□□□□□
Ang Hari sang Moab Nagpatawag kay Balaam
1 Ang mga Israelinhon nagpadayon kag naghimo sila sing kampamento sa mga kapatagan sang Moab, sa sidIangan sang Jordan, sa atubangan sang Jerico.
2 Sang pagkabati ni Balak anak ni Zipor, Hari sang Moab, sang ginhimo sang mga Israelinhon sa mga Amornon kag kon daw ano kadamo sang mga Israelinhon,
3 sia kag ang iya mga tawo ginkugmat.
4 Ang mga Moabnon nagsiling sa mga pangulo sang taga-Midian “Ini nga kabon magalaglag sa labing madali sang tagsa ka butang sa palibot naton, kaangay sang isa ka toro nga baka nga nagaharab sang hilamon sa isa ka halalban." Gani si Haring Balak
5 nagpadala sing mga mensahero sa pagtawag kay Balaam, anak ni Beor, nga yadto sa Petor malapit sa suba sang Eufrates sa duta sang Amaw. Gindala nila sa iya ining balita kay Balak: "Luyag ko nga mahibal-an mo nga ang isa ka pungsod nag-abot halin sa Egipto; ang iya mga tawo nagalapta bisan diin kag nagahandom sa pag-agaw sang amon duta.
6 Madamo sila sang sa amon, gani kon mahimo magkari ka kag pakamalauta sila para sa akon. Kag ayhan sarang namon sila madaog kag matabog pa gwa sa duta. Nahibal-an ko nga kon magbendisyon ka ang mga tawo mabendisyonan, kag kon magpakamalaut ka pakamalauton sila."
7 Gani ang mga pangulo sang mga Moabnon kag mga Midianhon nagdala sang bayad para sa pagpakamalaut, nagkadto sila kay Balaam, kag ginhatag nila sa iya ang mensahi ni Balak.
8 Si Balaam nagsiling sa ila, "Pabilin kamo diri sa sini nga gab-i, kag buas sugiran ko kamo kon ano ang ginsiling sang Ginoo sa akon." Gani ang mga pangulo nga mga Moabnon nagpabilin upod kay Balaam.
9 Ang Dios nag-abot kay Balaam kag nagpamangkot, "Sin-o ining mga tawo nga nagapabilin upod sa imo?"
10 Nagsabat sia, "Ginpadala sila ni Haring Balak sa akon sa pagsugid sa akon
11 nga ang isa ka pungsod nga nag-abot halin sa Egipto naglapta sa bug-os nga duta. Luyag niya nga pakamalauton ko sila para sa iya agod makapakig-away sia sa ila kag matabog sila pa gwa."
12 Ang Dios nagsiling kay Balaam, "Indi ka mag-upod sa sini nga mga tawo, kag indi pagpakamalauta ang mga tawo sang Israel, kay ginbendisyunan ko sila."
13 Sang madason nga aga, nagkadto si Balaam sa mga mensahero ni Balak kag ginsingganan sila, "Pauli kamo, kay ang Ginoo indi luyag nga mag-upod ako sa inyo."
14 Gani nagbalik sila kay Balak kag ginsugiran sia nga si Balaam indi mag-upod sa ila.
15 Dayon si Balak nagpadala sing madamo pa gid nga mga pangulo, nga labi pa ka gamhanan sang sa nahauna.
16 Nagkadto sila kay Balaam kag ginhatag nila sa iya ini nga mensahi halin kay Balak: "Kon mahimo indi pagtugoti nga masablagan ka sang bisan ano sa pagkari sa akon!
17 Suholan ko Ikaw sang tama ka daku kag himuon ko ang bisan ano nga isiling mo. Kon mahimo magkari ka kag pakamalauta ini nga mga tawo para sa akon."
18 Pero si Balaam nagsabat, "Bisan ihatag sa akon ni Balak ang tanan nga pilak kag bulawan sa iya palasyo, indi ako maglapas sang sugo sang Ginoo nga akon Dios bisan sa diutay lang nga bagay.
19 Pero kon mahimo magpabilin kamo diri karon nga gab-i subong sang ginhimo sang iban, agod mahibal-an ko kon bala ang Ginoo may iban pa nga luyag isiling sa akon."
20 Sadto nga gab-i ang Dios nag-abot kay Balaam kag nagsiling, "Kon ini nga mga tawo nagkari sa pag-agda sa imo sa pag-upod sa ila, maghimos ka kag maglakat, pero himoa lang ang ginasiling ko sa imo."
21 Gani sang madason nga aga, gintakdan ni Balaam sing montora ang iya asno, kag nag-upod sia sa mga pangulo sang mga Moabnon.
Si Balaam kag ang Iya Asno
22 Ang Dios naakig sang paglakat ni Balaam, kag samtang si Balaam naglakat nga nagasakay sa iya asno, nga ginaupdan sang duha niya ka mga suloguon, ang anghel sang Ginoo nagtindog sa dalan sa pagbalabag sa iya alagyan.
23 Sang makita sang asno ang anghel nga nagatindog didto nga nagauyat sang espada, naglipas sia sa dalan kag nagpadulong sa mga kaumhan. Ginhanot ni Balaam ang asno kag ginpabalik ini sa dalan.
24 Dayon ang anghel nagtindog sa makitid nga dalan sa gin-utlan sang duha ka talamnan sang mga ubas kag mga pader nga bato sa pihak kag pihak.
25 Sang makita sang asno ang anghel nagbunggo sia sa pader kag naipit ang tiil ni Balaam sa pader. Ginhanot liwat ni Balaam ang asno.
26 Sa liwat ang anghel nagkadto sa unhan; nagtindog sia sa isa ka makitid nga duog sa diin wala na sing sarang maagyan sa pihak kag pihak.
27 Sa sini nga tion, sang makita sang asno ang anghel, nagluko sia. Wala na makapugong si Balaam sang iya kaakig kag ginsugoran niya ang paghanot sang asno sang iya latigo.
28 Dayon ginpahambal sang Ginoo ang asno, kag nagsiling ini kay Balaam, “Ano bala ang ginhimo ko sa imo? Ngaa bala nga makatlo mo na ako ginhanot?"
29 Nagsabat si Balaam, "Tungod kay ginbuang mo ako! Kon may espada ako ginpatay ko na ikaw."
30 Ang asno nagsabat, "Indi bala ako amo ang asno nga imo ginsakyan sa bug-os mo nga kabuhi? Naghimo bala ako sa imo sing pareho sini sang una?" Nagsabat sia, "Wala.”
31 Dayon ginpakita sang Ginoo kay Balaam ang anghel nga nagatindog didto nga may espada; kag si Balaam nagluhod nga ang iya guya nagaduot sa duta.
32 Ginpamangkot sia sang anghel, "Ngaa bala ginhanot mo ang imo asno sing subong sina sa makatlo ka beses? Nagkari ako sa pagbalabag sa imo alagyan kag indi ka tani dapat maglakat.
33 Pero nakita ako sang imo asno kag naglikaw sia sing makatlo. Kon wala sia maglikaw napatay ko na ikaw, kag ginluwas ang asno.”
34 Si Balaam nagsabat, "Nakasala ako. Wala ako makahibalo nga nagatindog ka sa dalan sa pagsumpong sa akon; pero karon kon nagahunahona ka nga sala para sa akon ang pagpadayon mapauli ako.”
35 Pero ang anghel nagsiling, "Upod ka sa sini nga mga tawo, pero ihambal lang ang akon ginasiling." Gani si Balaam nag-upod sa ila.
Gin-abiabi ni Balak si Balaam
36 Sang pagkabati ni Balak nga nagapakari si Balaam, naglakat sia sa pagsugata sa iya sa Ar, isa ka siyudad sa suba sang Arnon sa dulonan sang Moab.
37 Ginsingganan sia ni Balak, "Ngaa bala wala ka magkari sang nahauna nga pagpatawag ko sa imo? Naghunahona ka bala nga indi ako makasarang sa pagsuhol sa imo?"
38 Si Balaam nagsabat, "Yari na ako, indi bala? Pero karon, ano bala ang akon gahom? Ang akon lamang mahambal amo ang ginasiling sang Dios sa akon."
39 Gani si Balaam nag-upod kay Balak pakadto sa banwa sang Huzot,
40 sa diin si Balak nag-ihaw sing mga baka kag mga karnero, kag ginhatag ang iban nga mga karnero kay Balaam kag sa mga pangulo nga kaupod niya.
Ang Nahauna nga Tagna ni Balaam
41 Sang madason nga aga gindala ni Balak si Balaam sa pagtaklad pakadto sa Bamot Baal, sa diin makita niya ang bahin sang mga tawo sang Israel.
No comments:
Post a Comment