♤♤♤♤♤
1 "Kon may duha ka Israelinhon nga mag-asunto sa korte kag ang isa nahukman nga wala sing sala kag ang isa may sala,
2 kon ang may sala pagahukman nga pagahanuton, pahapaon sia sang hukom kag ipahanot. Ang kadamuon sang hanot nga iya pagabatunon depende sa sala nga iya nahimo.
3 Sarang sia mahanot sing 40 ka mga lapdos, pero indi na pagpasobrahan kay ini magapakahuya sa iya.
4 "Indi pagbusali ang baka kon ginagamit ini sa paglinas sang trigo.
Katungdanan sa Napatay nga Utod
5 "Kon ang duha ka mag-utod nga lalaki nagapuyo sa isa ka panimalay kag ang isa sa ila mapatay nga wala sing anak nga lalaki, dayon ang nabalo indi magpamana sang iban luas sa pamilya sang napatay. Katungdanan ini sang utod sang napatay sa pagpangasawa sa iya.
6 Ang panganay nga lalaki nga iya nabata pagakabigon nga iya bata sang napatay, agod ang iya panimalay magapadayon sa Israel.
7 Pero kon ang utod sang napatay wala luyag magpangasawa sa iya, ang balo sang iya utod magakadto sa mga pangulo sang banwa kag magasiling, ‘Ang utod sang akon bana indi magtuman sang iya katungdanan. Indi sia magpadayon sang linahi sang iya utod sa Israel.'
8 Dayon ang mga pangulo sang banwa magapatawag sa iya kag magapakighambal sa iya. Kon indi pa gid sia magpangasawa sa iya,
9 ang balo sang iya utod magapalapit sa iya sa atubangan sang mga pangulo sang banwa, ubahon sang balo ang isa sang sandalyas sang iya bayaw, duplaan sia sa guya kag magsiling, ‘Amo ini ang pagahimuon sa tawo nga indi magpadayon sang linahi sang iya utod.'
10 Sa Israel ang iya panimalay pagatawgon 'nga panimalay sang tawo nga gin-ubahan sing sandalyas.'
Ang Iban nga mga Kasugoan
11 "Kon ang duha ka tawo nagaaway kag ang asawa sang isa magbulig sa iya bana paagi sa pagbutong sang kinatawo sang kontra sang iya bana,
12 utda ang kamot sining babayi nga wala sing luoyIuoy.
13-14 "Indi ka magdaya sa mga kiluhan ukon sa mga sulokban.
15 Gamita ang husto nga kiluhan kag sulokban, agod magkabuhi ka sing malawig sa duta nga ginahatag sang Ginoo nga imo Dios.
16 Ang Ginoo nagakaakig sa mga tawo nga nagadaya.
Ang Sugo sa Pagpatay sa mga Amalecnon
17 "Dumdoma kon ano ang ginhimo sang mga Amalecnon sa inyo sang paggwa ninyo sa Egipto.
18 Wala sila nagakahadlok sa Dios, gani ginlipot nila kamo sang nakapoy kamo kag nalapyo, kag ginpamatay nila ang mga naulihi.
19 Gani, kon ang Ginoo nga inyo Dios maghatag sa inyo sang duta kag wala na kamo sing katalagman sa inyo mga kaaway nga nagapuyo sa palibot ninyo, indi gid kamo magkalipat sa pagpamatay sa mga Amalecnon, agod wala na sing may makadumdom sa ila!
No comments:
Post a Comment