□□□□□
Ang mga Katungdanan sang mga Levita nga Baranggay ni Coat
1 Ang Ginoo nagsugo kay Moises
2 sa pagsenso sang mga Levita nga baranggay ni Coat, suno sa mga kabaranggayan kag mga panimalay,
3 kag sa paglista sang tanan nga mga lalaki nga nagaedad sing 30 tubtob sa 50 ka tuig, nga takos sa pag-alagad sa Tolda nga Tilipunan.
4 Ang ila pag-alagad may kaangtanan sa labing balaan nga mga butang.
5 Ang Ginoo naghambal kay Moises nga kon tion na sa paghalin sang kampamento, si Aaron kag ang iya mga anak nga lalaki magasulod sa Tolda, magakuha sang kurtina sa atubangan sang Kaban kag tabunan nila sini ang Kaban.
6 Ila ini haklapan sang mapino nga panit, haklapan sing panapton nga asol ang ibabaw sini, kag ila dayon igulo ang mga yayongan.
7 Ihumlad nila ang isa ka asol nga panapton sa ibabaw sang lamesa para sa tinapay nga ginhalad sa Ginoo kag ibutang sa sini ang mga pinggan, ang mga yahong para sa mga insyenso, ang mga yahong nga ginahalaran, ang mga tibod nga ginasudlan sang bino nga ginahalad. Ang tinapay ibilin sa lamesa.
8 Tabonan nila ini tanan sang pula nga panapton, haklapan nila sing isa ka mapino nga panit sa pagtabon sini, kag dayon igulo nila ang mga yayongan.
9 Magakuha sila sang isa ka asol nga panapton kag tabonan nila ang kandeliruhan, lakip ang iya mga suga, mga inugpalong, ang mga bagahan, kag ang tanan nga sulodlan sang lana nga olivo.
10 Putson nila ini kag ang tanan nga mga gamit sini sang isa ka mapino nga panit kag ipakabit ini sa yayongan.
11 Dason haklapan nila sing isa ka panapton nga asol ang ibabaw sang altar, butangan nila sing isa ka mapino nga panit sa pagtabon sini, kag dayon igulo nila ang mga yayongan.
12 Kuhaon nila ang tanan nga mga gamit sa Balaan nga Duog, putson nila ini sang isa ka asol nga panapton, butangan nila sing isa ka mapino nga panit sa pagtabon sini kag ipakabit nila ini sa yayongan.
13 Kuhaon nila ang mga abo nga nabulit sang lana halin sa altar kag haklapan ini sang panapton nga granate.
14 Ibutang nila sa sini ang tanan nga gamit nga ginagamit sa pag-alagad sa altar: Ang mga bagahan, ang mga kaw-it, ang mga pala, kag ang mga labador. Dayon haklapan nila ini sing mapino nga panit kag igulo nila ang mga yayongan.
15 Kon tion na sa paghalin sang kampamento, ang baranggay ni Coat magaabot sa pagdala sang balaan nga mga butang sa tapos lamang matabonan ini ni Aaron kag sang iya mga anak nga lalaki lakip ang tanan nga mga gamit sini. Ang kabaranggayan ni Coat indi dapat magtandog sang balaan nga mga butang, kay kon tandugon nila mapatay sila. Amo ini ang mga katungdanan sang baranggay ni Coat sa tion nga halinon ang Tolda nga Tilipunan.
16 Si Eleazar nga anak ni Aaron nga pari amo ang gintugyanan sang bug-os nga Tolda kag sang lana para sa mga suga, sang insyenso, sang mga halad nga kalan-on, sang lana nga inughaplas, kag sang iban pa nga mga butang sa Tolda nga ginhalad sa Ginoo.
17 Ang Ginoo nagsiling kay Moises kag kay Aaron,
18 "Indi pagpabay-i nga ang baranggay ni Coat
19 mapatay paagi sa pagpalapit sa sining labi ka balaan nga mga butang. Agod indi ini mahanabo, si Aaron kag ang iya mga anak nga lalaki magasulod kag magahatag sa tagsa ka tawo sang iya hilikuton kag singganan sia kon ano ang iya dalhon.
20 Pero kon ang mga Coatnon magsulod sa Tolda kag makita nila ang mga pari nga nagahanda sa paghalina sang balaan nga mga butang, mapatay sila.”
Ang mga Katungdanan sang mga Levita nga Baranggay ni Gerson
21 Ang Ginoo nagsugo kay Moises
22 sa pagsenso sang mga Levita nga baranggay ni Gerson suno sa ila mga kabaranggayan kag mga panimalay,
23 kag sa paglista sang tanan nga mga lalaki nga nagaedad sing 30 tubtob sa 50 ka tuig nga takos sa pag-alagad sa Tolda nga Tilipunan.
 |
| " . . . takos sa pag-alagad sa Tolda." (4:23) |
24 Ang ila katungdanan amo ang pagdala sang masunod nga mga butang:
25 ang Tolda nga Tilipunan, ang iya nasulod nga lipon, ang iya naggowa nga lipon, ang mapino nga panit nga nagatabon sa ibabaw sini, ang kurtina para sa puwertahan,
26 ang mga kurtina kag mga kalat para sa pasiyuhan sa palibot sang Tolda kag sang altar, ang mga kurtina para sa puwertahan pakadto sa pasiyuhan, kag ang tanan nga mga banting nga ginagamit sa pagpatindog sini nga mga butang. Pagahimuon nila ang tanan nga mga tulumanon nga ginakinahanglan para sa sini nga mga butang.
27 Pat-uron ni Moises kag ni Aaron nga ang mga Gersonhon magtuman sang tanan nga mga katungdanan kag maghimo sang tanan nga ginasugo sa ila ni Aaron kag sang iya mga anak nga lalaki.
28 Amo ini ang mga katungdanan sang baranggay ni Gerson sa Tolda nga Tilipunan; tumanon nila ini sa idalom sang pagdumala ni Itamar nga anak ni Aaron nga pari.
Ang mga Katungdanan sang mga Levita nga Baranggay ni Merari
29 Ang Ginoo nagsugo kay Moises sa pagsenso sang mga Levita nga baranggay ni Merari suno sa ila mga kabaranggayan kag mga panimalay,
30 kag sa paglista sang tanan nga mga lalaki nga nagaedad sing 30 tubtob sa 50 ka tuig nga takos sa pag-alagad sa Tolda nga Tilipunan.
31 Sila ang may katungdanan sa pagdala sang mga tapi, mga balabag, mga haligi, mga sadsaran,
32 mga palpal, kag ang mga kalat sang pasiyuhan sa palibot sang Tolda, lakip ang tanan nga mga banting nga ginagamit sa pagpatindog sini. Ang tagsa ka tawo may katungdanan sa pagdala sang butang nga gintugyan sa iya.
33 Amo ini ang mga katungdanan sang baranggay ni Merari sa ila pag-alagad sa Tolda nga Tilipunan; tumanon nila ini sa idalom sang pagdumala ni Itamar nga anak ni Aaron nga pari.
Ang Pagsenso sang mga Levita
34-48 Sa pagtuman sang sugo sang Ginoo, sanday Moises, Aaron, kag ang mga pangulo sang katilingban nagsenso sang tatlo ka kabaranggayan sang mga Levita nga amo sanday Coat, Gerson, kag Merari, suno sa ila mga kabaranggayan kag mga panimalay, kag ginlista nila ang tanan nga mga lalaki nga nagaedad sing 30 tubtob sa 50 ka tuig nga takos sa pag-alagad sa Tolda nga Tilipunan, nga amo ang masunod:
Kabaranggayan Kadamuon
Coat 2,750
Gerson 2,630
Merari 3,200
Kabug-osan: 8,580
49 Ang tagsa ka lalaki ginlista suno sa sugo sang Ginoo kay Moises, kag sa mando sang Ginoo paagi kay Moises, ang tagsa ka lalaki ginhatagan sing katungdanan sa pag-alagad ukon pagdala sang mga palas-anon.
amakita . . . paghalin; ukon makita ang mga balaan nga mga butang bisan sa malip-ot nga tion.
No comments:
Post a Comment