♡♡♡♡♡
Ang Pagkapukan sang Jerico
1 Ang Jerico ginsirhan gid sing malig-on agod indi makasulod ang mga Israelinhon. Wala sing may makasulod ukon makagwa sa siyudad.2 Ang Ginoo nagsiling kay Josue, "Pamati ka! Ihatag ko sa imo ang Jerico kag ang iya hari kag maisog nga mga hangaway.
3 Ikaw kag ang imo mga hangaway magmartsa palibot sa siyudad sing makaisa kada adlaw, sa sulod sang anom ka adlaw.
4 Ang pito ka pari nga ang kadaisa nagadala sing budyong nga sungay sang karnero, amo ang magauna sa Kaban sang Kasugtanan. Sa ikapito nga adlaw, ikaw kag ang imo mga hangaway magmartsa palibot sa siyudad sing makapito, nga ang mga pari nagapatunog sang mga budyong.
5 Dayon patunogon nila sing dungan kag malawig ang mga budyong. Sa inyo pagkabati sini, ang tanan nga mga tawo magsinggit sing tudo gid, kag ang mga pader sang siyudad magakalapukan. Dayon ang tanan nga mga tawo magasulod sing deretso sa siyudad.”
6 Gani gintawag ni Josue ang mga pari kag ginsingganan sila, "Hakwata ninyo ang Kaban sang Kasugtanan. Ang pito sa inyo mag-una nga nagadala sang mga budyong nga nahimo sa sungay sang karnero. Ang mga hangaway magauna sa inyo."
7 Kag ginsingganan niya ang mga tawo, "Lakat na kamo! Libuta ninyo ang siyudad upod sa mga soldado nga nagauna sa Kaban sang Kasugtanan sang Ginoo.”
8 Dayon suno sa ginsugo ni Josue, ang pito ka mga pari nag-una sa Kaban sang Kasugtanan sang Ginoo nga nagapatunog sang budyong nga sungay sang karnero.
9 Ang mga soldado nag-una sa mga pari nga nagapatunog sang ila mga budyong kag ang mga gwardya sa likod nagsunod sa Kaban sang Kasugtanan, samtang nagapadayon ang pagpatunog sang mga budyong.
10 Pero si Josue nagmando sa mga tawo nga indi magsinggit ukon maggahod tubtob maghatag sia sing mando.
11 Gani ginpalibot niya sa siyudad sing makaisa ang mga pari nga nagadala sang kaban sang kasugtanan. Nagbalik sila sa kampamento, kag nagpabilin sila didto sa sadto nga gab-i.
12 Aga pa si Josue nagbangon sang madason nga adlaw, kag ginhakwat sang mga pari ang kaban sang kasugtanan.
13 Ang pito ka mga pari nga nagadala sang pito ka mga budyong nga sungay sang karnero nag-una nga nagapadayon sa pagpatunog sang mga budyong. Ang mga hangaway nag-una sa ila kag ang mga gwardya sa likod nagasunod sang Kaban sang Kasugtanan, samtang nagapadayon ang pagpatunog sang mga budyong.
14 Sa ikaduha nga adlaw nagmartsa sila liwat pdibot sa siyudad sing makaisa kag nagbalik sa kampamento. Ginhimo nila ini sa sulod sang anom ka adlaw.
15 Sang ikapito nga adlaw nagbugtaw sila sing kaagahon pa, kag nagmartsa sila palibot sa siyudad sing makapito sa amo man gihapon nga paagi. Amo lang yadto nga adlaw nga nagmartsa sila palibot sa siyudad sing makapito.
16 Sa ikapito nila nga palibot, sa tapos ang mga pari makapatunog sang mga budyong, ginmanduan ni Josue ang mga tawo, "Singgit kamo! Ang GINOO naghatag sa inyo sang siyudad!
17 Ang siyudad kag ang tanan nga yara sa sini pagalaglagon sing bug-os subong nga dulot sa Ginoo. Ang babayi nga nagabaligya sang iya dungog nga si Rahab kag ang iya panimalay lamang amo ang pagaluwason, kay gintago niya ang aton mga espiya.
18 Apang kamo inyo, magpalayo sa mga butang nga pagalaglagon. Kon magkuha kamo sang bisan ano nga butang nga gintugyan nga pagalaglagon, magadala kamo sing kalalat-an kag kaIaglagan sa kampamento sang mga Israelinhon.
19 Pero ang bisan ano nga nahimo sa pilak, bulawan, saway, ukon salsalon napain para sa Ginoo. Ibutang sila sa talaguan sang manggad sang GINOO."
20 Gani ang mga pari nagpatunog sang mga budyong. Sang pagkabati sini sang mga tawo, nagsinggit sila sing tudo, kag ang pader napukan. Dayon ang tanan nga mga tawo nagsulod deretso sa siyudad kag gin-agaw ini.
 |
| Nagsinggit sila sing tudo kag ang pader napukan. (6:20) |
22 Ginsugo ni Josue ang duha ka mga tawo nga nagpang-espiya, "Kadtoi ninyo ang balay sang babayi nga nagabaligya sang iya dungog, kag dalha sia kag ang iya panimalay pa gwa subong sang inyo ginsaad sa iya.”
23 Gani naglakat sila kag gindala nila pa gwa si Rahab, kaupod sa iya amay, iloy, mga utod nga lalaki, kag ang iban nga mga katapo sang iya panimalay. Tanan sila gindala nila pa gwa, ang iya panimalay kag ang mga ulipon, kag ginpatener sila sa gwa sang kampamento sang mga Israelinhon.
24 Dayon gintutdan nila ang siyudad kag ginsunog ang tanan nga yara sa sulod sang siyudad, luas lamang sa mga pagkabutang nga nahimo sa bulawan, pilak, saway, kag salsalon, nga ila ginpanguha kag ginbutang sa talaguan sang manggad sang Ginoo.
25 Pero ginluwas ni Josue ang kabuhi sang babayi nga nagabaligya sang iya dungog, nga si Rahab, kag ang tanan niya nga mga himata, kay gintago niya ang mga espiya nga ginpadala ni Josue sa Jerico. Ang iya mga kaliwat nagpuyo sa Israel tubtob karon nga adlaw.
26 Sa adto nga tion si Josue nagpaandam gid nga nagasiling, "Ang bisan sin-o nga magtinguha sa pagpatindog liwat sini nga siyudad sang Jerico, pagapakamalauton sang Ginoo. Ang bisan sin-o nga magbutang sing sadsaran madulaan sang iya panganay nga anak nga lalaki, ang bisan sin-o nga magpatindog sang iya mga puwerta madulaan sang iya kinagot nga anak.”
27 Gani ang GINOO nag-upod kay Josue, kag ang iya kabantugan naglapnag sa bug-os nga pungsod.
JOSUE - Kapitulo 5 <<< >>> JOSUE - Kapitulo 7
No comments:
Post a Comment