♡♡♡♡♡
Ang Pagtuli kag ang Pascua sa Gilgal
1 Ang tanan nga mga hari nga Amornon sa nakatundan sang Jordan kag ang tanan nga mga hari nga Canaanhon didto sa baybayon sang Dagat sang Mediteraneo nakabati nga ang Ginoo nagpamala sang Suba sang Jordan samtang ang mga tawo sang Israel nagtabok sini. Nagkalahadlok sila kag nadulaan sing kaisog, tungod sang mga Israelinhon.2 Dayon ang Ginoo nagsiling sa kay Josue, “Maghimo ka sing mga sundang gikan sa bato nga bantiling, kag tulia liwat ang mga Israelinhon."
3 Gani si Josue naghimo sing mga sundang, kag ginpangtuli niya sila didto sa Bukid sang Gintulian.
4 Ginhimo niya ini, kay ang tanan nga mga lalaki nga makasarang na sa pag-away, sang ila paghalin sa Egipto, nagkalamatay sa desierto sa ila pagpanglakaton.
5 Bisan ang tanan nga mga lalaki nga naghalin sa Egipto ginpangtuli, wala gid sing may natuli sa mga nagkalatawo sa desierto sang sila nagapanglakaton sa desierto.
6 Ang mga tawo sang Israel nagpanglakaton sa desierto sa sulod sang 40 ka tuig. Sa sini nga tion, ang tanan nga lalaki nga makasarang na sa pag-away nga naghalin sa Egipto nagkalamatay na, kay wala sila magpamati sa ginsiling sang Ginoo. Ang Ginoo nagsiling sa ila nga indi niya sila pagpatan-awon sang maayo kag mapatubason nga duta nga iya ginsaad sa ila mga katigulangan nga ihatag sa aton.
7 Pero ang ila mga kaanakan nga lalaki nga nagbulos sa ila wala mapangtuli samtang nagapanglakaton sila sa desierto. Amo ining bag-o nga kaliwatan ang ginpangtuli ni Josue.
8 Sang matapos ang pagpangtuli sang tanan nga mga kalalakin-an, nagpabilin sila sa sulod sang kampamento tubtob nga nagpali ang ila mga pilas.
9 Kag ang Ginoo nagsiling kay Josue, "Karon nga adlaw ginkuha ko sa inyo ang kahuloy-an sang inyo pagpaulipon sa Egipto." Gani ang ngalan sang duog pagatawgon nga Gilgala tubtob karon nga adlaw.
10 Samtang ang mga Israelinhon yara pa sa ila kampamento sa Gilgal sa kapatagan sa palibot sang Jerico, ginsaulog nila ang Pascua sa gab-i sang ika-14 nga adlaw sang bulan.
11 Sa madason gid nga adlaw nagkaon sila sang mga patubas sa Canaan: sinanlag nga trigo, kag tinapay nga wala sing tapay.
12 Sa tapos sini nag-untat na ang paghulog sang mana, kag wala na sing mana ang mga Israelinhon. Sugod sadto nga tuig, nagkaon sila sang mga patubas sa Canaan.
Si Josue kag ang Tawo nga may Espada
13 Sang didto si Josue malapit sa Jerico, sa hinali may nakita sia nga tawo nga nagatindog sa atubangan niya nga nagauyat sang espada. Ginpalapitan sia ni Josue kag ginpamangkot, "Isa bala ikaw sang amon mga soldado, ukon isa ka kaaway?"14 Nagsabat ang tawo, "Indi, kundi nga nagkari ako subong pangulo sang mga hangaway sang Ginoo." Si Josue nagluhod sa pagsimba kag nagsiling, "Yari ako sa pag-alagad sa imo, sir. Ano bala ang luyag mo nga himuon ko?”
15 Kag ang pangulo sang mga hangaway sang Ginoo nagsiling sa iya, "Ubaha ang imo sandalyas, kay ang duog nga imo ginatindugan balaan.” Kag si Josue nagtuman sang ginsiling sa iya.
aGILGAL: Ini nga ngalan kon ihambal daw pareho sang pulong sa Hebreo nga kon sayuron “ginkuha."
JOSUE - Kapitulo 4 <<< >>> JOSUE - Kapitulo 6
No comments:
Post a Comment