□□□□□
Ang mga Tawo Nagreklamo
1 Sa bug-os nga gab-i ang mga tawo naghinibi sa kakulba.
2 Nagreklamo sila batok kay Moises kag kay Aaron, kag nagsiling, "Maayo pa kontani nga nagkalamatay kita sa Egipto, ukon diri na lang sa desierto!
3 Ngaa bala nga dalhon kita sang Ginoo sa sadto nga duta? Magakalamatay kita sa inaway, kag ang aton mga asawa kag mga kabataan pagabihagon. Maayo pa nga magbalik kita sa Egipto."
4 Gani, nagsiling sila sa isa kag isa, "Magpili kita sing isa ka pangulo kag magbalik sa Egipto!"
5 Dayon si Moises kag si Aaron nagluhod nga ang ila mga guya nagaduot sa duta sa atubangan sang tanan nga mga tawo.
6 Kag si Josue nga anak ni Nun kag si Caleb nga anak ni Jefone, duha sang mga espiya, naggisi sang ila mga bayo sa kasubo
7 kag nagsiling sa mga tawo, "Ang duta nga amon gin-usisa maayo gid nga duta.
8 Kon ang Ginoo nalipay sa aton, dalhon niya kita didto kag ihatag niya sa aton inang maayo kag mapatubason nga duta.
9 Indi kamo magbato sa Ginoo kag indi kamo magkahadlok sa mga tawo nga nagapuyo didto. Madaog naton sila sa Iabing madali. Ang GINOO nagaupod sa aton kag naglutos sang mga dios nga nag-apin sa ila; gani indi kamo magkahadlok."
10 Batohon kontani sila sang bug-os nga katilingban tubtob mapatay, pero sa hinali lamang nakita sang mga tawo ang masilaw nga kapawa nga nagapakita sang presensya sang Ginoo sa ibabaw sang Tolda nga Tilipunan.
Si Moises Nagpangamuyo para sa mga Tawo
11 Ang Ginoo nagsiling kay Moises, "Tubtob san-o pa bala ang pagsikway sining mga tawo sa akon? Tubtob san-o pa bala ang ila indi pagsalig sa akon, wala sapayan sang madamo nga mga milagro nga akon ginhimo sa tunga nila?
12 Magapadala ako sing mga pamalatian, kag laglagon ko sila, pero himuon ko ikaw nga amay sang isa ka pungsod nga daku pa kag labi ka gamhanan sang sa ila!"
13 Pero si Moises nagsiling sa Ginoo, "Ginpagwa mo ini nga mga tawo sa Egipto paagi sa imo gahom. Kon mabatian sang mga Egiptohanon ang imo ginhimo sa imo mga tawo,
14 isugid nila ini sa mga tawo nga nagapuyo sa sini nga duta. Ini nga mga tawo nakabati na nga ikaw, O Ginoo, nagaupod sa amon, nga ikaw makita sang mga mata kon ang imo panganod magdulog sa ibabaw namon, kag nga ikaw nagauna sa amon sa isa ka haligi nga panganod kon adlaw kag isa ka haligi nga kalayo kon gab-i.
15 Karon kon pamatyon mo ang tanan mo nga mga tawo, ang mga kapungsoran nga nakabati sang imo pagkabantog magasiling
16 nga ginpamatay mo ang imo mga tawo sa desierto, tungod kay indi ka makasarang sa pagdala sa ila sa duta nga imo ginsaad nga ihatag sa ila.
17 Gani karon, O Ginoo, nagapangamuyo ako, ipakita sa amon ang imo gahom kag tumana ang imo saad sang imo pagsiling,
18 ‘Ako ang Ginoo, indi madali mangakig, kag nagapakita ako sang daku nga gugma kag katutom kag nagapatawad sang sala kag paglalis. Pero ginasilotan ko ang mga kabataan kag mga kaapohan, tubtob sa ikatlo kag ikap-at nga kaliwatan, tungod sang mga sala sang ila mga ginikanan.'
19 Kag karon, O Ginoo, nagapangamuyo ako, patawara ang sala sini nga mga tawo, suno sa kadaku sang imo wala nagabaylo nga paghigugma, subong sang imo pagpatawad sa ila halin pa sang ila paggwa sa Egipto."
20 Ang Ginoo nagsabat, "Patawaron ko sila suno sa imo ginapangayo.
21 Pero nagasaad ako nga subong nga ako nagakabuhi kag subong nga ang akon presensya nagatugob sa bug-os nga duta,
22 wala sing isa sini nga mga tawo nga makasulod sa sina nga duta. Nakita nila ang masilaw nga kapawa sang akon presensya kag ang mga milagro nga akon ginhimo sa Egipto kag sa desierto, pero gintilawan nila ang akon pagpailob sa liwat kag wala sila magtuman sa akon.
23 Indi gid sila makasulod sa duta nga akon ginsaad sa ila mga katigulangan. Wala sing isa sadtong mga nagsikway sa akon nga makasulod sa sini nga duta.
24 Pero tungod kay ang akon alagad nga si Caleb may tuhay nga pagsalig kag nagpadayon sa pagkatutom sa akon, dalhon ko sia sa duta nga iya gin-usisa, kag ang iya mga kaliwat magapanag-iya sang duta
25 nga sa mga kapatagan sini nagapuyo ang mga Amaleknon kag ang mga Canaanhon. Baik kamo buas kag magkadto sa desierto pakadto sa dagat sang Aqaba.”
Ginsilotan sang Ginoo ang mga Tawo tungod sang Ila Pagreklamo
26 Ang Ginoo nagsiling kay Moises kag kay Aaron,
27 "Tubtob san-o pa bala, ang pagpadayon sa pagreklamo sining malaut nga mga tawo batok sa akon? Tama na ang akon nabatian sini nga mga reklamo!
28 Karon ihatag sa ila ini nga sabat: 'Ginasumpa ko nga samtang nagakabuhi ako, himuon ko sa inyo ang inyo gid ginpangayo. Ako, ang Ginoo, naghambal sini.
29 Magakalamatay kamo kag ang inyo mga bangkay magalapta sa sini nga desierto. Tungod sang inyo pagreklamo batok sa akon, wala sing isa sa inyo nga nagaedad sing labaw sa 20 ka tuig nga makasulod sa sina nga duta.
30 Nagsaad ako nga papuy-on ko kamo didto, pero wala sing isa sa inyo nga makapuyo didto luas kay Caleb kag kay Josue.
31 Nagsiling kamo nga ang inyo mga kabataan pagabihagon, pero dalhon ko sila sa duta nga inyo ginsikway, kag mangin-ila ini puloy-an.
32 Magakalamatay kamo diri sa desierto.
33 Ang inyo mga kabataan magadalang-dalang sa desierto sa sulod sang 40 ka tuig, nga nagaantus tungod sang inyo pagkadi-matinuohon, tubtob nga ang katapusan sa inyo mapatay.
34 Magaantos kamo tungod sang inyo mga sala, sa sulod sang 40 ka tuig, isa ka tuig para sa tagsatagsa sang 40 ka adlaw nga inyo gingamit sa pag-usisa sang duta. Mahibal-an ninyo kon daw ano kon ako magsumpong sa inyo!
35 Ginasumpa ko nga himuon ko ini sa inyo, kamo nga malaut nga mga tawo nga nagtipon sing tingob batok sa akon. Diri sa desierto ang tagsatagsa sa inyo magakalamatay. Ako, ang Ginoo, naghambal sini.'"
36-37 Ang mga tawo nga ginpadala ni Moises sa pag-usisa sang duta nagsugid sing binutig nga amo ang kabangdanan sang pagreklamo sang mga tawo batok sa Ginoo. Gani ginpadal-an sila sang Ginoo sing pamalatian, kag nagkalamatay sila.
38 Sa 12 ka mga espiya si Josue kag si Caleb lamang ang nabilin nga buhi.
Ang Una nga Pagtinguha sa Paggubat sang Duta
(Deut 1:41-46)
39 Sang pagsugid ni Moises sa mga Israelinhon sang ginsiling sang Ginoo, nagpangasubo gid sila sing tama.
40 Aga pa gid sang madason nga adlaw nagsugod sila sa paggubat sang kabakuloran, nga nagasiling, "Karon handa na kami sa pagkadto sa duog nga ginsugid sa amon sang Ginoo. Ginakilala namon nga nakasala kami."
41 Pero si Moises nagsiling, "Kag ngaa bala ginalalis ninyo ang Ginoo karon? Indi kamo magmadinalag-on!
42 Indi kamo maglakat. Ang Ginoo wala nagaupod sa inyo, kag ang inyo mga kaaway magalutos sa inyo.
43 Kon mag-atubang kamo sa mga Amaleknon kag sa mga Canaanhon, magakalamatay kamo sa inaway; ang Ginoo indi mag-upod sa inyo, tungod kay indi kamo magtuman sa iya.”
44 Wala sapayan nagpangahas pa sila sa pagtaklad sa kabakuloran, bisan nga ang Kaban sang Kasugtanan sang Ginoo ukon si Moises wala maghalin sa kampamento.
45 Dayon ang mga Amaleknon kag ang mga Canaanhon nga nagpuyo didto nagsalakay kag naglutos sa ila, kag ginlagas sila tubtob sa Horma.
No comments:
Post a Comment