♤♤♤♤♤
1 "Kon makita mo ang baka ukon karnero nga nakabuhi nga iya sang imo kapareho nga Israelinhon, indi pagpabay-i ini, kundi dalha ini pabalik sa iya.
2 Pero kon malayo ang ginapuy-an sang tag-iya sini ukon wala ka makahibalo kon sin-o ang tag-iya dalha ini sa inyo. Kon pangitaon ini sang tag-iya, iuli ini sa iya.
3 Amo man ang imo himuon kon makakita ikaw sing asno, bayu, ukon bisan ano nga butang nga nadula sang imo kapareho nga Israelinhon.
4 "Kon ang asno ukon baka sang imo kapareho nga Israelinhon naglup-og sa dalan, indi ini pagpabay-i, kundi buligi ini nga makatindog liwat.
5 "Ang mga babayi indi magbayu sang bayu sang mga lalaki, kag ang mga lalaki indi magbayu sang bayu sang mga babayi, kay ang Ginoo nga imo Dios nagakaakig sa mga tawo nga nagahimo sini.
6 "Kon makita mo ang isa ka pugad sa kahoy ukon sa duta nga ang inang nagaluob sa iya mga itlog ukon sa iya mga buto, indi mo pagdakpon ang inang.
7 Sarang mo makuha ang iya mga buto, pero kinahanglan buy-an mo ang inang, agod magkabuhi ka sing malawig kag mainuswagon.
8 "Kon magpatindog ka sing balay, indi ka magkalipat sa pagbutang sing barandilya sa iya atop. Dayon wala ka sing salabton kon may mahulog kag mapatay.
9 “Indi ka magtanom sang iban nga tanom sa imo talamnan sang ubas. Kon himuon mo ini, ginadilian ka sa paggamit sang ubas ukon sang patubas sang tanom nga upod sa ubas.
10 "Indi mo pag-ipares ang baka kag asno sa pag-arado.
11 "Indi ka magsuksok sang bayu nga nahabol sa delana kag lino nga manipis.
12 "Butangan mo sing lasulaso ang apat ka pamusod sang imo mga bayu.
Ang mga Kasugoan Nahanungod sa Pagkaputli
13 "Kon may isa ka tawo nga magpangasawa sing isa ka dalaga, kag sa tapos sia makapakighilawas sa iya, linas-ayan sia sa iya,
14 gani ginbutangbotangan niya sia nga indi na sia ulay sang pagpangasawa niya sa iya.
15 "Kon ini matabo, ang ginikanan sang babayi magakuha sing hapin sa higdaan sang gab-i sang ila kasal sa pagpamatuod nga ang babayi ulay, kag ipakita sa korte sa atubangan sang mga pangulo sang banwa.
16 Ang amay sang babayi magasiling sa ila, ‘Ginpaasawa ko ang akon bata nga babayi sa sini nga tawo kag karon wala na sia sing luyag sa iya.
17 Ginbutangbotangan niya sia nga nagasiling nga sia indi na ulay sang pagpangasawa niya sa iya. Pero yari ang pagpamatuod nga ang akon anak isa ka ulay; tan-awa ang hapin sa higdaan sang gab-i nga ginkasal sila!'
18 Dayon ang mga pangulo sang banwa magadakop sang bana kag hanuton nila sia.
19 Multahan nila sia sing 100 ka bilog nga pilak kag ihatag ang kuwarta sa amay sang babayi kay iya ginpakahuy-an ang isa ka Israelinhon nga babayi. Kag magapadayon ang ila pag-asawahay kag indi sia makabulag sa babayi samtang nagakabuhi sia.
20 "Pero kon ang ipanumbongon matuod, kag indi mapamatud-an nga ang babayi ulay,
21 dayon dalhon nila sia sa atubangan sang balay sang iya amay, sa diin ang mga lalaki sang iya siyudad magabato sa iya tubtob mapatay. Naghimo sia sang isa ka makahuloya nga butang sa aton mga tawo paagi sa pagpakighilawas samtang wala pa sia makasal sang yara pa sia sa balay sang iya amay. Sa sini nga paagi makuha ninyo ini nga kalautan.
22 "Kon may tawo nga madakpan nga nagapakighilawas sa isa ka babayi nga may bana, sila nga duha pagapatyon. Sa sini nga paagi makuha ini nga kalautan.
23 "Kon ang isa ka tawo madakpan sa banwa nga nagapakighilawas sa isa ka babayi nga kalasalon,
24 sila nga duha dalhon sa gwa sang banwa kag batuhon tubtob mapatay. Ang babayi pagapatyon kay wala sia magsinggit sa pagpangayo sang tabang, bisan yara sia sa banwa sa diin may makabati sa iya. Kag ang lalaki pagapatyon tungod kay nagpakighilawas sia sa babayi nga kalasalon sa iya kapareho nga Israelinhon. Sa sini nga paagi makuha ini nga kalautan.
25 "Kon ang isa ka tawo makasugata sa uma sang isa ka babayi nga kalasalon kag ginlugos niya sia, pagapatyon ang lalaki,
26 kag indi pagsilutan ang babayi tungod kay wala sia makahimo sang sala nga takos sang kamatayon. Ini nga kaso pareho sang isa ka tawo nga nagbangga sang tawo kag ginpatay.
27 Ang tawo naglugos sa babayi nga kalasalon didto sa uma, kag bisan nagsinggit sia sa pagpangayo sing tabang, wala sing may nagbulig sa iya.
28 "Kon ang isa ka tawo madakpan nga nagalugos sa isa ka babayi nga wala sing nobyo,
29 dapat sia magbayad sa amay sang babayi sang 50 ka bilog nga pilak kag ang babayi mangin-iya asawa, kay ginpilit niya sia sa pagpakighilawas sa iya. Indi niya sia mabulagan tubtob buhi sia.
30 "Wala sing tawo nga magpakahuya sa iya amay paagi sa pagpakighilawas sa bisan sin-o nga asawa sang iya amay.
No comments:
Post a Comment