♡♡♡♡♡
Si Josue Nagpadala sang mga Espiya sa Jerico
1 Karon si Josue nagpadala sing duha ka espiya sa tago lang halin sa kampamento sang Sitim, kag ginsingganan sila, "Kadtoi ninyo kag tan-awa ang duta, kag ang siyudad sang Jerico." Gani naglakat sila, kag nakaabot sa balay sang isa ka malain nga babayi nga nagabaligya sang iya dungog nga ginahingalanan kay Rahab, kag didto sila nagdayon.2 Ang hari sang Jerico nakabati sang balita nga may mga Israelinhon nga nag-abot sadto nga gab-i sa pagpang-espiya sa pungsod!
3 Dayon ang hari nagpadala sing isa ka mando sa kay Rahab nga nagasiling, "Ang mga tawo nga nagadayon sa imo balay nagkari sa pagpang-espiya sa bug-os nga pungsod! Pagwaa sila!"
4 Pero gindala sang babayi ang duha ka tawo kaggintago niya sila. Gani nagsabat sia, “May mga tawo nga nagkari sa akon balay, pero wala ko mahibal-i kon taga-diin sila.
5 Naghalin sila sang madulom na, kag inugsira na sang puwerta sang siyudad. Wala ako mag-usisa kon diin sila makadto, pero kon sundon ninyo sila gilayon, malambot ninyo sila."
6 (Gindala niya ang mga espiya sa atop, kag gintago sila sa idalom sang mga kahoy sang lino nga iya nahantal didto.)
7 Sang makahalin ang mga tinawo sang hari sa banwa, ang puwerta ginsirahan. Naglakat sila sa pagpangita sang mga espiya tubtob nakalambot sila sa talabukan sang Jordan.
8 Sang wala pa makahigda ang mga tawo, si Rahab nagsaka sa atop
9 kag nagsiling sa ila, "Nakahibalo ako nga ang Ginoo naghatag sa inyo sang duta, kag ginaako ko nga nahadlok kami tanan sa inyo.
10 Nakabati kami kon paano ginpamala sang Ginoo ang Dagat nga Mapula sa atubangan ninyo sang paggwa ninyo sa Ehipto. Nakabati kami kon paano ang pagpatay ninyo sang duha ka hari sang mga Amornon nga amo sanday Sihon kag Og, kag ang ila mga hangaway didto sa sidlangan sang Jordan.
11 Sang pagkabati namon sini hinadlukan dayon kami. Ang tagsatagsa nadulaan sing kaisog tungod sa inyo. Ang inyo Dios, ang Ginoo, amo ang Dios sa langit kag sa duta.
12 Karon magsumpa kamo sa GINOO nga tumanon ninyo ang inyo saad kag tatapon ninyo ang akon panimalay, subong nga gintatap ko man kamo, kag hatagi ninyo ako sing mga pagpamatuod sini.
13 Luwasa ninyo ang akon amay, iloy, mga utod nga lalaki kag babayi, kag tanan nila nga mga panimalay! Indi pagtugoti nga pamatyon kami!"
14 Ang mga tawo nagsiling kay Rahab, "Handa kami sa pagpanginmatay para sa inyo! Kon indi mo pag-ipanugid ang amon ginpanghimo, tumanon gid namon ang amon saad sa imo, kon mahatag na sang Ginoo ang duta sa amon.”
15 Nagapuyo si Rahab sa balay nga yara sa kilid sang pader sang siyudad, gani gintunton niya sa kalat paagi sa bintana ang mga tawo.
16 Nagsiling sia sa ila, “Kadto kamo sa mga bakulod, basi kon makita kamo sang mga tinawo sang hari. Panago kamo sing tatlo ka adlaw tubtob makabalik sila. Pagkatapos sina, makapadayon na kamo sa inyo dalanon."
17 Ang mga tawo nagsiling sa iya, "Tumanon namon ining saad nga ginpasumpa mo sa amon.
18 Tandai ini. Kon gubaton namon ang inyo duta, ihigot ining mapula nga kalat sa imo bintana sa diin gintunton mo kami paidalom. Tipuna sing tingob sa imo balay ang imo amay, iloy, mga utod nga lalaki, kag ang tanan nga panimalay sang imo amay.
19 Kon may isa nga maggwa sa imo balay pakadto sa dalan, wala kami sing sala sang iya kamatayon, kag wala kami sing salabton. Kon may isa sa sulod sang balay upod sa imo nga mahalitan, mangin-amon ina salabton.
20 Pero kon ipanugid mo ang amon ginpanghimo, nian indi kami dapat magtuman sang amon saad."
21 Kag nagsabat sia, "Sigi, sugot ako." Dayon ginpalakat niya sila, kag naghalin sila. Ginhigot niya ang kalat nga mapula sa bintana.
22 Gani nagkadto sila sa mga bakulod kag nagpanago, samtang ang mga tinawo sang hari nagpangita sa ila sa tanan nga mga alagyan sa sulod sang tatlo ka adlaw. Wala sila sing may nakita bisan isa, gani nagbalik sila sa Jerico.
23 Dayon ang duha ka espiya nagdulhog halin sa mga bakulod nagtabok sa suba, nagbalik pakadto kay Josue, kag nagsugid sa iya sang tanan nga nahanabo.
24 Nagsiling sila sa iya, “Napat-od gid namon nga ang Ginoo naghatag sa aton sang bug-os nga duta. Ang tanan nga mga tawo didto nahadlok sa aton.”
JOSUE - Kapitulo 1 <<< >>> JOSUE - Kapitulo 3
No comments:
Post a Comment