daku nga kalalat-an ang Ehipto. Pagkatapos ginpagwa ko kamo.
6 Ginpagwa ko ang inyo mga ginikanan sa Egipto, kag nakaabot sila sa Dagat nga Mapula. Ginlagas sila sang mga Ehiptohanon sang ila mga karuwahi kag mga soldado nga nagasakay sa kabayo pakadto sa dagat.
7 Sang magpangamuyo sila sa akon, ginbutangan ko sing kadudolman sa tunga nila kag sa mga Ehiptohanon. Ginpalapaw ko ang dagat sa mga Ehiptohanon kag gintabunan sila. Nakita ninyo kon ano ang akon ginhimo sa Ehipto, kag nagpuyo kamo sa desierto sa malawig nga panahon.
8 “ ‘Akon kamo dayon gindala sa duta sang mga Amornon, nga nagpuyo sa sidlangan nga bahin sang Jordan. Nagpakig-away sila sa inyo, kag ginpadaog ko kamo batok sa ila. Gin-agaw ninyo ang ila duta, kag ginlaglag ko sila sa atubangan ninyo.
9 Dayon si Balak, ang anak nga lalaki ni Sipor nga hari sang Moab nagpakig-away batok sa Israel. Nagpatunda sia kay Balaam, ang anak nga lalaki ni Beor, kag nagpangabay sa iya sa pagpakamalaut sa inyo.
10 Wala ko pagpamatii si Balaam, gani ginbendisyunan niya kamo, kag ginluwas ko kamo kay Balak.
11 Nagtabok kamo sa Jordan, kag nakaabot sa Jerico. Ang mga taga-Jerico nagpakig-away batok sa inyo, kag Subong man ang mga Amornon, ang mga Peresnon, ang mga Canaanhon, ang mga Hethanon, ang mga Gergesnon, ang mga Hebhanon, kag ang mga Jebusnon. Ginpadaog ko kamo batok sa ila.
12 Ginpadala ko ang kahadlukan sa una ninyo sa pagtabog sang duha ka hari nga Amornon, kag wala ninyo magamit ang inyo mga espada kag mga pana.
13 Ginhatagan ko kamo sing duta nga wala gid ninyo ginpangabudlayi, kag mga siyudad nga wala ninyo ginpatindog. Nagapuyo kamo didto, kag nagakaon sang mga ubas kag sang mga olibo nga wala ninyo gintanom.’
14 “Gani karon, simbaha ninyo ang Ginoo kag alagara ninyo sia sing maminatud-on kag matutom. Kalimti ninyo ang mga dios nga ginsimba anay sang inyo mga katigulangan didto sa Mesopotamia kag sa Ehipto, kag alagara ninyo ang GINOO.
15 Kon indi kamo luyag mag-alagad sa Ginoo, pat-ura ninyo karon nga adlaw kon sin-o ang inyo alagaron, ang mga dios bala nga gin-alagad sang inyo mga katigulangan sa duta sang Mesopotamia, ukon ang mga dios sang mga Amornon, nga sa ila duta nagapuyo kamo. Pero ako kag ang akon panimalay magaalagad sa Ginoo.”
16 Nagsabat ang mga tawo, "Indi gid kami maghunahona sa pagbiya sa Ginoo kag mag-alagad sa iban nga mga dios!
17 Ang Ginoo nga amon Dios nagluwas sa amon mga ginikanan kag sa amon gikan sa pagpaulipon didto sa duta sang Ehipto, kag nakita namon ang dalagku nga mga butang nga iya ginhimo. Iya kami gin-apinan bisan diin kami magkadto sa tunga sang mga kapungsoran nga amon ginpang-agyan.
18 Samtang nagapadayon kami sa paglakat, ang Ginoo nagtabog sang mga tawo, nga mga Amornon nga nagpuyo sa duta. Gani magaalagad man kami sa Ginoo, kay sia amo ang amon Dios."
19 Nagsiling si Josue sa mga tawo, "Indi kamo makaalagad sa Ginoo, kay sia balaan kag maimon nga Dios. Indi niya pagpatawaron ang inyo mga sala kag mga paglapas.
20 Kon magbiya kamo sa Ginoo kag mag-alagad sa iban nga mga dios, sumpongon kamo sang Ginoo kag silutan niya kamo. Pagalaglagon niya kamo, bisan nga sang una nanginmaayo sia sa inyo."
21 Ang mga tawo nagsiling kay Josue, "Indi mahimo! Magaalagad kami sa Ginoo."
22 Si Josue nagsiling sa ila, "Kamo ang mga saksi sang inyo kaugalingon sa sining kamatuoran nga nagpamat-od kamo sa pag-alagad sa Ginoo." Nagsiling sila, "Huo kami mga saksi."
23 Nagsiling si Josue, "Gani sikwaya ninyo ang iban nga mga dios nga yara sa tunga ninyo, kag magsaad kamo nga magmainunongon sa Ginoo, ang Dios sang Israel."
24 Nagsiling ang mga tawo kay Josue, "Magaalagad kami sa Ginoo nga amon Dios, kag tumanon namon ang iya mga sugo.”
25 Gani si Josue naghimo sing kasugtanan para^j sa mga tawo sadto nga adlaw, kag didto sa Sikem ginhatag niya sa ila ang mga kasugoan kag mga pagsulondan.
26 Ginsulat ni Josue ini nga mga sugo sa libro sang kasugoan sang Dios. Nagkuha sia sing daku nga bato, kag ginpahamtang ini didto sa idalom sang kahoy nga teribento sa santuaryo sang Ginoo.
27 Kag nagsiling si Josue sa tanan nga mga tawo, "Tan-awa ninyo ini nga bato! Amo ini ang manginsaksi naton. Nakabati ini sang tanan nga mga pulong nga ginhambal sang GINOO sa aton. Gani manginsaksi ini batok sa inyo agod indi kamo magrebelde batok sa inyo Dios.”
28 Gani ginpapauli ni Josue ang mga tawo, kag ang tagsatagsa nagbalik sa iya kaugalingon nga duta.

Napatay si Josue kag si Eleasar

29 Sa tapos sadto, si Josue, ang anak ni Nun, nga alagad sang Ginoo, napatay sa edad nga 110 ka tuig.
30 Ginlubong nila sia sa iya kaugalingon nga duta sa Temnatsera, sa kabakuloran sang Efraim, sa aminhan sang bukid sang Gaas.
31 Ang mga Israelinhon nag-alagad sa Ginoo sang buhi pa si Josue, kag sang mapatay sia nagpadayon sila sa pag-alagad sa Ginoo tubtob nga nagkabuhi pa ang mga pangulo nga nakahibalo sang tanan nga ginhimo sang Ginoo para sa Israel.
32 Ang mga tul-an ni Jose nga gindala sang mga Israelinhon halin sa Ehipto, ginlubong sa Sikem, sa isa ka puna nga duta nga ginbakal ni Jacob sing isa ka gatos ka mga pilak sa mga anak nga lalaki ni Hamor, ang amay ni Sikem. Ang duta ginpanubli sang mga kaliwat ni Jose.
33 Si Eleasar nga anak nga lalaki ni Aaron napatay, kag ginlubong sa Gibea, sa banwa sang iya anak nga lalaki nga si Pines, nga ginhatag sa iya sa kabakuloran sang Efraim.

^jpara; ukon upod.

JOSUE - Kapitulo 23 <<<   >>> MGA HUKOM - Kapitulo 1

JOSUE - Kapitulo 23

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Si Jose Naghambal sa mga Tawo

1 Sang makaligad ang madamo nga mga tinuig sa tapos mahatagan sang Ginoo ang Israel sing paghidait sa ila mga kaaway sa palibot nila, si Josue tigulang na kaayo.
2 Ginpatawag niya ang bug-os nga Israel, mga katigulangan, mga pangulo, mga hukom, mga opisyales, kag nagsiling sia, "Tigulang na gid ako karon.
3 Nakita ninyo ang tanan nga ginhimo sang Ginoo nga inyo Dios sa sini tanan nga mga pungsod tungod sa inyo. Ang Ginoo nga inyo Dios nagpakig-away tungod sa inyo.
4 Pamati kamo! Ginpanghatag ko sa inyo mga tribo ang mga pungsod nga nabilin, kag subong man ang tanan nga mga pungsod nga akon na naagaw, halin sa Jordan sa sidlangan pakadto sa Dagat sang Mediteraneo sa nakatundan.
5 Ang Ginoo nga inyo Dios magatabog kag magapapalagyo sa ila sa inyo atubangan. Mangin-inyo ang ila duta, suno sa ginsaad sa inyo sang Ginoo nga inyo Dios.
6 Gani indi kamo magkalipat sa pagtuman kag sa paghimo sang tanan nga nasulat sa libro sang kasugoan ni Moises. Indi pagpatumbayai ang bisan ano nga bahin sini,
7 agod nga indi kamo magpakig-impon sa sini nga mga tawo nga nabilin sa tunga ninyo, ukon magsambit kamo sang mga ngalan sang ila mga dios, ukon maggamit sang ila mga ngalan sa inyo mga sumpa ukon mag-alagad sa ila, ukon magsimba sa ila.
8 Magmatutom kamo sa Ginoo, subong nga kamo nagmatutom tubtob karon.
9 Ang Ginoo nagtabog sang dalagku kag mabakod nga mga pungsod sa pagpalagyo sa inyo, kag wala pa sing isa nga nakasarang sa pagbato sa inyo.
10 Ang bisan sin-o sa inyo sarang makapadalagan sang isa ka libo ka mga tawo, kay ang Ginoo nga inyo Dios nagapakig-away tungod sa inyo, suno sa iya ginsaad.
11 Gani indi kamo magkalipat sa paghigugma sa Ginoo nga inyo Dios.
12 Kon magtalikod kamo, kag magbuylog sa mga pungsod nga yara pa nabilin sa tunga ninyo, kag magpangasawa ukon magpamana sa ila,
13 siguro gid nga ang Ginoo nga inyo Dios indi magtabog sini nga mga pungsod sa pagpalagyo sa inyo. Sa baylo, mangingsiod ukon tugalbong sila nga makatalagam para sa inyo, kag subong kasakit sang putik nga ginalapdos sa inyo likod ukon tunok sa inyo mga mata. Magapadayon ini tubtob magkalamatay kamo sa sining maayo nga duta nga ginhatag sa inyo sang Ginoo nga inyo Dios.
14 "Karon madali na lang ako mapatay. Ang tagsatagsa sa inyo nakahibalo sa inyo tagipusoon kag kalag nga ang Ginoo nga inyo Dios naghatag sa inyo sang tanan nga mga maayo nga butang nga iya ginsaad. Ang tanan nga iya ginsaad natuman, kag wala sing isa sang iya mga ginsaad nga wala matuman.
15-16 Huo, ang Ginoo nga inyo Dios naghimo sang tanan nga mga maayo nga butang nga iya ginsiling nga himuon. Pero kon indi ninyo pagtumanon ang kasugtanan nga ginsugo sang Ginoo nga inyo Dios sa inyo, kon magpadayon kamo sa pag-alagad sa iban nga mga dios kag magsimba sa ila, dayon pagasilutan niya kamo tubtob nga wala sing isa sa inyo nga mabilin sa sining maayo nga duta nga iya ginhatag sa inyo."

JOSUE - Kapitulo 22 <<<   >>> JOSUE - Kapitulo 24

JOSUE - Kapitulo 22

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang Altar sa Pangpang sang Jordan

1 Karon gintawag ni Josue sing tingob ang mga tawo sang mga tribo ni Ruben, ni Gad, kag ang katunga sang tribo ni Manases.
2 Nagsiling sia sa ila, "Ginhimo ninyo ang tanan nga ginsugo sa inyo ni Moises nga alagad sang Ginoo, kag gintuman ninyo ang tanan nga ginsugo ko sa inyo.
3 Wala ninyo ginpatumbayai ang inyo isigka-lsraelinhon sa malawig nga panahon, tubtob karon nga adlaw. Gintuman ninyo sing tul-id ang mga sugo sang Ginoo nga inyo Dios.
4 Karon, ang Ginoo nga inyo Dios naghatag sing paghidait sa inyo isigka-Israelinhon, suno sa iya ginsaad. Gani balik kamo sa duta nga inyo ginpanag-iyahan, ang duta sa tabok sang Jordan nga ginhatag sa inyo ni Moises nga alagad sang Ginoo.
5 Indi gid kamo makalipat sa pagtuman sang mga sugo kag kasugoan nga ginhatag sa inyo ni Moises nga alagad sang Ginoo: higugmaa ang GINOO nga imo Dios, himoa ang iya kabubot-on, tumana ang iya mga sugo, magmatutom sa iya, kag alagara sia sa bug-os nga tagipusoon kag kalag."
6 Ginbendisyunan sila ni Josue, kag ginpalakat. Dayon nagpauli sila.
7 Si Moises naghatag sang duta sa Basan sa katunga nga tribo ni Manases, pero sa isa ka katunga sang tribo ni Manases, si Josue naghatag sang duta sa nakatundan sang Jordan upod sa iban nga mga tribo. Sa tapos mabendisyunan ni Josue ini nga mga tawo kag papaulion na,
8 ginsingganan niya sila, "Magapauli kamo sa inyo mga puloy-an nga manggaranon gid, nga may madamo nga mga kasapatan, pilak, bulawan, saway, salsalon, kag madamo nga mga bayu. Partihi ninyo ang inyo isigka-Israelinhon sang inyo naagaw sa inyo mga kaaway.”
9 Gani ang mga tawo sang tribo ni Ruben, Gad kag ang katunga sang tribo ni Manases nagpauli. Ginbayaan nila ang iban nga mga Israelinhon sa Silo, sa duta sang Canaan, kag nagkadto sila sa duta sang Galaad, ang duta nga natuon sa ila suno sa ginsugo sang Ginoo paagi kay Moises.
10 Sang pag-abot nila sa Gelilot sa tabok sang Jordan nga sakop sang Canaan, nagpatondog sila sang isa ka daku kag makahalawhaw nga altar sa Iuyo sang suba sang Jordan.
11 Ang iban nga mga tawo sang Israel nakabati sini kag ginsingganan sila, "Pamati kamo! Ang mga tawo sang mga tribo ni Ruben, ni Gad kag ang katunga sang tribo ni Manases nagpatindog sing altar sa Gelilot, malapit sa dulonan sang Canaan, sa tabok sang Jordan nga natuon sa aton!"
12 Sang pagkabati sini sang mga tawo sang Israel, ang bug-os nga katilingban nagtipon sing tingob sa Silo, sa pagpakig-away batok sa ila.
13 Karon ginpadala sang mga Israelinhon si Pines, ang anak ni Eleasar nga pari, sa mga kaliwatan sang mga tribo nanday Ruben, Gad, kag sa katunga sang tribo ni Manases, sa duta sang Galaad.
14 Napulo ka mga pangulo ang naglakat upod kay Pines, isa gikan sa tagsa ka tribo sang Israel. Ang tagsatagsa sa ila pangulo sang isa ka panimalay sang mga tribo.
15 Nag-abot sila sa duta sang Galaad, kag nagsiling sa mga tawo ni Ruben, ni Gad, kag sa katunga nga tribo ni Manases,
16 “Amo ini ang inugsiling sang bug-os nga katilingban sang Ginoo: 'Ngaa ginhimo ninyo ining malaut nga butang batok sa Dios sang Israel? Nagrebelde kamo batok sa GINOO sa inyo pagpatindog sing altar para sa inyo kaugalingon! Wala na kamo nagasunod sa iya!
17 Wala bala kamo makadumdom, sang pagpakasala sa Peor, sang ginsilutan sang Ginoo ang iya mga tawo? Nagaantos pa gani kita karon tungod sadto. Indi pa bala tuman na yadto nga sala?
18 Maga-untat na bala kamo karon sa pagsunod sa Ginoo? Kon magrebelde kamo batok sa iya karon nga adlaw, magakaakig sia sa tanan nga mga tawo sang Israel buas.
19 Gani kon ang inyo duta indi takos nga pagsimbahan, tabok kamo sa duta sang Ginoo sa diin yara ang tolda nga iya ginapuy-an. Magpakigbahin kamo sang duta upod sa amon. Pero indi kamo magrebelde batok sa Ginoo, ukon batok sa amon paagi sa pagpatindog sang inyo altar, luas sa altar sang Ginoo nga aton Dios.
20 Dumdoma ninyo nga si Akan nga anak nga lalaki ni Sera, wala magtuman sang sugo nahanungod sang mga butang nga gintugyan nga pagalaglagon, kag ang bug-os nga katilingban sang Israel ginsilutan. Indi si Akan lamang ang napatay tungod sang iya sala.’”
21 A ng mga tawo sang tribo ni Ruben, ni Gad, kag ang katunga nga tribo ni Manases nagsabat sa mga pangulo sang mga panimalay sang Israel,
22 "Ang Makagagahom amo ang Dios! Sia amo ang Ginoo! Ang Makagagahom amo ang Dios! Sia amo ang Ginoo! Nahibaluan niya kon ngaa ginhimo namon ini kag dapat man ninyo mahibaluan! Kon nagrebelde kami kag nagbiya sa GINOO, indi kami pagtugoti nga mabuhi!
23 Kon wala kami magtuman sa Ginoo kag nagpatindog kami sang amon kaugalingon nga altar sa pagsunog sing mga halad, ukon sa paghalad sang mga halad nga kalan-on ukon sang halad sa paghiambit, kabay nga ang Ginoo gid magsilot sa amon.
24 Ginhimo namon ini kay nahadlok kami nga sa ulihi ang inyo mga kaliwat magsiling sa amon mga kaliwat, ‘Ano bala ang inyo labot sa Ginoo, ang Dios sang lsrael?
25 Ginhimo sang GlNOO ang Suba sang Jordan nga dulonan namon kag ninyo nga mga kaliwat ni Ruben kag ni Gad. Wala kamo sing labot sa Ginoo.' Dayon basi ang inyo kaliwat magpauntat sang amon kaliwat sa pagsimba sa Ginoo.
26 Gani naghimo kami sing altar, indi sa pagsunog sing mga halad ukon sa paghimo sing mga halad,
27 kundi subong nga tanda sa tunga ninyo kag namon, kag subong man para sa aton mga kaliwat nga magasunod sa aton, nga kita nagasimba sa Ginoo paagi sa aton mga halad nga sinunog, mga halad kag mga halad sa paghiambit. Tungod sini ang inyo mga kaliwat indi makasiling sa amon mga kaliwat sa ulihi, ‘Wala kamo sing labot sa Ginoo.'
28 Ang amon sini tuyo amo nga kon mahanabo gid man ini, makasiling kami, ‘Tan-awa bala ninyo! Ang aton mga katigulangan naghimo sing altar subong gid sang altar sang Ginoo. Indi sa pagsunog sang mga dulot ukon para sa mga halad, kundi isa ka tanda para sa inyo kag sa amon.'
29 Indi gid kami magrebelde batok sa Ginoo, ukon mag-untat sa pagsunod sa iya karon, paagi sa pagpatindog sing altar nga sunogan sang mga halad, ukon para sa mga halad nga kalan-on, kag mga halad. Indi kami magpatindog sing iban nga mga altar, luas sa altar sang Ginoo nga amon Dios nga nagatindog sa atubangan sang iya tolda nga puloy-an."
30 Si Pines nga pari, kag ang mga pangulo sang katilingban nga kaupod niya, ang mga pangulo sang mga panimalay sang Israel, nakabati sang ginsiling sang mga kaliwat ni Ruben, ni Gad, kag ni Manases, kag nalipay sila.
31 Si Pines nga anak nga lalaki ni Eleasar nga pari, nagsiling sa mga kaliwat ni Ruben, ni Gad, kag ni Manases, "Karon, aton nahibaluan nga ang Ginoo kaupod naton, kay wala kamo magrebelde batok sa Ginoo. Ginluwas ninyo ang mga tawo sang Israel sa silot sang Ginoo.”
32 Gani ginbayaan ni Pines kag sang mga pangulo ang mga tawo ni Ruben, kag ni Gad sa duta sang Galaad, kag nagbalik sila sa Canaan, sa mga tawo sang Israel, kag nagsugid sa ila.
33 Naluyagan sang mga tawo sang Israel ang ila mga ginsugid. Nagdayaw sila sa Dios, kag wala na sila maghambal nahanungod sa pagpakig-away, agod malaglag nila ang mga duta nga ginaestaran sang mga  kaliwat ni Ruben kag ni Gad.
34 Gintawag sang mga tawo ni Ruben kag ni Gad ang altar nga "Mga Tanda," kay siling nila, "Tanda ini para sa aton tanan nga ang Ginoo amo ang Dios.”

JOSUE - Kapitulo 21 <<<   >>> JOSUE - Kapitulo 23

JOSUE - Kapitulo 21

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang mga Siyudad sang mga Lebinhon

1 Ang mga pangulo sang mga panimalay sang mga Lebinhon nagkadto kay Eleasar nga pari, kay Josue nga anak nga lalaki ni Nun, kag sa mga pangulo sang mga panimalay sang tanan nga mga tribo sang Israel.
2 Nagsiling sila sa ila didto sa Silo, sa duta sang Canaan, "Ang Ginoo nagsugo paagi kay Moises nga hatagan kami sing mga siyudad nga amon puy-an, kag mga duta sa palibot nga halalban sang amon mga kahayupan."
3 Suno sa ginsugo sang Ginoo, ang mga tawo sang Israel naghatag sa mga Lebinhon sini nga mga siyudad kag mga duta nga halalban gikan sa ila mga kadutaan.
4 Ang panimalay sang mga Koatnon amo ang nahauna nga ginhatagan sing mga siyudad. Ang mga Lebinhon nga mga kaliwat ni Aaron nga pari, ginhatagan sing trese ka mga siyudad gikan sa mga tribo nanday Juda, Simeon, kag Benjamin.
5 Ang iban sang mga Koatnon ginhatagan sing napulo ka mga siyudad, gikan sa mga panimalay sang mga tribo nanday Efraim kag Dan, kag gikan sa katunga nga tribo ni Manases.
6 Ang mga Gersonhon ginhatagan sing trese ka mga siyudad gikan sa mga panimalay sang mga tribo nanday Isakar, Aser, Neftali, kag gikan sa katunga nga tribo ni Manases nga yara sa Basan.
7 Ang panimalay sang mga Merarinhon ginhatagan sing dose ka mga siyudad gikan sa mga tribo nanday Ruben, Gad, kag Sabulon.
8 Ang mga tawo sang Israel, naghatag sini nga mga siyudad kag ang ila mga palahalban sa mga Lebinhon, paagi sa pagabutgabot,ⁱ suno sa ginsugo sang GINOO paagi kay Moises.
9 Amo ini ang mga ngalan sang mga siyudad gikan sa mga tribo ni Juda kag ni Simeon nga ginhatag
10 sa mga kaliwat ni Aaron, sa isa ka panimalay sang mga Koatnon, nga mga Lebinhon. Sila amo ang nahauna nga ginhatagan sing parti.
11 Ginhatag nila sa ila ang Kiryatarba (si Arba amay ni Anak), nga amo ang Hebron, sa kabakuloran sang Juda, lakip ang mga halalban sa palibot sini.
12 Pero ang mga latagon sang siyudad kag ang iya mga banwa ginhatag nila kay Caleb, ang anak nga lalaki ni Hepone, subong iya kaugalingon.
13 Ginhatag nila ining masunod nga mga siyudad sa mga kaliwat ni Aaron nga pari: ang Hebron (isa ka siyudad nga dalangpan para sa tawo nga nakapatay), lakip ang tanan niya nga halalban, ang Libna,
14 Hatir, Estemoa,
15 Holon, Debir,
16 Ayin, Huta, kag Betsemes lakip ang tanan nila nga mga halalban: siyam ka mga siyudad gikan sa sining duha ka mga tribo.
17 Gikan sa tribo ni Benjamin, ginhatag nila ang Gibeon, Geba,
18 Anatot, kag Almon lakip ang ila mga palahalban: apat ka mga siyudad.
19 Trese ka mga siyudad tanan lakip ang ila mga halalban, ang ginhatag sa mga kaparian nga mga kaliwat ni Aaron.
20 Ang iban nga mga panimalay sang mga Koatnon nga mga Lebinhon, ginhatagan sing mga siyudad gikan sa tribo ni Efraim.
21 Ginhatag sa ila ang Sikem kag ang iya halalban sa kabakuloran sang Efraim (isa ka siyudad nga dalangpan para sa tawo nga nakapatay), ang Geser,
22 Kibsaim, kag Bethoron lakip ang ila mga halalban: apat ka mga siyudad.
23 Gikan sa tribo ni Dan, ginhatag sa ila ang Elteke, Gibeton,
24 Ayalon, kag Gatrimon, lakip ang ila mga halalban: apat ka mga siyudad.
25 Gikan sa katunga sang tribo ni Manases, ginhatag sa ila ang Taanak kag Gatrimon lakip ang ila mga halalban: duha ka siyudad.
26 Ining mga panimalay sang mga Koatnon nakabaton sing napulo ka mga siyudad tanan, lakip ang ila mga halalban.
27 Ang isa pa ka panimalay sang mga Lebinhon nga mga Gersonhon, nakabaton gikan sa katunga nga tribo ni Manases sing duha ka siyudad: ang Golan sa Basan (isa ka siyudad nga dalangpan para sa tawo nga nakapatay), kag Beestera, lakip ang ila mga halalban.
28 Gikan sa tribo ni Isakar, nabaton nila ang Kision, Daberat,
29 Harmut, Enganim, lakip ang ila mga halalban: apat ka mga siyudad.
30 Gikan sa tribo ni Aser, nabaton nila ang Misal, Abdon,
31 Helkat, kag Rehob, lakip ang ila mga halalban: apat ka mga siyudad.
32 Gikan sa tribo ni Neftali, nabaton nila ang Cades sa Galilea, lakip ang iya halalban (isa ka siyudad nga dalangpan para sa tawo nga nakapatay), ang Hamotdor, kag Kartan, lakip ang ila mga halalban: tatlo ka mga siyudad.
33 Ang nagkalainlain nga mga panimalay sang mga Gersonhon, nakabaton sing trese tanan ka mga siyudad lakip ang ila mga halalban.
34 Ang iban sang mga Lebinhon, ang mga panimalay sang mga kaliwat Merarinhon, nakabaton gikan sa tribo ni Sabulon sang masunod nga mga siyudad: Hokneam, Karta,
35 Dimna, NahaIal, lakip ang ila mga halalban: apat ka mga siyudad.
36 Gikan sa tribo ni Ruben, nabaton nila ang Beser, Hahas,
37 Kedemot, Mepaat, lakip ang ila mga halalban: apat ka mga siyudad.
38 Gikan sa tribo ni Gad, nabaton nila ang Ramot sa Galaad, lakip ang iya halalban (isa ka siyudad nga dalangpan para sa tawo nga nakapatay), ang Mahanaim,
39 Jesbon, kag Haser lakip ang ila mga halalban: apat ka siyudad tanan.
40 Ang iban sang mga Lebinhon, ang nagkalainlain nga mga panimalay sang mga Merarinhon ginhatagan sing dose tanan ka mga siyudad.
41 Gikan sa kadutaan nga ginpanag- iyahan sang mga Israelinhon,
48 tanan ka mga siyudad lakip ang ila mga halalban, ang ginhatag sa mga Lebinhon.
42 Ang kadaisa sini nga mga siyudad may halalban sa palibot.

Ang mga Israelinhon Nagpanag-iya sang Duta

43 Gani ginhatag sang Ginoo sa Israel ang tanan nga duta nga ginsaad niya sa ila mga katigulangan nga ihatag sa ila. Sang mapanag-iyahan nila ini, nagpuyo sila didto.
44 Ang Ginoo naghatag sa ila sing paghidait sa palibot nila, suno sa iya ginsaad sa ila mga katigulangan. Wala sing isa sang ila mga kaaway nga makasarang sa ila, kay ang Ginoo nagpadaog sa ila batok sa tanan nila nga mga kaaway.
45 Gintuman sang Ginoo ang tanan nga maayo nga mga ginsaad niya sa mga tawo sang Israel.

ⁱPAGABUTGABOT: Tan-awa ang 14:2.

JOSUE - Kapitulo 20 <<<   >>> JOSUE - Kapitulo 22

JOSUE - Kapitulo 20

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang mga Siyudad nga Dalangpan

1 Karon nagsiling ang Ginoo kay Josue,
2 "Singgana ang mga tawo sang Israel: 'Magpili kamo sing mga siyudad nga dalangpan nga ginsiling ko anay sa inyo paagi kay Moises.
3 Ang tawo nga makapatay sa indi hungod kag sa wala niya mahibal-i makapanago didto, kag makapalagyo sa tawo nga luyag magtimalos sa iya.
4 Makapalagyo sia sa isa sining mga siyudad, makakadto sa duog sang hukmanan sa salamputan sang siyudad, kag magpaathag sa mga pangulo nahanungod sang natabo. Pasudlon dayon nila sia sa siyudad, kag hatagan sing duog nga mapuy-an, agod makapuyo sia didto.
5 Kon ang tawo nga luyag magtimalos maglagas sa iya didto, ang mga tawo sa siyudad indi magtugyan sang nakapatay sa tawo nga luyag magtimalos. Pagaapinan nila sia nga indi maano, kay indi hungod ang iya pagpatay sa iya isigka-Israelinhon, kag indi tungod sang iya kaakig.
6 Magatener sia sa amo nga siyudad tubtob mabista ang iya kaso sa atubangan sang katilingban, kag tubtob mapatay ang pinakamataas nga pari sadto nga panahon. Sa tapos sini makapauli na ang tawo sa iya kaugalingon nga banwa nga iya ginhalinan sang iya pagpalagyo.'"
7 Gani ila ginpain ang Cades sa Galilea sa kabakuloran sang Neftali, ang Sikem sa kabakuloran sang Efraim, kag ang Kiryatarba (ukon Hebron), sa kabakuloran sang Juda.
8 Sa sidlangan nga bahin sang Jordan, sa mataas nga kapatagan sa sidlangan sang Jerico sa desierto, ginpili nila ang Beser gikan sa tribo ni Ruben, ang Ramot sa Galaad gikan sa tribo ni Gad, kag ang Golan sa Basan gikan sa tribo ni Manases.
9 Amo ini ang mga siyudad nga dalangpan nga ginpili para sa tanan nga mga tawo sang Israel, kag para man sa mga dumoluong nga nagapuyo upod sa ila. Ang bisan sin-o nga makapatay sing tawo sa indi hungod, makadangop didto agod indi maano. Indi sia mapatay sang bisaan sin-o nga luyag magtimalos, kag didto pagabistahon ang iya kaso sa atubangan sang katilingban.

JOSUE - Kapitulo 19 <<<   >>> JOSUE - Kapitulo 21

JOSUE - Kapitulo 19

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang Kadutaan nga Natuon kay Simeon

1 Ang ikaduha nga bahin sang duta ginhatag sa mga panimalay sang tribo ni Simeon. Ang ila kadutaan yara sa tunga sang duta nga ginhatag sa tribo ni Juda.
2 Naglakip ini sang Beerseba, Seba, Molada,
3 Hasarsual, Bala, Esem,
4 Eltolad, Betul, Horma,
5 Siklag, Betmarkabot, Hasarsusa,
6 Betlebaot, kag Saruhen: trese ka mga siyudad, lakip ang ila mga kabanwahanan.
7 Yara man ang Ayin, Rimon, Eter, kag Asan: apat ka mga siyudad, lakip ang ila mga kabanwahanan.
8 Naglakip ini sang tanan nga mga kabanwahanan sa palibot sini nga mga siyudad tubtob sa Baalatbeer, Rama sang Negeb. Amo ini ang duta nga nabaton sang mga panimalay sang tribo ni Simeon subong ila kaugalingon.
9 Ang bahin ni Simeon yara nasakop sa bahin sang kadutaan ni Juda. Ang kadutaan nga natuon kay Juda tama ka daku sang sa ila kinahanglanon, gani ginhatag ang bahin sang iya duta sa tribo ni Simeon.

Ang Kadutaan nga Natuon kay Sabulon

10 Ang ikatlo nga bahin sang duta ginhatag sa mga panimalay sang tribo ni Sabulon. Ang duta nga nabaton nila naglambot tubtob sa Sarid.
11 Gani ang dulonan nagtaklad pa nakatundan, pakadto sa Marala, nga nagatambi sa Dabeset kag sa sapa sa sidlangan sang Hokneam.
12 Sa tabok sang Sarid, nagpadayon ini sa sidlangan pakadto sa dulonan sang Kislottabor, dayon pa Daberat kag nagtaklad pa Hapia.
13 Halin didto nagpadayon ini pa sidlangan pakadto sa Gatheper, kag sa Etkasin, nga nagaliko padulong sa Nea pakadto sa Rimon.
14 Sa naaminhan nga dulonan nagliko ini pakadto sa Hanaton, kag nag-untat ini sa kapatagan sang Eptael.
15 Naglakip ini sang Katat, Nahalal, Simron, Idala, kag Betlehem: dose ka mga siyudad, lakip ang ila mga kabanwahanan.
16 Ini nga mga siyudad kag ang ila mga kabanwahanan yara sa duta nga nabaton sang mga panimalay sang tribo ni Sabulon subong ila kaugalingon.

Ang Kadutaan nga Natuon kay Isakar

17 Ang ikap-at nga bahin sang duta ginhatag sa mga panimalay sang tribo ni lsakar.
18 Ang kasangkaron sini naglakip sang Hesreel, Kesulot, Sunem,
19 Haparaim, Sion, Anaharat,
20 Rabit, Kision, Ebes,
21 Remet, Enganim, Enhada, kag Betpases.
22 Ang dulonan naglambot sa Tabor, sa Sahasuma, kag sa Betsemes, kag nag-untat ini sa Jordan. Naglakip ini sang desesayes ka mga siyudad kag ang ila mga kabanwahanan.
23 Ini nga mga siyudad kag ang ila mga kabanwahanan yara sa duta nga nabaton sang mga panimalay sang tribo ni Isakar subong ila kaugalingon.

Ang Kadutaan nga Natuon kay Aser

24 Ang ikalima nga bahin sang duta ginhatag sa mga panimalay sang tribo ni Aser.
25 Ang kasangkaron sini naglakip sang Helkap, Hali, Beten, Aksap,
26 Alamelek, Amad, kag Mesal. Sa nakatundan nayon nagtambi ini sa Karmelo kag sa Sihorlibnat.
27 Samtang nagliko ini pa sidlangan, ang dulonan nagpadulong pa Betdagon nga nagatambi sa Sabulon kag sa kapatagan sang Iptael padulong sa aminhan pakadto sa Betemek kag Neiel. Nagpadayon ini pa aminhan pakadto sa Kabul,
28 Ebron, Rehob, Hamon, Kana, tubtob sa Daku nga Sidon.
29 Ang dulonan nagliko dayon pakadto sa Rama, kag nagalambot sa Tiro, ang siyudad nga nalibutan sing mga pader. Nagliko dayon ini pakadto sa Hosa, kag nag-untat ini sa Dagat sang Mediteraneo. Naglakip ini sang Mahalab, Aksib.
30 Uma, Apek, kag Rehob—baynte dos ka mga siyudad, lakip ang ila mga kabanwahanan.
31 Ini nga mga siyudad kag ang ila mga kabanwahanan yara sa duta nga nabaton sang mga panimalay sang tribo ni Aser subong ila kaugalingon.

Ang Kadutaan nga Natuon kay Neftali

32 Ang ikan-om nga bahin sang duta ginhatag sa mga panimalay sang tribo ni Neptali.
33 Ang iya dulonan naggikan sa Helep, gikan sa kahoy nga terebinto sa Saananim, gikan sa Adaminekeb kag Habneel, tubtob sa Lakum, kag nag-untat ini sa Jordan.
34 Ang dulonan nagliko pa nakatundan pakadto sa Asnottabor, gikan didto pakadto sa Hukok, nagatambi sa Sabulon sa bagatnan, sa Aser sa nakatundan, kag sa Juda sa sidlangan, sa Jordan.^g
35 Ang mga siyudad nga nalibutan sing mga pader amo ang masunod: Sidim, Ser, Hamat, Rakat, Kineret,
36 Adama, Ram Hasor,
37 Kades, Edrei, Enhasor,
38 Iron, Megdalel, Horem, Betanat, kag Betsemes: desenuebe ka mga siyudad, lakip ang ila mga kabanwahanan.
39 Ini nga mga siyudad kag mga kabanwahanan yara sa duta nga nabaton sang mga panimalay sang tribo ni Neftali subong ila kaugalingon.

Ang Kadutaan nga Natuon kay Dan

40 Ang ikapito nga bahin sang duta ginhatag sa mga panimalay sang tribo ni Dan.
41 Ang iya sini kasangkaron naglakip sang Sora, Estaol, Irsemes,
42 Saalabin, Ayalon, Itla,
43 Elon, Timna, Ecron,
44 Elteke, Gibeton, Baalat,
45 Hehud, Beneberak, Gatrimon,
46 Meharkon, kag Rakon, kag subong man ang kadutaan sa atubang sang Joppe.
47 Sang gin-agaw ang duta sa mga kaliwat ni Dan, gingubat nila ang Lesem kag ginsalakay ini. Naagaw nila ini kag ginpamatay ang iya mga pumoluyo. Ila dayon ini  ginpanag-iyahan kag nagpuyo sila didto. Ginbayluhan nila ang ngalan sang siyudad sang Lesem, kag ginhingalanan nila ini nga Dan, suno sa ngalan sang ila gingikanan.
48 Ini nga mga siyudad kag ang ila mga kabanwahanan yara sa duta nga nabaton sang mga panimalay sang tribo ni Dan subong ila kaugalingon.

Ang Kadutaan nga Natuon kay Josue

49 Sang pagkatapos sang mga Israelinhon pamarti sang nagkalainlain nga bahin sang duta, ginhatagan nila si Josue, nga anak nga lalaki ni Nun, sang isa ka puna nga duta subong iya kaugalingon.
50 Suno sa ginsugo sang Ginoo, ginhatag nila sa iya ang siyudad nga iya ginpangayo, ang Temnatsera sa kabakuloran sang Efraim. Iya Iiwat ginpatindog ang siyudad kag didto nagpuyo.
51 Si Eleasar nga pari, si Josue nga anak ni Nun, kag ang mga pangulo sang mga panimalay sang mga tribo sang Israel nagpamarti sini nga mga duta paagi sa pagabutgabot^h sa atubangan sang Ginoo sa Silo, sa puwertahan sang Tolda nga Tilipunan. Natapos nila ang pagpamarti sang duta.

^gsa Juda . . . Jordan; sa isa ka dumaan nga pagbadbad sa Jordan.
^hPAGABUTGABOT: Tan-awa ang 14:2.

JOSUE - Kapitulo 18 <<<   >>> JOSUE - Kapitulo 20

JOSUE - Kapitulo 18

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang Pagpartida sang Duta

1 Sa tapos maagaw sang mga Israelinhon ang duta, nagtipon sila tanan sa Silo, kag nagapatindog sang Tolda nga Tilipunan.

2 May pito pa ka mga tribo sang mga Israelinhon nga wala pa mapartihi sang duta.

3 Gani si Josue nagsiling sa mga Israelinhon, "Tubtob pa bala san-o ang inyo pagpabuyanboyan sa inyo pagsulod kag sa pagkuha sang duta nga ginhatag sa inyo sang Ginoo, ang Dios sang inyo mga katigulangan?

4 Hatagi ninyo ako sing tatlo ka tawo gikan sa tagsa ka tribo. Ipadala ko sila sa pag-usisa sang bug-os nga duta kag magahimo sila sing plano sang amo nga duta suno sa ila naluyagan nga mangin-ila kaugalingon. Sa tapos sini magbalik sila dayon sa akon.

5 Pagapartihon nila ang duta sa pito ka parti. Si Juda magapuyo sa iya kadutaan sa bagatnan kag si Jose sa iya kadutaan sa aminhan.

6 Maghimo kamo sing plano sang pito ka parti sang duta, kag dalha ini sa akon. Akon dayon ini pagabutgabotan^f sa inyo sa atubangan sang Ginoo nga aton Dios.

7 Ang mga Lebinhon indi pagpartihan sang duta subong sang sa inyo, kay ang ila parti amo ang pag-alagad subong nga mga pari sang Ginoo. Ang mga tribo nanday Gad, Ruben, kag ang katunga sang tribo ni Manases nakabaton na sang ila parti sang duta sa sidlangan sang Jordan, nga ginhatag sa ila ni Moises nga alagad sang Ginoo.”

8 Naglakat ang mga tawo sa paghimo sang plano sang duta sa tapos masingganan sila ni Josue sang masunod: "Usisaa ninyo ang bug-os nga duta kag maghimo kamo sing plano sini, kag magbalik kamo dayon sa akon. Akon dayon ini pagabutgabotan sa inyo diri sa Silo sa atubangan sang Ginoo.”

"Usisaa ninyo ang bug-os nga duta kag maghimo kamo sing plano sini." (18:8)

9 Gani gin-usisa sang mga tawo ang bug-os nga duta, kag naghimo sing plano sini sa isa ka libro. Ginpartida nila ang duta sa pito ka parti, kag ginlista ang mga banwa. Nagbalik dayon sila kay Josue sa tolda nga tilipunan sa Silo.

10 Ginpagabutgabotan sa ila ni Josue kag ginpanghatagan ang tagsa ka tribo ni Israel sang isa ka parti sang duta.

Ang Kadutaan nga Natuon kay Benjamin

11 Ang mga panimalay sang tribo ni Benjamin nakabaton sang duta nga yara sa gin-utlan sang mga tribo ni Juda kag ni Jose.

12 Sa aminhan, ang ila dulonan nagsugod sa Jordan, kag nagataklad pakadto sa kabukiran sa aminhan sang Jerico, kag padulong sa nakatundan sa mga duog sa kabakuloran tubtob sa desierto sang Betabem.

13 Ang dulonan nagapadulong pa bagatnan pakadto sa Lus, sa kabukiran sang Lus (ginatawag man Betel), dayon nagapadulhog sa Atarotadar, sa bukid sa bagatnan sang naubos nga Bethoron.

14 Karon ang dulonan nagbaylo sang iya ginapadulongan, nagliko pa bagatnan halin sa nakatundan nga bahin sini nga bukid sa nabagatnan sang Bethoron, kag nagpadayon sa siyudad sang Kiryatbaal (ukon Kiryathearim), nga iya sang tribo ni Juda. Amo ini ang dulonan sa nakatundan.

15 Ang dulonan sa nabagatnan nagsugod sa punta sang Kiryathearim, kag halin didto nagpadulong sa nakatundan pakadto sa mga Tuboran sang Neptoa.

16 Nagdulhog dayon ini pakadto sa punta sang bukid nga nagaatubang sa kapatagan sang anak ni Hinom, sa naaminhan nga punta sang kapatagan sang Repaim. Nagpadulong dayon ini sa bagatnan sa kapatagan sang Hinom, sa nabagatnan nga bukid sang mga Jebusnon, padulong sa Enrogel.

17 Nagliko dayon ini pa aminhan pakadto sa Ensemes, kag pakadto dayon sa Gelilot, nga yara sa atubang sang taklaran sang Adumin. Ang dulonan nagdulhog pakadto sa  Bato ni Bohan (si Bohan anak nga lalaki ni Ruben),

18 kag nagaagi ini sa aminhan sang bukid sang Betaraba, nagapadulhog sa Kapatagan sang Jordan.

19 Nagpadulong ini pa aminhan sang bukid sang Bethogla, kag nag-untat ini sa naaminhan nga gibwangan sa Dagat nga Patay, sa nabagatnan nga punta sang Jordan. Amo ini ang nabagatnan nga dulonan.

20 Ang Jordan amo ang dulonan sa sidlangan. Amo ini ang mga dulonan sang duta nga nabaton sang mga panimalay sang tribo ni Benjamin nga ila kaugalingon.

21 Ang mga siyudad nga iya sang mga panimalay sang tribo ni Benjamin amo ang Jerico, Bethogla, Emekkesis,

22 Betaraba, Semaraim, Betel,

23 Abim, Para, Opra,

24 Keparamoni, Opni, kag Geba: dose ka mga siyudad lakip ang ila mga banwa.

25 Yara man ang Gabaon, Rama, Beerot,

26 Mispa, Kepira, Mosa,

27 Rekem, Irpeel, Tarala,

28 Sela, Elep, Hebus (ukon Jerusalem), Gebeat kag ang Kiriathearim: katorse ka mga siyudad lakip ang ila mga kabanwahanan. Amo ini ang duta nga nabaton sang mga panimalay sang tribo ni Benjamin nga ila kaugalingon.

^fPAGABUTGABOTAN: Tan-awa ang 14:2.

JOSUE - Kapitulo 17 <<<   >>> JOSUE - Kapitulo 19

JOSUE - Kapitulo 17

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

1 Tungod kay si Manases amo ang panganay nga anak nga lalaki ni Jose, ang isa ka bahin sang duta ginpaigo sa mga tribo ni Manases. Si Makir nga amay ni Galaad, amo ang panganay nga anak nga lalaki ni Manases, kag sia isa ka soldado gani ginpaigo sa iya ang Galaad kag Basan.
2 May duta man nga ginpaigo sa nabilin nga mga panimalay ni Manases nga amo sanday Abieser, Helek, Asriel, Sikem, Heper, kag Semida. Ini sila amo ang mga kaanakan nga lalaki ni Manases nga anak ni Jose. Mga pangulo sila sang mga panimalay.
3 Si Selopehad, nga anak nga lalaki ni Heper, anak ni Galaad, anak ni Makir, anak ni Manases, wala sing mga anak nga lalaki, kundi mga babayi lamang. Sila amo sanday Mala, Noa, Hogla, Milka, kag Tirsa.
4 Nagkadto sila kay Eleasar nga Pari, kay Josue nga anak ni Nun, kag sa mga pangulo, kag nagsiling, “Ang Ginoo nagsugo kay Moises nga hatagan kami kag ang amon mga himata sang bahin sang duta nga mangin-amon kaugalingon.” Gani, suno sa ginsugo sang Ginoo, sila kag ang mga kautoran sang ila amay ginhatagan sing duta nga mangin-ila kaugalingon.
5 Gani pati ang Galaad kag Basan sa tabok sang Jordan, napulo ka bahin sang duta ang nabaton ni Manases,
6 tungod kay ang mga kaanakan ni Manases nga babayi kag subong man ang mga lalaki ginpanghatagan sing duta. Ang duta sang Galaad ginhatag sa nabilin nga mga kaliwat ni Manases.
7 Ang mga kadutaan ni Manases naglambot halin sa Aser tubtob sa Mikmetat, sa sidlangan sang Sikem. Ang dulonan nagpadulong sa bagatnan pakadto sa mga pumoluyo sang Entapua.
8 Ang duta sang Tapua iya ni Manases, pero ang banwa sang Tapua, sa dulonan, iya sang mga kaliwat ni Efraim.
9 Gani ang dulonan nagdulhog pakadto sa sapa sang Cana. Ining mga siyudad sa nabagatnan sang sapa, iya ni Efraim, bisan nga yara sila sa tunga sang mga siyudad ni Manases. Ang dulonan ni Manases nagapadayon sa aminhan nga pangpang sang sapa, kag nag-untat ini sa Dagat sang Mediteraneo.
10 Ang iya ni Efraim yara sa bagatnan, kag ang kay Manases yara sa aminhan kag ang ila dulonan amo ang Dagat sang Mediteraneo. Nagatambi sila kay Aser sa aminhan, kag kay Isakar sa bagatnan.
11 Sa kadutaan ni lsakar kag ni Aser, si Manases nagpanag-iya sang Betsean kag ang palibot nga mga banwa, ang mga pumoluyo sa Ibleam, sa Dor (ang siyudad sa baybayon), sa Endor, sa Taanak, sa Megido, kag ang mga banwa sa mga palibot nila.
12 Pero ang mga tawo ni Manases wala makasarang sa pagtabog sang mga tawo nga nagapuyo sa sadto nga mga siyudad, gani ang mga Canaanhon nagpabilin didto.
13 Bisan sang magbakod ang mga Israelinhon, wala nila matabog sing bug-os ang mga Canaanhon, pero gjnpaobra sila para sa mga Israelinhon.
14 Ang mga kaliwat ni Jose nagsiling sa kay Josue, "Ngaa bala nga isa lang ka parti sang duta ang ginhatag sa amon nga mangin-amon kaugalingon? Madamo kami, kay ang Ginoo nagpa-uswag sa amon."
15 Nagsabat si Josue, "Kon madamo gid man kamo kag ang duog sa mga bakulod sang Efraim diutay para sa inyo, kadto kamo sa mga kagulangan kag maghawan kamo sing duta para sa inyo kaugalingon, sa duta sang mga Peresnon, kag mga Repaimnon.”
16 Ang mga kaliwatan ni Jose nagsiling, "Ang mga kabakuloran diutay para sa amon, pero ang mga Canaanhon sa kapatagan may mga karuwahi, nga salsalon. Ang mga Canaanhon sa Betsean kag sa palibot nga mga banwa, may salsalon man nga mga karuwahi, kag amo man ang yara sa kapatagan sang Hesreel.”
17 Si Josue nagsiling sa mga tribo ni Efraim kag ni Manases, "Matuod, kadamo gid man sa inyo kag gamhanan gid kamo. Sobra sa isa ka bahin sang duta ang mangin-inyo.
18 Ang  mga kabakuloran mangin-inyo. Bisankagulangan ini, hawanan ninyo ini kag panag-iyahan halin sa pihak tubtob sa pihak. Kon nahanungod sa mga Canaanhon, pagatabugon ninyo sila pa gwa, bisan may mga karuwahi sila nga salsalon, kag bisan nga gamhanan sila.”

JOSUE - Kapitulo 16 <<<   >>> JOSUE - Kapitulo 18

JOSUE - Kapitulo 16

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang mga Kadutaan nga Ginhatag kay Efraim kag kay Manases

1 Ang duta nga natuon sa mga kaliwat ni Jose, naglambot halin sa Jordan malapit sa Jerico, sa sidlangan sang mga tuboran sang Jerico, pakadto sa desierto. Halin sa Jerico nagpadulong ini sa kabakuloran tubtob sa Betel.
2 Halin sa Betel nagapakadto ini sa Lus, kag nagaagi sa Atarot sa diin nagapuyo ang mga Arkinhon.
3 Kag nagapadayon ini sa nakatundan pakadto sa duog sang mga Hapletnon, tutob sa duog sang naubos nga Bethoron. Halin didto nagpadulong ini sa Geser, kag ang katapusan amo ang Dagat sang Mediteraneo.
4 Ang mga kaliwat ni Jose, nga amo ang mga tribo ni Manases kag ni Efraim, nagbaton sini nga duta subong ila kaugalingon.
5 Amo ini ang mga kadutaan sang mga panimalay sang tribo ni Efraim: ang ila dulonan sa sidlangan amo ang Atarotadar tubtob sa naibabaw nga Bethoron.
6 Halin didto naglambot ini sa Dagat sang Mediteraneo. Sa aminhan nila amo ang Mikmetat. Sa sidlangan ang dulonan nagaliko pakadto sa Taanatsilo, kag nagaagi ini sa sidlangan sang Hanoa.
7 Kag halin sa Hanoa nagapakadto ini sa Atarot kag Naarat. Naglambot ini sa Jerico kag nag-untat sa Jordan.
8 Halin sa Tapua ang dulonan nagpadulong sa nakatundan pakadto sa sapa sang Cana, kag nag-untat sa Dagat sang Mediteraneo. Amo ini ang duta nga ginhatag sa mga panimalay sang tribo ni Efraim subong ila kaugalingon,
9 lakip ang mga banwa kag mga kabaryuhanan nga ginhatag sa mga Efraimnon, nga nasakop sang dulonan ni Manases.
10 Pero wala nila pagtabuga ang mga Canaanhon nga nagpuyo sa Geser, gani ang mga Canaanhon nagpuyo upod sa mga Efraimnon tubtob sini nga adlaw, pero ginhimo sila nga mga ulipon.

JOSUE - Kapitulo 15 <<<   >>> JOSUE - Kapitulo 17

JOSUE - Kapitulo 15

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang Kadutaan nga Ginhatag kay Juda

1 Ang bahin sang duta nga ginhatag sa mga panimalay sang tribo ni Juda amo ang masunod: Ang duta naglambot halin sa bagatnan tubtob sa dulonan sang Edom, tubtob sa desierto sang Sin sa punta gid sang nabagatnan.
2 Ining dulonan sa bagatnan naglambot halin sa nabagatnan nga ukbong sang Dagat nga Patay,
3 nagapadulong pa gid sa bagatnan gikan sa Taklaran sang Akrabim, kag tubtob sa Sin. Halin sa Negeb tubtob makalambot sa Cades Barnea, nagaagi sa Hesron, kag pataklas sa Adar, nagaliko pakadto sa Karka,
4 padulong sa Asmon, kag naga-ubay sa sapa sa dulonan sang Ehipto tubtob sa Dagat sang Mediteraneo, nga amo ang punta sang dulonan. Amo yadto ang nabagatnan nga dulonan sang Juda.
5 Ang dulonan sa sidlangan amo ang Patay nga Dagat, tubtob sa gibwangan sang Jordan. Ang naaminhan nga dulonan naggikan didto,
6 pataklad tubtob sa Bethogla, kag padulong sa aminhan sang Betaraba. Kag nagapataklad ini tubtob sa Bato sang Bohan (si Bohan amo ang anak ni Ruben),
7 kag halin sa Kapatagan sang Kalalat-an tubtob sa Debir, kag pakadto sa aminhan, paliko pakadto sa Gilgal, nga yara sa atubangan sang Taklaran sang Adumin sa bagatnan nga bahin sang kapatagan. Kag nagalambot ini pakadto sa mga tuboran sang Ensemes, nagatapos sa Enrogel,
8 kag paagi sa kapatagan sang anak ni Hinom tubtob sa bagatnan nga bahin sang banglid sang mga Hebusnon, sa diin nahamtang ang Jerusalem. Gani ang dulonan naglambot tubtob sa putokputokan sang bukid nga nagaatubang sa kapatagan sang Hinom sa nakatundan, nga yara sa naaminhan nga ukbong sang kapatagan sang Repaim.
9 Kag halin sa putokputokan sang bukid pakadto sa mga Tuboran sang Neptoa, kag nagapagwa sa mga siyudad nga malapit sa Bukid sang Epron. Gikan didto nagaliko pakadto sa Baala (ukon Kiryatearim),
10 sa diin na nagaliko ini nayon sa nakatundan sang Baala pakadto sa Bukid sang Seir, padulong sa aminhan nga bahin sang Bukid sang Hearim (ukon Kesalon), padulhog sa Betsemes, kag nagaagi sa Timna.
11 Ang dulonan nagapadayon pakadto sa dulhogan sang bukid sa aminhan sang Ecron, nagliko pakadto sa Sikeron, nagaagi sa Bukid sang Baala, kag nagapadayon sa Habnel. Ang dulonan nagdulog sa Dagat sang Mediteraneo.
12 Ang dulonan sa nakatundan amo ang baybayon sang Dagat sang Mediteraneo. Amo ini ang mga dulonan nga nagapalibot sa mga tawo sang mga panimalay ni Juda.

Gin-agaw ni Caleb ang Hebron kag Debir

13 Suno sa ginsugo sang Ginoo kay Josue, ang bahin sang duta sang mga tawo sang Juda, ginhatag kay Caleb nga anak nga lalaki ni Hepone. Ini amo ang Hebron, ang siyudad sang Arba nga amay ni Anak.
14 Gintabog ni Caleb ang tatlo ka mga anak nga lalaki ni Anak, nga amo sanday Sesay, Ahiman, kag Talmay, sa sadto nga duog.
15 Gikan didto naglakat sia sa paggubat sang mga tawo nga nagapuyo sa Debir (ang siyudad nga sadto anay ginatawag Kiryatseper).
16 Nagsiling si Caleb, "Ipaasawa ko ang akon anak nga babayi nga si Aksa sa tawo nga makaagaw sang Kiryatseper."
17 Ang utod ni Caleb nga si Otniel, nga Kenisnon, nag-agaw sang siyudad. Gani ginpaasawa ni Caleb sa iya ang iya anak nga babayi nga si Aksa.
18 Sang pag-abot ni Aksa, ginpilit niya si Otniel sa pagpangayo sa iya amay sing isa ka uma. Nagkadto si Aksa kay Caleb, kag sang makapanaog sia sa iya asno, ginpamangkot sia ni Caleb kon ano ang iya luyag.
19 Nagsabat sia, "Hatagi ako sing regalo. Tungod kay ginbutang mo ako sa kadutaan sang Negeb, hatagi ako sing mga tuboran sang tubig.” Gani ginhatag ni Caleb sa iya ang mga tuboran nga naibabaw kag naubos.

Ang mga Siyudad sang Juda

20 Ang duta nga nabaton sang mga panimalay sang tribo ni Juda nga mangin-ila kaugalingon amo ang masunod:
21 ang mga siyudad sa labing nabagatnan nga natuon sa ila bahin, yadtong mga malapit sa dulonan sang Edom nga amo ang Kabseel, Eder, Hagor,
22 Kina, Dimona, Adada,
23 Kades, Hasor, Itnan,
24 Sip, Telem, Bealot,
25 Hasorhadata, Keryothesron (ukon Hasor),
26 Amam, Sema, Molada,
27 Hasargada, Hesmon, Betpelet,
28 Hasarsual, Beerseba, Besiota,
29 Baala, Iyim, Esem,
30 Eltolad, Kesil, Horma,
31 Siklag, Madmana, Sansana,
32 Lebaot, Silhim, Ayin, kag Rimon. Baynte nuwebe tanan ka mga siyudad, lakip ang mga banwa sa palibot nila.
33 Ang mga siyudad sa kapatagan amo ang mga masunod: Estaol, Sora, Asna,
34 Sonoa, Enganim, Tapua, Enam,
35 Harmut, Adulam, Soko, Aseka,
36 Saaraim, Aditaim, Gedera, Gederotaim: katorse ka mga siyudad, lakip ang mga banwa sa palibot nila.
37 Didto ang Senan, Hadasa, Migdalgad,
38 Dilan, Mispa, Hokteel,
39 Lakis, Boskat, Eglon,
40 Kabon, Laman, Kitlis,
41 Gederot, Betdagon, Naama, kag Makeda: desesayes ka mga siyudad, lakip ang mga banwa sa palibot nila.
42 Didto ang Libna, Eter, Asan,
43 Ipta, Asna, Nesib,
44 Keila, Aksib, kag Maresa: siyam ka mga siyudad, lakip ang mga banwa sa palibot nila.
45 Didto ang Ecron lakip ang iya mga banwa kag mga baryo,
46 kag ang tanan nga mga siyudad kag mga banwa nga malapit sa Asdod, halin sa Ecron pakadto sa dagat.
47 Didto ang Asdod kag Gasa, lakip ang ila mga banwa kag mga baryo, nga nagalambot sa sapa sa dulonan sang Ehipto kag sa baybayon sang Dagat sang Mediteraneo.
48 Sa mga kabakuloran didto ang Samir, Hatir, Soko,
49 Dana, Kiryatsana (ukon Debir),
50 Anab, Estemo, Anim,
51 Gosen, Holon, kag Gilo: onse ka mga siyudad, lakip ang mga banwa sa palibot nila.
52 Didto ang Arab, Duma, Esan,
53 Hanim, Bettapua, Apeka,
54 Humta, kag Kiryatarba (ukon Hebron), kag Sior: siyam ka mga siyudad, lakip ang mga banwa sa palibot nila.
55 Didto ang Maon, Karmelo, Sip, Huta,
56 Hesrel, Hokdeam, Sanoa,
57 Kain, Gabaa, kag Timna: napulo ka mga siyudad, lakip ang mga banwa sa palibot nila.
58 Didto ang Halhul, ang Betsur, ang Gedor,
59 ang Maarat, ang Betanot, kag Eltekon: anom ka mga siyudad, lakip ang mga banwa sa palibot nila.
60 Didto ang Kiryatbaal (ukon Kiryathearim) kag ang Raba: duha ka mga siyudad, kag ang mga banwa sa palibot nila.
61 Sa desierto didto ang Betaraba, Midin, Sekaka,
62 Nibsan, ang "Siyudad sang Asin," kag Engedi: anom ka mga siyudad, lakip ang mga banwa sa palibot nila.
63 Pero ang mga tawo sang Juda wala makasarang sa pagtabog pa gwa sang mga Hebusnon, nga nagpuyo sa Jerusalem. Sa gihapon ang mga Hebusnon nagapuyo sa Jerusalem upod sang mga tawo ni Juda.

JOSUE - Kapitulo 14 <<<   >>> JOSUE - Kapitulo 16

JOSUE - Kapitulo 14

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ginpartida ang Canaan Paagi sa Pagabutgabot

1 Amo ini ang kadutaan sa Canaan nga nabaton sang mga Israelinhon. Si Eleasar nga pari, si Josue nga anak ni Nun, kag ang mga pangulo sang panimalay sang mga tribo sang Israel nagpamartida sini sa mga tawo.
2 Suno sa ginsugo sang Ginoo kay Moises, ang kadutaan sang siyam kag tunga ka mga tribo ginpamartida sa ila paagi sa pagabutgabot.^e
3 Ginhatag ni Moises ang bahin sang duta sa duha kag tunga nga mga tribo sa sidlangan sang Jordan, pero wala niya ginhatagi sing duta ang mga Lebinhon.
4 Ang mga kaliwat ni Jose ginparti sa duha ka tribo, ang kay Manases kag kay Efraim. Ang mga Lebinhon wala sing may nabaton nga bahin sang duta, luas lamang sang mga siyudad nga pagapuy-an nila, kag ang mga halalban para sa ila mga kahayupan.
5 Ginpamartida sang mga Israelinhon ang duta suno sa ginsugo sang Ginoo kay Moises.

Ginhatag kay Caleb ang Hebron

6 Ang mga tawo sang tribo ni Juda nagkadto kay Josue sa Gilgal. Si Caleb nga anak ni Hepone nga Kenisnon nagsiling kay Josue, "Nahibal-an mo ang ginsiling sang Ginoo kay Moises nga tawo sang Dios didto sa Kadesbarnea nahanungod sa imo kag sa akon.
7 Kuwarenta ka tuig ang akon edad sang si Moises nga alagad sang GINOO, nagpadala sa akon halin sa Kadesbarnea sa pagpang-usisa sang duta. Kag sang makabalik ako, ginsugiran ko sia sang matuod nga nakita ko.
8 Pero ang panugid sang mga tawo nga nag-upod sa akon nagpahadlok sa mga Israelinhon, wala sapayan, gintuman ko sing matutom ang GINOO nga akon Dios.
9 Gani si Moises nagsiling sa akon, 'Tungod ky nagmatutom ka sa pagsunod sa Ginoo nga akon Dios, ikaw kag ang imo mga kaanakan magabaton sang duta nga inyo ginkadtuan nga mangin-inyo kaugalingon.’"
10 Nagsiling pa gid si Caleb, “Kag karon, dumdoma lang bala nga 45 na ka tuig ang nagligad halin sang pagsiling sini sang Ginoo sa kay Moises. Nagapanglakaton pa sadto ang mga Israelinhon sa desierto, kag ginbuhi pa ako sang Ginoo tubtob karon. Dumdoma lang bala! Otsentay singko ka tuig ang akon edad,
11 kag ang kabakod ko karon, pareho gihapon sadtong adlaw sang pagpadala ni Moises sa akon. Sarang pa ako makaentra sa inaway kag masarangan ko pa ang bisan ano nga hilimuon.
12 Gani karon, ihatag sa akon inig duog sang mga kabakuloran nga ginsiling sang Ginoo sa akon sadto nga adlaw sang ang akon mga tawo kag ako nagsugid sang amon nakita. Ginsugiran namon kamo sadto anay nga ang mga higante nga mga Anakimnon yadto didto nga nagapuyo sa dalagku nga mga siyudad nga nalibutan sang mga pader. Ayhan ang Ginoo magaupod sa akon, kag pagatabugon ko sila suno sa ginsiling sang Ginoo.
13 Ginbendisyunan ni Josue si Caleb nga anak ni Hepone, kag ginhatag sa iya ang Hebron nga mangin-iya kaugalingon.
14 Ang Hebron ginapanag-iyahan pa gihapon sang mga kaliwat ni Caleb nga anak ni Hepone nga Kenisnon, kay gintuman niya sing matutom ang GlNOO nga Dios sang Israel.
15 Sadto anay ang ngalan sang Hebron amo ang Kiryatarba (si Arba amo ang pinakadaku sa mga Anakimnon). Karon may paghidait na sa duta.

^ePAGABUTGABOT: Masunson ginahimo ini nga ginagamitan sang namarkahan nga mga bato sa paghibalo sang kabubot-on sang Dios.

JOSUE - Kapitulo 13 <<<   >>> JOSUE - Kapitulo 15

JOSUE - Kapitulo 13

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang Duta nga Pagaagawon pa

1 Karon tigulang na gid si Josue. Ang Ginoo nagsiling sa iya, "Tigulang na gid ikaw, pero madamo pa ang mga duta nga kinahanglan agawon.
2 Amo pa ini ang mga nabilin: ang tanan nga kadutaan sang mga Filistinhon, kag ang tanan nga kadutaan sang mga Gesurnon
3 (ang duta halin sa sapa sang Sihor, sa dulonan sang Ehipto, tubtob sa aminhan sa dulonan sang Ecron, nga ginakabig nga iya sang mga Canaanhon, ang mga pangulo sang mga Filistinhon nagpuyo sa Gasa, Asdod, Askalon, Gat, kag Ecron), kag subong man sang mga kadutaan sang mga Abimnon,
4 sa bagatnan, ang tanan nga kadutaan sang mga Canaanhon, kag Meara (nga iya sang mga Sidonhon), halin sa Apek, tubtob sa dulonan sang mga Amornon.
5 Ang duta sang mga Gebalnon, ang bug-os nga Libano sa sidlangan, halin sa Baalgad sa kunsaran sang Bukid sang Hermon, tubtob sa salamputan sang Hamat.
6 Ini nagalakip sang tanan nga mga Sidonhon nga nagapuyo sa mga kabakuloran sa gin-utlan sang mga Bukid sang Libano kag Misrepotmaim. Pagatabugon ko sila pa gwa samtang nagaabanse ang mga Israelinhon. Pamartidahon mo ang duta para sa mga Israelinhon nga mangin-ila kaugalingon, subong sang ginsugo ko nga himuon mo.
7 Gani karon, partidaha ini nga duta sa siyam ka mga tribo kag sa katunga nga tribo ni Manases, nga mangin-ila kaugalingon.”

Ang Duta nga Ginhatag kay Manases, Ruben, kag Gad

8 Ang mga tribo ni Ruben kag Gad, kag ang katunga nga tribo ni Manases nakabaton sang ila bahin sang duta sa sidlangan nga bahin sang Jordan. Amo ini ang ginhatag sa ila ni Moises nga alagad sang Ginoo.
9 Ang ila duta naglambot halin sa Aroer (sa higad sang Kapatagan sang Arnon) kag ang siyudad sa tunga sang kapatagan, kag ang bug-os nga kapatagan sang Medeba tubtob sa Dibon.
10 Ini naglakip sang tanan nga mga siyudad nga ginagamhan ni Sihon nga hari sang mga Amornon (nga naggahom sang Hesbon), tubtob sa dulonan sang mga Amonhon.
11 Naglakip ini sang Galaad kag ang mga duta nga ginpuy-an sang mga Gesurnon kag mga Maakatnon, ang bug-os nga Bukid sang Hermon, kag ang bug-os nga Basan tubtob sa Salka,
12 lakip ang ginharian ni Og, nga naggahom sa Astarot kag Edrie (si Og na lang ang nabilin sang mga Repaimnon). Ginlutos ni Moises ini nga mga tawo, kag gintabog sila pa gwa.
13 Pero wala gintabog sang mga Israelinhon pa gwa ang mga Gesurnon kag ang mga Maakatnon. Ini nga mga tawo nagapuyo gihapon sa Israel.
14 Pero si Moises wala maghatag sing duta sa tribo ni Lebi. Ang ila pagabatunon subong ila bahin amo ang mga halad nga sinunog sa Ginoo, suno sa ginsiling sang Ginoo kay Moises.
15 Ginhatag ni Moises ang bahin sang duta sa mga panimalay sang tribo ni Ruben nga mangin-ila kaugalingon nga pagkabutang.
16 Ang ila duta naglambot halin sa Aroer (sa higad sang Kapatagan sang Arnon) kag ang siyudad sa tunga sang kapatagan, kag ang bug-os nga kapatagan sa palibot sang Medeba,
17 kag naglakip sang Hesbon kag ang tanan nga mga siyudad sa kapatagan: ang Dibon, Bamotbaal, Betbaalmeon,
18 Hahas, Kedemot, Mepaat,
19 Kiryataim, Sibma, Seretsahar, sa bakulod sang kapatagan,
20 Betpeor, ang mga dulhogan sang bukid sang Pisga, Bethesimot,
21 kag ang iban nga mga siyudad sang kapatagan, ang tanan nga mga siyudad ni Sihon, nga hari sang mga Amornon nga naggahom sa Hesbon. Ginlutos sia ni Moises kag subong man ang mga pangulo sang Midian nga amo sanday Ebi, Rekem, Sur, Hur, kag Reba. Ini sila tanan nagpuyo sa duta, kag nagdumala sa idalom ni Sihon.
22 Ang isa sang mga tawo nga ginpatay sang mga Israelinhon amo si Balaam, nga manugpakot, nga anak nga Ialaki ni Beor.
23 Ang Jordan amo ang dulonan sang tribo ni Ruben. Amo ini ang mga siyudad kag mga banwa nga ginhatag sa mga panimalay sang tribo ni Ruben nga mangin-ila kaugalingon.
24 Ginhatag man ni Moises ang bahin sang duta sa mga panimalay sang tribo ni Gad nga mangin-ila kaugalingon.
25 Ang ila kadutaan naglakip sang Haser kag sang tanan nga mga siyudad sang Galaad, ang katunga sang duta sang mga Amonhon tubtob sa Aroer, nga yara sa sidlangan sang Raba.
26 Naglambot ini halin sa Hesbon tubtob sa Ramatmispe kag Betonim, halin sa Mahanaim tubtob sa dulonan sang Lodebar,
27 kag sa Kapatagan sang Jordan nagalakip ini sang Betharam, Betnimra, Sukot kag Sapon, ang nabilin sang ginharian ni Sihon nga hari sang Hesbon. Ang dulonan amo ang Suba sang Jordan tubtob sa aminhan sa Linaw sang Galilea, kag ang kadutaan nga nagalambot sa sidlangan.
28 Amo ini ang mga siyudad kag mga banwa nga ginhatag sa mga panimalay sang tribo ni Gad nga mangin-ila kaugalingon.
29 Ginhatag ni Moises ang bahin sang duta sa mga panimalay sang katunga nga tribo ni Manases nga mangin-ila kaugalingon nga pagkabutang.
30 Ang ila kadutaan naglambot halin sa Mahanaim, lakip ang bug-os nga Basan, ang bug-os nga ginharian ni Og, nga hari sang Basan, kag ang tanan nga 60 ka mga banwa sang Hair nga yara sa Basan.
31 Naglakip ini sang katunga sang Galaad, subong man sang Astarot kag Edrei, ang mga siyudad sang ginharian ni Og sa Basan. Ginpanghatag ini sa mga panimalay sang katunga sang mga kaliwat ni Makir, nga anak nga lalaki ni Manases.
32 Amo ini ang pagpamartida ni Moises sang duta sa kapatagan sang Moab, sa sidlangan sang Jerico kag Jordan.
33 Pero si Moises wala maghatag sing duta sa tribo ni Lebi nga mangin-ila kaugalingon. Ginsingganan sila ni Moises nga ang GINOONG Dios sang Israel amo ang ila panublion.

JOSUE - Kapitulo 12 <<<   >>> JOSUE - Kapitulo 14

JOSUE - Kapitulo 12

1 2 3 4 5 6 7 8 9 10 11 12 13 14 15 16 17 18 19 20 21 22 23 24 

♡♡♡♡♡

Ang mga Hari nga Ginpanglutos ni Moises

1 Ang mga tawo sang Israel naglutos kag nagpanag-iya sang duta sa sidlangan sang Jordan, halin sa Kapatagan sang Arnon tubtob sa Kapatagan sang Jordan tubtob sa Bukid sang Hermon. Amo ini sila nga mga hari ang ginpanglutos sang mga Israelinhon:

2 Si Sihon, nga hari sang mga Amornon nga nagpuyo sa Hesbon. Ang sakop sang iya ginharian amo ang halin sa Aroer sa higad sang Kapatagan sang Arnon, kag kutob sa tunga sang kapatagan sa Suba sang Habok, ang dulonan sang mga Amonhon (ini tanan mga katunga sang Galaad),

3 kag sa sidlangan sang Kapatagan sang Jordan, halin sa Linaw sang Galilea pakadto sa Bethesimot, sa sidlangan sang Patay nga Dagat tubtob sa nabagatnan sa kunsaran sang Bukid sang Pisga.

4 Ginlutos man nila si Og, ang hari sang Basan, nga isa sang mga nabilin nga mga Repaimnon. Nagpuyo sia sa Astarot kag sa Edrei.

5 Ang iya ginharian naglakip sang Bukid sang Hermon, Salka, kag ang bilog nga Basan tubtob sa dulonan sang Gesurnon kag sang mga Maakatnon, kag ang katunga sang Galaad, tubtob sa dulonan ni Sihon nga hari sang Hesbon.

6 Si Moises kag ang mga tawo sang Israel naglutos sa ila. Ginhatag ni Moises nga alagad sang Ginoo, ang ila duta sa mga tribo ni Ruben, Gad, kag sa katunga sang tribo ni Manases nga mangin-ila pagkabutang.

Ang mga Hari nga Ginpanglutos ni Josue

7 Si Josue kag ang mga tawo sang Israel mglutos sang tanan nga mga hari sa nakatundan sang Jordan, halin sa Baalgad sa kapatagan sang Libano tubtob sa Bukid sang Halak nga pakadto sa Seir. Ginpamartida ni Josue ini nga duta sa mga tribo kag ginhatag ini sa ila subong ila kaugalingon nga pagkabutang.

8 Naglakip ini sang mga kabakuloran, sang mga kapatagan, sang Kapatagan sang Jordan, sang kunsaran sang mga bakulod, sang desierto, kag ang Negeb. Ini nga duta ginpuy-an anay sang mga Hethanon, mga Amornon, mga Canaanhon, mga Peresnon, mga Hebhanon, kag mga Hebusnon.

9 Amo ini ang mga hari nga ginpanglutos: ang mga hari sang Jerico, Ay (malapit sa Betel),

10 Jerusalem, Hebron,

11 Harmut, Lakis,

12 Eglon, Geser,

13 Debir, Geder,

14 Horma, Arad,

15 Libna, Adulam,

16 Makeda, Betel,

17 Tapua, Heper,

18 Apek, Lasaron,

19 Madon, Hasor,

20 Simronmeron, Aksap,

21 Taanak, Meguido,

22 Kades, Hokneam (sa Karmelo),

23 Dor (sa baybayon), Goim, (sa Gilgal^d),

24 kag Tirsa, mga 31 tanan ka mga hari.

^dGILGAL: sa iban nga dumaan nga pagbadbad Galilea. 

JOSUE - Kapitulo 11 <<<   >>> JOSUE - Kapitulo 13