♤♤♤♤♤
Ang Paglalaw nga Ginadumilian
1 “Kamo mga anak sang Ginoo nga inyo Dios. Kon maglalaw kamo sa patay, indi ninyo pagpilasan ang inyo kaugalingon ukon kiskisan ang inyo mga agtang.
2 Kamo iya sang Ginoo nga inyo Dios, kay ginpili niya kamo nga mangin-iya kaugalingon nga mga tawo gikan sa tanan nga mga katawuhan nga nagapuyo sa duta.
Ang Matinlo kag Indi Matinlo nga mga Kahayupan
(Lev. 11:1-47)
3 "Indi kamo magkaon sang bisan ano nga ginsiling sang Ginoo nga mahigko.
4 Ang mga sapat nga sarang ninyo makaon amo ang masunod: baka, karnero, kanding,
5 usa, talunon nga karnero, talunon nga kanding, ukon gasela—
6 ang bisan ano nga sapat nga nagapihak ang kuko kag nagapangusang.
7 Pero indi kamo magkaon sang mga sapat nga ang ila mga kuko wala nagapihak kag wala man nagapangusang. Indi kamo magkaon sang kamelyo, koneho, ukon ilaga sa kabatuhan. Ini sila indi matinlo, kay nagapangusang sila pero wala nagapihak ang ila kuko.
8 Indi kamo magkaon sang baboy, kay mahigko ini. May kuko ini nga nagapihak pero wala nagapangusang. Indi kamo magkaon sini nga mga sapat ukon magtandog sang ila patay nga mga lawas.
9 "Sarang kamo makakaon sang isda nga may mga kapay kag mga himbis,
10 pero ang bisan ano nga nagaestar sa tubig nga wala sing kapay ukon himbis ini ninyo pagkaunon kay mahigko ini.
11 "Sarang kamo makakaon sang pispis nga matinlo.
12-18 Pero indi kamo magkaon sini nga mga pispis: agila, bukaw, dapay, palkon, ang tanan nga sari sang mga uwak, ostrit, ang tanan nga sari sang mga tulabong, dugwak, abubilya kag ang mga kabog.i
19 "Ang tanan nga pakpakan nga mga sapat mahigko. Indi ninyo ini pagkaunon.
20 Sarang ninyo makaon ang matinlo nga mga sapatsapat.
21 "Indi kamo magkaon sa sapat nga napatay. Ihatag ninyo ini sa mga dumoluong nga nagapuyo upod sa inyo, ukon mabaligya ninyo ini sa iban nga mga dumoluong. Pero iya kamo sang Ginoo nga inyo Dios; mga tawo niya kamo. "Indi ninyo paglutoon ang tinday nga karnero ukon kanding sa gatas sang iya iloy.
Ang Kasugoan Nahanungod sa Ikapulo
22 "Paina ninyo ang ikapulo—ang ikapulo sang tanan nga patubas sang inyo uma kada tuig.
23 Dayon kadto kamo sa isa ka duog nga ginpili sang Ginoo nga inyo Dios nga pagasimbahan. Didto sa iya atubangan kauna ninyo ang ikapulo sang inyo trigo, bino, kag lana nga olivo, kag ang panganay sang inyo baka kag karnero. Himoa ninyo ini, agod magtahod kamo sa gihapon sa Ginoo nga inyo Dios.
24 Kon malayo ang inyo ginapuy-an sa duog nga inyo ginasimbahan kag mabudlay ang magdala sang ikapulo sang inyo patubas nga ginbugay sang Ginoo sa inyo, amo ini ang himuon ninyo:
25 Ibaligya ang inyo patubas kag dalha ang kuwarta sa duog nga inyo ginasimbahan.
26 Didto ibakal ninyo ini sang inyo naluyagan—baka, karnero, bino, bag-o nga bino kag sa atubangan sang Ginoo nga inyo Dios, kamo kag ang inyo mga panimalay magkaon kag magkalipay sa inyo kaugalingon.
27 Pero indi ninyo pagpatumbayai ang mga Levita nga nagapuyo sa inyo mga banwa, kay wala sila sing kaugalingon nga pagkabutang.
28 "Sa katapusan sang tagsa ka ikatlo ka tuig dalha ninyo ang ikapulo sang tanan ninyo nga mga patubas kag taguon ini sa inyo mga banwa.
29 Ini manginkalan-on sang mga Levita kay wala sila sing kaugalingon nga pagkabutang, kag para man sa mga dumoluong, mga ilo, mga balo nga nagapuyo sa inyo mga banwa. Kinahanglan magkari sila sa pagkuha sang tanan nila nga mga kinahanglanon. Himoa ini kag ang Ginoo nga inyo Dios magabendisyon sa inyo sa tanan nga inyo ginahimo.
iAng ngalan sining iban nga mga pispis indi mapat-od.
No comments:
Post a Comment