♤♤♤♤♤
Ang Daku nga Sugo
1 "Karon yari ang tanan nga mga kasugoan nga ginsugo sa akon sang Ginoo nga inyo Dios nga itudlo sa inyo. Tumana ninyo ini sa duta nga inyo pagakadtuan kag panag-iyahan.
2 Samtang nagakabuhi kamo, kamo kag ang inyo mga kaliwat dapat magkahadlok sa GINOO nga inyo Dios kag magtuman sang tanan niya nga mga kasugoan nga akon ginahatag sa inyo, agod magpuyo kamo didto sing malawig.
3 Mga tawo sang Israel, pamatii kag tumana ninyo ini! Dayon ang tanan manginmaayo para sa inyo kag mangingamhanan kamo nga pungsod kag magpuyo sa maayo kag mapatubason nga duta suno sa ginsaad sang Ginoo nga Dios sang aton mga katigulangan.
4 “O Israel, dumdoma ninyo ini! Ang Ginoo, amo lamang ang aton Dios.
5 Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga kusog.
6 Indi mo pagkalimtan ini nga mga sugo nga akon ginahatag sa imo karon nga adlaw.
7 Itudlo ini sa imo mga kaanakan. Ihambal ini sa imo kabataan kon yara ka sa imo balay kag kon sa iban nga lugar sa imo pagpahuway ukon sa imo pag-obra.
8 Ihigot ini sa imo mga butkon kag ibutang ini sa imo nga agtang subong pagpadumdom sa imo.
9 Isulat ini sa bakalan sang imo balay kag sa imo mga puwerta.
Paandam batok sa Pagkadi-matinumanon
10 "Ang Ginoo nga aton Dios nagsaad sa imo mga katigulangan nga si Abraham, si Isaac, kag si Jacob nga ihatag niya sa imo ang duta nga may dalagku kag mainuswagon nga mga siyudad nga wala mo pagpatinduga.
11 Ini nga mga balay mapuno sing maayo nga mga butang nga wala mo ginpangabudlayi, mga bubon nga wala mo ginkutkot kag mga talamnan sing ubas kag olibo nga wala mo gintanom. Kon ang Ginoo magdala sa imo sa sini nga duta kag yara ang tanan nga luyag mo kaunon,
12 mag-andam ka nga indi magkalimot sa GINOO nga nagdala sa imo pa gwa sa Egipto sa diin gin-ulipon ka.
13 Tahura lamang ang Ginoo nga imo Dios, sia lamang ang imo simbahon, kag magsaad ka sa iya lamang ngalan.
14 lndi ka magsimba sa mga dios, sa bisan ano nga mga dios sang mga tawo sa palibot nimo.
15 Kon himuon nimo ini, ang kaakig sang Ginoo magaabot sa imo subong sang kalayo nga magalaglag sa imo sing bug-os, kay ang GINOO nga imo Dios maimon nga Dios.
16 ''Indi pagsulaya ang Ginoo nga imo Dios subong sang imo ginhimo sa Masa.
17 Tumana ang tanan nga mga kasugoan nga iya ginhatag sa imo.
18 Tumana ang ginasiling sang Ginoo nga maayo kag matarong kag ang tanan manginmaayo para sa imo. Sarang ka makapanag-iya sang maayo nga duta nga ginsaad sang Ginoo sa inyo mga katigulangan,
19 kag pagatabugon mo ang imo mga kaaway, suno sa iya ginsaad.
20 "Sa ulihi ang inyo mga kaanakan magapamangkot sa inyo, 'Ngaa nga ginmanduan kamo sang Ginoo nga aton Dios nga tumanon ang tanan nga mga kasugoan?'
21 Dayon singgana sila, ‘Gin-ulipon kami sang hari sa Egipto, kag ang Ginoo nagluwas sa amon paagi sa iya daku nga gahom.
22 Nakita gid namon sang amon kaugalingon nga mga mata ang ginhimo niya nga mga milagro kag makahaladlok nga mga butang sa mga Egiptohanon, sa ila hari kag sa iya tanan nga mga opisyales.
23 Ginpagwa niya kami sa Egipto agod dalhon diri kag ihatag sa amon ini nga duta, suno sa iya ginsaad sa aton mga katigulangan.
24 Dayon ang Ginoo nga aton Dios nagsugo sa amon sa pagtuman sang tanan nga mga kasugoan kag sa pagtahod sa iya. Kon tumanon namon ini, iya gid bantayan ang aton pungsod kag pauswagon niya ini.
25 Ang Dios malipay sa aton kon magpadayon kita sa pagtuman sang tanan nga iya ginasugo sa aton.'
No comments:
Post a Comment