NUMEROS - Kapitulo 12

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36

□□□□□

Si Miriam Ginsilotan

1 Si Moises nagpangasawa sang isa ka babayi nga taga-Eteopia,^f kag si Miriam kag si Aaron naakig kay Moises tungod sini.

2 Nagsiling sila, "Paagi^g lang bala sa kay Moises naghambal ang GINOO? Wala man bala sia maghambal paagi sa aton?" Nabatian sang Ginoo ang ila ginsiling.

3 (Si Moises labing mapainuboson nga tawo sa duta.)

4 Sa hinali ang Ginoo nagsiling kanday Moises, Aaron, kag Miriam, "Luyag ko nga maggwa kamo nga tatlo pakadto sa Tolda nga Tilipunan." Nagkadto sila,

5 kag ang Ginoo nag-abot sa isa ka haligi nga panganod, nga nagtindog sa puwertahan sang Tolda kag nagtawag "Aaron! Miriam!" Sila nga duha nagkadto sa una,

6 kag ang Ginoo nagsiling, "Karon magpamati kamo sang akon isiling! Kon may mga propeta sa tunga ninyo,^h ginapahayag ko ang akon kaugalingon sa ila sa mga palanan-awon kag nagahambal ako paagi sa mga damgo.

7 Lain gid kon maghambal ako sa kay Moises nga akon alagad; Ginhimo ko sia nga pangulo sang tanan ko nga mga tawo nga Israel.ⁱ

8 Gani nagahambal ako sa iya nga nagaatubangay gid kami, sa maathag kag indi paagi sa mga paktakon; nakita gani niya ang akon dagway! Ngaa bala nagpangahas kamo sa paghambal batok sa akon alagad nga si Moises?"

9 Ang Ginoo naakig sa ila; sa iya paghalin

10 kag paghalin sang panganod sa Tolda, ang panit ni Miriam sa hinali lang naputos sang makalalaton nga balatian kag nagputi gid kaayo. Sang pagtan-aw ni Aaron sa iya kag nakita niya nga naputos sia sing balatian,

11 nagsiling sia kay Moises, "Kon mahimo, Sir, indi kami pagpaantusa tungod sang silot sa amon binuang nga sala.

12 Indi sia paghimoa nga daw natawo nga patay nga ang katunga sang iya unod naupod.”

13 Gani si Moises nagpanawag sa GINOO, "O Dios, ayoha sia!"

14 Ang Ginoo nagsabat, "Abi kon ang iya amay magdupla sa iya guya magaantos sia sing kahuloy-an sa sulod sang pito ka adlaw. Gani pagwaa sia sa kampamento sa sulod sang isa ka semana, kag pagkatapos sini pabalika sia."

15 Si Miriam ginpagwa sa kampamento sa sulod sang isa ka semana, kag ang mga tawo wala maglakat tubtob nga ginpabalik si Miriam.

16 Dayon naghalin sila sa Hazerot naghimo sila sang kampamento sa desierto sang Paran. 

^ftaga-Eteopia; ukon Cushanon; ukon Midianhon.
^gpaagi; ukon sa.
^hSa iban nga dumaan nga mga pagbadbad kon . . . ninyo; sa Hebreo indi maathag.
ⁱGinhimo ko sia  . . . Israel; ukon sarang sia masaligan sang tanan ko nga mga bulohaton.

NUMEROS - Kapitulo 11 <<<   >>> NUMEROS - Kapitulo 13